TikTok igiye kuriha Amerika miliyoni $400 mu bwumvikane bwo kurangiza ikirego ku ivogerwa ry'ubuzima bwite bw'abana

TikTok yemeye kuriha leta y'Amerika miliyoni 400 z'amadolari (zingana na miliyari 590 FRW) mu kurangiza ikirego gishinja urwo rubuga kuvogera ubuzima bwite bw'abana, ubu bukaba bubaye bumwe mu bwumvikane bw'amafaranga menshi cyane bubayeho kuri iki kibazo.

Ayo masezerano ashingiye ku kirego cyo mu mwaka wa 2024 cyatanzwe na minisiteri y'ubutabera y'Amerika mu gihe cy'ubutegetsi bwa Perezida Joe Biden gishinja TikTok na kompanyi nyirayo, ByteDance, gukusanya "amakuru menshi cyane" y'abakoresha urwo rubuga babarirwa muri za miliyoni bafite munsi y'imyaka 13.

Gukora ibyo byari binyuranyije n'itegeko ryo ku rwego rw'igihugu ryo kurinda ubuzima bwite bw'abana ku mbuga zo kuri murandasi (rizwi nka COPPA mu mpine yo mu Cyongereza), ryashyizweho mu mwaka wa 2000.

Ni na ryo tegeko leta zirenga 20 zo muri Amerika ubu zirimo kwifashisha mu kurega kompanyi Meta (nyir'imbuga zirimo Facebook, Instagram na WhatsApp).

Umushinjacyaha mukuru wungirije Brett Shumate yagize ati: "Abana n'ababyeyi barinzwe neza cyane uyu munsi kurusha uko bari bameze ubwo uru rubanza rwatangiraga."

Izindi kompanyi zishyuye amafaranga y'ibihano kuri leta y'Amerika kubera kurenga ku itegeko rya COPPA zirimo nk'urubuga rwa YouTube rwa kompanyi ya Google, mu mwaka wa 2019 rwarishye leta y'Amerika miliyoni 170 z'amadolari, na kompanyi Epic Games, mu mwaka wa 2022 yarishye miliyoni 275 z'amadolari.

Meta ubu ishobora gufatirwa ibihano bishobora kurenga miliyari zibarirwa mu magana z'amadolari y'Amerika zishingiye ku cyo abashinjacyaha bakuru ba leta 29 zo muri Amerika bavuga ko ari ukurenga kenshi ku itegeko rya COPPA. Urubanza rw'inteko y'abaturage kuri icyo kirego rwatangiye muri iki cyumweru, Meta ikaba ishinjwa kugambirira kugera ku bana bakoresha imbuga zayo no kubungukiraho.

Mu gihe ikirego kuri TikTok cyatanzwe mbere y'itandukanywa ry'ubucuruzi n'ibikorwa bya TikTok muri Amerika bikavanwa ku cyicaro yari ifite mbere cyo mu Bushinwa, ubu bwumvikane bureba gusa ibikorwa bya TikTok byo mu Bushinwa.

ByteDance, kompanyi y'abantu ku giti cyabo, abashoramari baherutse kuyikorera igenagaciro bavuga ko ubu ifite imari ya miliyari 550 z'amadolari y'Amerika.

Muri ayo masezerano, TikTok na ByteDance zizariha ako kanya minisiteri y'ubutabera y'Amerika miliyoni 300 z'amadolari. Zizayiriha ayandi miliyoni 100 z'amadolari ubwo leta izaba ivuye mu masezerano yemejwe n'urukiko yo mu 2019 hagati yayo na komisiyo y'ubucuruzi y'Amerika.

Muri ayo masezerano, kompanyi Musical.ly, yabanjirije ByteDance, yasabwaga kuriha amande ya miliyoni 5.7 z'amadolari kubera kurenga kenshi ku itegeko rya COPPA ndetse igakora kuburyo isaba uruhushya rw'ababyeyi ku mwana wese uri munsi y'imyaka 13 ukoresha urwo rubuga.

Ku wa gatanu, minisiteri y'ubutabera ntiyasobanuye birambuye niba hari ikindi izakora kuri TikTok kirenze ayo mande. Ariko iyo minisiteri yavuze ko kuva ireze urwo rubuga, TikTok "yabayemo impinduka zikomeye", zirimo ibijyanye na nyirayo, ubuzima bwite n'ubugenzuzi bw'urwo rubuga ku barukoresha b'urubyiruko.

Ubwo icyo kirego cyatangwaga, abashinjacyaha b'Amerika bavuze ko hari hari ingimbi n'abangavu barenga miliyoni 170 bakoreshaga TikTok ndetse ko urwo rubuga rwari "rugambiriye abana". Nyamara, nkuko abo bashinjacyaha babivugaga, rukaba rutaragenzuraga neza imyaka y'abarukoresha cyangwa ngo rusabe uruhushya rw'ababyeyi rujyanye n'abarukoresha batarageza ku myaka y'ubukure.

Mu mwaka wa 2024, uwari Perezida w'Amerika Biden yaharaniye ko TikTok icibwa muri Amerika cyangwa iyo kompanyi igasaranganya ibikorwa byayo byo muri Amerika. Perezida w'Amerika Donald Trump na we yashyigikiye iryo saranganywa ry'ibikorwa by'urwo rubuga, ryabaye mu mwaka ushize.

Ibikorwa byarwo muri Amerika ubu ku kigero cya 81% bifitwe n'itsinda ry'abashoramari, mu gihe Bytedance yagumanye umugabane ungana na 19%.

Uhagarariye TikTok ntiyasubije ubusabe bwa BBC bwo kugira ngo agire icyo abivugaho.