Imvo n'Imvano ku bahoze n'abagisiganwa ku magare mu Rwanda (igice cya nyuma)

Nongeye kubaramutsa mwese muteze amatwi Imvo n'Imvano yo kuri uyu wa gatandatu tariki icyenda y'ukwa gatatu mu 2024. Nkuko nabibemereye mu cyumweru gishize, uyu munsi turabagezaho igice cya kabiri ari na cyo cya nyuma cy'ibiganiro twagiranye n'abahoze bakora amasiganwa y'amagare mu Rwanda.

Ibi biganiro twabiteguye mu kwezi kwa 12 kw'umwaka ushize. Twaganiriye ku mateka yabo, ari na ko tunanyuzamo tugaha umwanya abakina uwo mukino muri iki gihe bakatubwira ibibazo bahura na byo, maze umuyobozi w'ishyirahamwe ry'umukino w'amagare mu Rwanda akabasubiza.

Nibutse ko irushanwa mpuzamahanga ry'amagare rizabera bwa mbere ku mugabane w'Afurika, rikazabera i Kigali mu Rwanda kuva ku itariki 21 kugeza ku itariki 28 z'ukwezi kwa cyenda mu mwaka utaha wa 2025.

Abatumire bacu muri ibi biganiro ni Jeanne Mukankwaya, umutegarugori wabaye uwa mbere wagiye mu marushanwa y'amagare mu Rwanda, Vestine Mukagasana, Laetitia Mugabekazi, abo ni abategarugori bari mu Rwanda. Mu bagabo, twaganiriye na Gahemba Jean Marie hamwe n'umuhungu we Areruya Joseph, Abraham Ruhumuriza hamwe rero n'umuyobozi w'ishyirahamwe ry'umukino w'amagare mu Rwanda, Samson Ndayishimiye.

Iki kiganiro mwagiteguriwe kandi murakigezwaho na Félin Gakwaya.