વાયુ વાવાઝોડાએ ફરી દિશા બદલી, માછીમારોને દરિયો ન ખેડવા સૂચના

વાયુ વાવાઝોડાએ ફરી તેની દિશા બદલી છે અને તે આવતા 24 કલાકમાં કચ્છ પર ત્રાટકે તેવી સંભાવના દેખાઈ રહી છે. જોકે, આ વાવાઝોડું હવે ધીરે ધીરે નબળું પડી રહ્યું છે.

હાલ અરબ સાગરમાં રહેલું વાયુ વાવાઝોડું આ પહેલાં સૌરાષ્ટ્રના દરિયાકિનારે ત્રાટકે તેવી સંભાવના હતી. જોકે, વાવાઝોડું ફંટાઈ ગયું હતું અને સૌરાષ્ટ્રના દરિયાકિનારા પાસેથી પસાર થયું હતું.

જે બાદ એવું લાગતું હતું કે વાવાઝોડું ઓમાન તરફ વળીને દરિયામાં જ હળવા દબાણમાં પરિવર્તિત થઈ જશે.

હવામાન ખાતા દ્વારા માછીમારોને સોમવારે દરિયો ન ખેડવા તથા માછીમારી ન કરવા સૂચના આપવામાં આવી છે.

11 જૂનના રોજ દક્ષિણ-પૂર્વ અરબ સાગરમાં બનેલું ડિપ્રેશન ચક્રવાતમાં ફેરવાઈ ગયું હતું અને ત્યારબાદ તે તીવ્ર ચક્રવાતમાં પરિવર્તિત થયું હતું.

કચ્છ પર ત્રાટકતાં પહેલાં વાવાઝોડું નબળું પડશે

હવામાન ખાતા તરફથી મળી રહેલી માહિતી અનુસાર કચ્છના દરિયાકિનારે વાયુ વાવાઝોડું પહોંચે તે પહેલાં તે નબળું પડશે.

દરિયાકાંઠે ફૂંકાતા સીધા પવનો અને ઠંડી દરિયાની સપાટીને કારણે વાયુની તાકાતમાં ઘટાડો થશે.

હાલનું ચક્રવાત વાયુ ધીરે-ધીરે ડીપ ડિપ્રેશન અને ત્યારબાદ ડીપ્રેશન એટલે કે વાયુના હળવા દબાણમાં પરિવર્તિત થશે.

આવનારા 24 કલાકમાં વાયુ વાવાઝોડું કચ્છના દરિયાકાંઠે પહોંચે તેવી સંભાવના જોવાઈ રહી છે.

વાયુ વાવાઝોડાને કારણે પવનની ગતી 60થી 70 કિલોમિટર પ્રતિ કલાકની રહેવાની આશંકા છે, જે વધીને 80 કિલોમિટર પ્રતિ કલાક થઈ શકે એમ છે.

વાવાઝોડાના ખતરાને જોતાં રાજ્ય સરકારે કચ્છ જિલ્લામાં ઍલર્ટ જારી કર્યું છે અને તકેદારીનાં પગલાં લેવામાં આવી રહ્યાં છે.

સૌરાષ્ટ્ર, કચ્છમાં વરસાદની આગાહી

વાયુ હાલ કચ્છના દરિયાકિનારા તરફ આગળ વધી રહ્યું છે ત્યારે હવામાન વિભાગે આગાહી કરી છે કે કચ્છ સહિત સૌરાષ્ટ્રના કેટલાક વિસ્તારમાં વરસાદ પડશે.

સૌરાષ્ટ્ર સહિત દક્ષિણ રાજસ્થાનમાં પણ વાયુને કારણે વરસાદ પડવાની શક્યતા છે.

વાયુ કચ્છ પર ત્રાટક્યા બાદ સૌરાષ્ટ્ર અને કચ્છ તથા રાજસ્થાનના ઘણા વિસ્તારોમાં ભારેથી અતિભારે વરસાદ થવાની શક્યતા છે.

હાલ આ વાવાઝોડું અરબ સાગરમાં છે અને તે સૌરાષ્ટ્રના દરિયાકાંઠાની પાસેથી થઈને ઓમાન તરફ વળ્યું હતું પરંતુ ત્યારબાદ ફરી કચ્છ તરફ ફંટાયું છે.

લાખો લોકોનું સ્થળાંતર કરાયું હતું

વાયુ વાવાઝોડું સૌપ્રથમ ગુજરાતના દીવ અને પોરબંદરના દરિયાકિનારે વચ્ચે ત્રાટકવાનું હતું જેના કારણે સૌરાષ્ટ્ર અને કચ્છ બંને પર ખતરો હતો.

ખતરાને જોતાં રાજ્ય સરકારે સ્થળાંતરની મોટી કવાયત હાથ ધરી હતી. સરકારના કહેવા મુજબ આશરે 3 લાખ લોકોનું સ્થળાંતર કરવામાં આવ્યું હતું.

સૌરાષ્ટ્રના દરિયાકિનારાનાં આશરે 500 ગામોને ખાલી કરાવવામાં આવ્યાં હતાં. આ સ્થળાંતરની પ્રક્રિયામાં એનડીઆરએફ મુખ્ય ભૂમિકામાં હતું.

એનડીઆરએફ ઉપરાંત ગુજરાત પોલીસ, આર્મી, નૅવી, કૉસ્ટગાર્ડ અને વાયુસેનાને પણ ખડેપગે હતી.

આ ઉપરાંત રાહત અને બચાવ કામગીરી માટે હેલિકૉપ્ટરને પણ તૈનાત કરી દેવામાં આવ્યાં હતાં.

કેન્દ્ર સરકાર ગુજરાત સરકારના સતત સંપર્કમાં હતી અને કેન્દ્રીય ગૃહ મંત્રી અમિત શાહ પણ સતત ગુજરાતના સંપર્કમાં હતા.

તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો