Ikirwa cya Kiribati cyinjiye muri guma mu rugo ya mbere kubera abagenzi banduye mu ndege
Ahavuye isanamu, Getty Images
Igihugu cya Kiribati kigizwe n'ikirwa (izinga mu Kirundi) cyo mu nyanja ya Pacific cyinjiye muri gahunda ya guma mu rugo, nyuma yuko abagenzi bo mu rugendo mpuzamahanga rw'indege rwa mbere rubayeho muri icyo gihugu mu mezi 10 ashize basanzwemo Covid.
Bijyanye n'ingamba nshya, abaturage basabwe kuguma mu ngo zabo ndetse n'ibikorwa bihuriramo abantu birabujijwe.
Abantu 36 muri iyo ndege ivuye muri Fiji basanze baranduye Covid. Abantu bane banduye hatazwi aho bahuriye n'abanduye Covid (ibizwi nka 'community transmission').
Kugeza mu cyumweru gishize, Kiribati yari imaze gutangaza abantu babiri gusa banduye Covid kuva iki cyorezo cyatangira.
Kiribati ni kimwe mu birwa byitaruye (biri kure) cyane ku isi. Kiri mu ntera ya kilometero 5,000 uvuye ku mugabane uri hafi yacyo cyane, ari wo Amerika ya ruguru.
Ku wa kabiri, leta y'iki gihugu yemeje ko abagenzi 36 mu bagenzi 54 basanze baranduye coronavirus. Mu butumwa bwo kuri Facebook, leta yavuze ko abagenzi bose ubu barimo kugenzurwa n'abaganga.
Ubutegetsi bwa Kiribati bwatangaje ko abagenzi bose bari bari muri iyo ndege bakingiwe byuzuye.
Ariko, abantu batatu bo mu itsinda ry'umutekano ryo ku nyubako yo kwishyira mu kato, bamaze gusanga baranduye Covid. Undi muntu udakora kuri iyo nyubako na we yanduye iyi virusi, nkuko leta ibivuga.
Iyi gahunda ya guma mu rugo yatangiye kuri uyu wa gatandatu, ariko ntibizwi igihe izamara.
Abaturage ntibemerewe kuva mu ngo zabo keretse bagiye muri serivisi za ngombwa cyane. Bashobora kugura mu maduka ibicuruzwa by'ingenzi bacyeneye, ariko bakabigura gusa hagati saa kumi n'ebyiri za mu gitondo (6h) na saa munani z'amanywa (14).
Kuri Facebook, ibiro bya Perezida Taneti Maamau byagize biti: "Uburyo bwonyine dushobora kurwanya iyi virusi ni mu kwikingiza byuzuye".
"Abaturage barashishikarizwa kurangiza gufata doze zabo z'inkingo mu rwego rwo kwirinda ubwabo n'imiryango".
Nta kigero kizwi cy'abamaze gukingirwa byuzuye mu bantu 120,000 batuye iki gihugu.
