Leicester 3 - 1 Liverpool: Leicester yabyaje umusaruro amakosa mu bwugarizi yo mu mpera y'umukino

Umunyezamu Alisson na ba myugariro ba Liverpool bagize akazi gakomeye mu gice cya kabiri ubwo Leicester yatsindaga Liverpool ikajya ku mwanya wa kabiri muri shampiyona ya Premier League.

Igitego cya Mohamed Salah ku ishoti yo ku munota wa 67 cyatumye Liverpool iba imbere, ariko kiza kwishyurwa na James Maddison ku munota wa 78 ku mupira w'umuterekano.

Leicester yashyizemo icya kabiri iminota itatu nyuma yaho ubwo habagaho guhuzagurika hagati ya Alisson na myugariro w'umutangizi Ozan Kabak, bigatuma Jamie Vardy ashyira umupira mu izamu ririmo ubusa.

Habura iminota itanu ngo umukino urangire, Harvey Barnes yashyizemo icya gatatu ari na cyo cya nyuma cya Leicester muri uwo mukino.

Leicester City igiye ku mwanya wa kabiri, mu gihe uku gutsindwa kwa Liverpool ku nshuro ya gatatu yikurikiranya kuvuze ko kuba yasoza uyu mwaka iri mu myanya ine ya mbere bisa nk'ibiri mu kaga.