ગુજરાતમાં હવે વરસાદી માહોલ કેવો રહેશે? નવી બનેલી સિસ્ટમ ગુજરાત નજીક ક્યારે પહોંચશે?

ગુજરાતમાં હજુ પણ વરસાદી માહોલ છે અને દરેક જિલ્લામાં થોડો ઘણો વરસાદ પડી રહ્યો છે. હવામાન વિભાગના લૅટેસ્ટ બુલેટિન પ્રમાણે મહીસાગર અને આણંદ જિલ્લામાં ચોમાસું સૌથી વધારે સક્રિય જોવા મળ્યું છે.

આ ઉપરાંત પંચમહાલ, દાહોદ અને સાબરકાંઠા જિલ્લામાં પણ સારો વરસાદ પડી ગયો છે જેના કારણે નીચાણવાળા વિસ્તારોમાં પાણી ભરાયાં હતાં અને વાહન-વ્યવહારને અસર થઈ હતી.

સૌરાષ્ટ્રમાં છૂટાછવાયાં સ્થળે વરસાદ થયો છે જ્યારે કચ્છ મોટા ભાગે હવામાન સૂકું રહ્યું છે.

ગુજરાતમાં છેલ્લા ચોવીસ કલાકમાં 140 તાલુકામાં વરસાદ પડ્યો છે જેમાંથી 20 તાલુકામાં એક ઇંચ અથવા વધારે વરસાદ પડ્યો છે.

મહીસાગરના કડાણા તાલુકામાં ચોવીસ કલાકમાં ત્રણ ઇંચ વરસાદ પડ્યો છે જ્યારે દાહોદના સિંગવાડમાં 2.91 ઇંચ, પંચમહાલના મોરવા હડફમાં 2.56 ઇંચ, દાહોદના ફતેપુરામાં 2.40 અને દાહોદ તાલુકામાં 1.85 ઇંચ વરસાદ થયો છે.

વીડિયો : દીપક ચુડાસમા

બીબીસી માટે કલેક્ટિવ ન્યૂઝરૂમનું પ્રકાશન