Umwami Charles yahuye n'abahoze ari impunzi bakomoka muri Sudan

Umwami w'Ubwongereza yabwiye abahoze ari impunzi bahunze mu bwato jenoside yo muri Darfur ati: "Ndishimye cyane kuba mutekanye hano".

Ku wa gatatu, Umwami Charles yahuye n'abacungamari, abagishwanama (consultants) bo mu kigo cy'ubuvuzi cy'Ubwongereza (NHS) n'abakozi bo mu miryango ifasha, bashoboye kugira ubuzima bushya mu Bwongereza.

Impirimbanyi y'Umunya-Sudan Amouna Adam ni we watumiye Umwami Charles ngo aze ahure n'abo bagenzi be, ubwo Adam yahuraga na we ku munsi wo kuzirikana kuri jenoside yakorewe abayahudi (Holocaust Memorial Day), uba ku itariki ya 27 y'ukwezi kwa mbere.

Rebecca Tinsley, umukuru w'umuryango Waging Peace uharanira kurwanya jenoside n'ihonyorwa ry'uburenganzira bwa muntu muri Sudan, yagize ati: "Ubu ni bwo bwoko [ni rwo rugero] bw'Umwami nizeye ko agiye kuba we".

Icyo gikorwa, cyateguwe n'umuryango Holocaust Memorial Day Trust n'umuryango Waging Peace, cyabereye rwagati mu murwa mukuru London ahakorerwa ibikorwa by'abakomoka muri Sudan baba mu Bwongereza.

Ageza ijambo ku bagore n'abagabo bahunze ubwicanyi bwibasiye imbaga, Umwami Charles yagize ati: "Kwabaye kubasura kwihariye cyane kuri jyewe, ibyo nshobora kubibemerera.

"Byabaye ibyishimo guhura namwe mwese — ndishimye cyane kuba mutekanye hano".

Intambara yo mu karere ka Darfur muri Sudan yatangiye mu 2003, abahinzi b'abirabura batotezwa n'imitwe y'intagondwa z'abarabu zashenye ibyaro ndetse zikica abasivile, amakimbirane akaba agikomeje n'ubu.

Debay Manees, w'umugabo, yaganiriye n'Umwami Charles ndetse nyuma avuga ku kuntu yumva yicuza ku kuba yarasize inshuti ze mu mwaka wa 2015 zishobora kuba zitararokotse.

Manees yagize ati: "Nari umwarimu ubwo nibasirwaga. Natawe muri yombi nuko banshinja kuba ndi maneko, nta mahitamo nari mfite, kwari ukuhava cyangwa bakanyica.

"Kuri jyewe numva nicuza kuko abantu nasize bamerewe nabi, bagenzi banjye nasize muri gereza — ibintu nk'ibyo birakomeje".

Adam, mu 2009 wasabye ubuhungiro mu Bwongereza hamwe n'umugabo we n'abana babo babiri b'abahungu, ati: "Ubwo natumiraga Umwami hano nari nishimye cyane ariko natunguwe no kuba yaje".