બંગાળની ખાડીમાં નવી સિસ્ટમ બની, ગુજરાતમાં વરસાદ વધશે કે ઘટશે?
હવામાન વિભાગનું કહેવું છે કે ચોમાસું હજી પણ ઝડપથી આગળ વધી રહ્યું છે અને બંગાળની ખાડીની સિસ્ટમને કારણે કેટલાક વિસ્તારોમાં 2થી 3 દિવસમાં ચોમાસું પહોંચે એવી શક્યતા છે.
આ વર્ષે 24 મેના રોજ એટલે કે સમય કરતાં આઠ દિવસ વહેલું ચોમાસું બેસી ગયું હતું અને મુંબઈ સુધી પણ ખૂબ ઝડપથી પહોંચી ગયું છે.
ગુજરાતમાં આગામી દિવસોમાં હવામાન વિભાગે હજી પણ ભારે વરસાદની આગાહી કરી છે અને કેટલાક વિસ્તારોમાં હળવાથી મધ્યમ વરસાદની આગાહી કરી છે.
ગુજરાતમાં ચોમાસું પહોંચે એ પહેલાં હવે બંગાળની ખાડીમાં એક સિસ્ટમ સર્જાઈ છે અને તેની અસર દેશના ઘણા વિસ્તારોમાં થવાની શક્યતા છે.
તાજેતરમાં જ અરબી સમુદ્રમાં સર્જાયેલી સિસ્ટમને કારણે ગુજરાતમાં વરસાદમાં વધારો થયો હતો અને ચોમાસું મહારાષ્ટ્ર સુધી પહોંચી ગયું હતું.
ઇમેજ સ્રોત, Getty Images
હવામાન વિભાગની માહિતી પ્રમાણે બંગાળની ખાડીમાં એક લૉ-પ્રેશર પ્રેશર એરિયા બન્યો છે અને આગામી 24 કલાકમાં તે વધારે મજબૂત થવાની શક્યતા છે.
આ સિસ્ટમ બંગાળની ખાડીમાં ધીરેધીરે આગળ વધશે અને પૂર્વોત્તરનાં રાજ્યો તરફ જાય તેવી શક્યતા હાલ દેખાઈ રહી છે.
જેના લીધે પશ્ચિમ બંગાળ, ઓડિશા, પૂર્વોત્તરનાં રાજ્યોમાં વરસાદી ગતિવિધિ વધી જશે અને આગામી દિવસોમાં આ વિસ્તારોમાં ભારેથી અતિભારે વરસાદ થવાની શક્યતા છે.
હાલ આ સિસ્ટમ ગુજરાત તરફ કે મધ્ય ભારત તરફ આવવાની શક્યતા જણાતી નથી. જેથી રાજ્ય પર તેની કોઈ અસર થવાની શક્યતા નથી.
હવે ગુજરાતમાં વરસાદનું જોર વધવાને બદલે ઘટવાની શક્યતા છે અને તેના કારણે ચોમાસાની પ્રગતિ પર પણ અસર થાય તેવી શક્યતા છે.
બીબીસી માટે કલેક્ટિવ ન્યૂઝરૂમનું પ્રકાશન
