Abanyamakuru 13 b'Abanya-Ethiopia bafunzwe mu cyumweru kimwe

Abandi banyamakuru babiri bafungiwe mu murwa mukuru Addis Ababa wa Ethiopia, byongera umubare w'abanyamakuru n'abakora mu itangazamakuru bamaze gufungwa guhera mu cyumweru gishize, bagera kuri 13.

Bamwe barimo kubona ibi nko guhashya abavuga ibinenga umurongo wa leta.

Uko guta muri yombi abo banyamakuru kwahuriranye no gutangira kw'icyo abategetsi bavuze ko ari "igikorwa cy'iyubahirizwa ry'amategeko" mu karere ka Amhara mu majyaruguru y'igihugu, aho abantu babarirwa mu bihumbi batawe muri yombi.

Mu mwaka ushize, ikigo cyo muri Amerika giharanira uburenganzira bw'abanyamakuru, Committee to Protect Journalists, cyavuze ko Ethiopia ari kimwe mu bihugu bifunga cyane abanyamakuru.

None ubu inkundura nshya yo guta muri yombi abanyamakuru yatumye abanyamakuru n'abakora mu itangazamakuru 13 bose hamwe bafungwa mu cyumweru kimwe kirenga gato gishize.

Ariko si abanyamakuru gusa barimo kwibasirwa.

Ku wa mbere, abategetsi bo mu karere ka Amhara, ka kabiri gatuwe n'abaturage benshi muri Ethiopia, bavuze ko bafunze abantu barenga 4,500.

Muri abo harimo impirimbanyi, abasirikare n'abarwanyi, hamwe n'abarimu ba kaminuza. Kuva icyo gihe, ibikorwa byo guta muri yombi byarakomeje.

Umuvugizi w'akarere ka Amhara yabwiye BBC ko nta mibare ya vuba aha cyane afite, ariko ibiro by'umutekano byabwiye ibitangazamakuru byaho ko abandi bantu 2,000 bafunzwe.

Bibaye mu gihe hari impungenge ko icyo gikorwa kirimo gukomeza, gishobora gutuma habaho ubundi bushyamirane - ndetse n'urugomo - muri iki gihugu gihanganye n'intambara n'amakimbirane ashingiye ku moko.