Kenya: Bahanze amaso Urukiko rw’Ikirenga rwatangiye kumva ikirego cya Raila Odinga

Urukiko rw’Ikirenga rwa Kenya rwatangiye kumva ikirego cya Raila Odinga usaba ko amatora aheruka kuba muri uku kwezi aseswa. 

Hagati muri uku kwezi, komisiyo y’amatora ya Kenya yatangaje ko William Ruto ari we perezida watsinze amatora ya perezida ya tariki 09 Kanama, afite amajwi arenga gato 50%. 

Abanyamategeko ba Odinga none kuwa kane babwiye inteko y’abacamanza barindwi b’Urukiko rw’Ikirenga ishingiro ry’ikirego cy’umukiriya wabo. 

Barasaba uru rukiko gusesa intsinzi ya Ruto bavuga ko habaye imikorere mibi n’uburiganya mu byavuye mu matora.  

Bavuga ko ‘system’ ya internet ya komisiyo y’amatora yashyirwagamo ibyavuye ku biro by’amatora yinjiriwe mu nyungu z’uwatangajwe ko yatsinze.

Babwiye urukiko ko ibyayavuyemo bitakwizerwa kuko habaye kwinjira muri iyo ‘system’ kw’abantu batabyemerewe kandi batazwi. 

Itsinda ry’abanyamategeko ba William Ruto biteganyijwe ko nabo bahabwa umwanya muri uru rukiko aho basubiza ku bivugwa n’uruhande rwa Raila Odinga.  

Abandi bantu batanu nabo baregeye uru rukiko ku byavuye mu matora, nabo biteganyijwe ko bahabwa umwanya uyu munsi bagasobanura ishingiro ry’ibyo baregeye.  

Hagati aho, iruhande rw’uru rukiko barimo gusubiramo kubara ibyavuye ku biro by’itora 15 nk’uko byategetswe n’uru rukiko rw’ikirenga. 

Abanyakenya benshi bakurikiranye ibiri kubera mu rukiko rw’ikirenga n’imyanzuro izaruvamo. 

Biteganyijwe ko uru rukiko ruzatangaza umwanzuro warwo kuri ibi birego tariki 05 z’ukwezi gutaha kwa Nzeri.