Imvo n'Imvano ku ifungurwa ry'imipaka yo ku butaka y'u Rwanda

Ndabashuhuje mwebwe mwese abateze amatwi BBC, uyu ni umwanya w'ikiganiro Imvo n'Imvano, turi ku wa gatandatu itariki ya 26 z'ukwezi kwa gatatu umwaka wa 2022. Ikiganiro cyacu uyu munsi kiribanda ku ifungurwa ry'imipaka yo ku butaka nyuma y'imyaka 2 imipaka ifunzwe kubera icyorezo cya Covid-19 ariko by'umwihariko umupaka wa Gatuna uhuza u Rwanda na Uganda wo wari warafunzwe mu 2019 biturutse ku makimbirane hagati y'ibihugu byombi.

Icyemezo cya leta y'u Rwanda cyo gufungura imipaka yo ku butaka cyatangiye kubahirizwa tariki 7 z'ukwezi kwa gatatu, hakaba hashize ibyumweru 3. Mu mpera z'ukwezi kwa mbere, u Rwanda na Uganda byari byatangaje ifungurwa ry'uwo mupaka wa Gatuna ariko abaturage ntibemererwa kwambuka ku mpamvu zasobanuwe ko ari iza Covid-19.

Hagati aho, imipaka ihuza u Rwanda n'igihugu cy'u Burundi yo ntirafungurwa ariko ku ruhande rw'u Burundi. Leta y'u Rwanda ivuga ko uruhande rwarwo rufunguye, ko bategereje icyemezo cya leta y'u Burundi kandi ko ibiganiro bigikomeje.

Ku mipaka ifunguye se kwambuka ubu noneho biremewe kuri buri wese? Twasuye imwe mu mipaka ihuza u Rwanda n'ibihugu bituranye duha ijambo abakoresha iyo mipaka. Ni iki abaturage basabwa? Kuki ibisabwa ku mupaka wa Gatuna uhuza u Rwanda na Uganda bitandukanye n'ibisabwa ku yindi mipaka? Leta y'u Rwanda yo ibivugaho iki? Ibyo byose murabyumva muri iki kiganiro, mwateguriwe kandi mugiye kugezwaho na Yves Bucyana.