Rwanda: Imvo n'Imvano ku banyeshuri barenga 400 babuze inguzanyo za 'bourse' ya kaminuza

Ndabashuhuje nshuti muteze amatwi BBC, uyu ni umwanya w'ikiganiro Imvo n'Imvano, turi ku wa gatandatu tariki ya 4 y'ukwezi kwa gatandatu umwaka wa 2022.

Ikiganiro cyacu uyu munsi kiribanda ku kibazo cy'abanyeshuri barenga 400 barangije amashuri yisumbuye ariko bakabura inguzanyo zo kubafasha gukomeza mu ishuri rikuru ry'imyuga n'ubumenyingiro "Rwanda Polytechnic".

Abanyeshuri bemeza ko inama nkuru y'amashuri makuru na za kaminuza (HEC) yabemereye inguzanyo nyuma ikazibambura - ibyo bikaba inshuro ebyiri.

Bamwe mu banyeshuri bari ku mashuri bategereje ko ikibazo cyabo cyasobanuka. Ni mu gihe abandi bahisemo kuba bategerereje iwabo mu rugo. Abo bose twarabegereye, muri iki kiganiro baratubwira uko icyo kibazo giteye.

Ni ikibazo kiri gukurikiranirwa hafi n'impuzamiryango y'uburenganzira bwa muntu mu Rwanda (CLADHO).

Inama nkuru y'amashuri makuru na za kaminuza (HEC) ntiyashatse kugira icyo idutangariza kuri icyo kibazo, ubu cyageze mu biro bya Minisitiri w'intebe.

Gusa ibaruwa HEC yandikiye CLADHO ivuga ko ibyo abo banyeshuri bavuga nta kuri kurimo, ikavuga ko itangazo rimenyesha abasabye inguzanyo ko bareba ibyavuye mu busabe bwabo ryasohotse ku itariki ya 25/2/2022, mbere yuko amasomo atangira ku itariki ya 28/2/2022.

Ni ukuvuga ko uwagiye kwiga wese yari yamaze kumenya ibyavuye mu busabe bwe, nkuko HEC ibivuga.

Ikindi kandi, HEC ivuga ko yahaye abanyeshuri umwanya wo kujurira, kuburyo ahari harabayemo ikosa hose hakosowe. Ni mu gihe CLADHO yo ivuga ko abanyeshuri barengana kandi ko itanyuzwe n'ibikubiye muri iyi baruwa ya HEC.

Ikiganiro Imvo n'Imvano cyo kuri uyu wa gatandatu mwagiteguriwe kandi murakigezwaho na Yves Bucyana.