Covid: Inzobere ku ndwara zandura yo muri US ivuga ko ingendo zo kuri Noheli zizakwirakwiza Omicron

Ingendo zo kuri Noheli zizongera ikwirakwira ry'ubwandu bw'ubwoko bushya bwa Covid-19 yihinduranyije bwa Omicron, haba no ku bakingiwe, nkuko bivugwa n'inzobere ku ndwara zandura yo ku rwego rwo hejuru yo muri Amerika.

Ku cyumweru, Dr Anthony Fauci yabwiye ikiganiro Meet the Press cyo kuri televiziyo NBC ati: "Nta gushidikanya guhari kuri ibi, [Omicron] ifite ubushobozi budasanzwe bwo gukwirakwira".

Dr Fauci, ugira inama ubutegetsi bw'Amerika kuri iki cyorezo, yavuze ko ubu bwoko bushya ubu "burimo guca ibintu ku isi".

Ibihugu birimo gukaza ingamba zo kwirinda muri iki gihe ubu bwoko bwihinduranyije cyane burimo gukwirakwira.

I Burayi, Ubufaransa n'Ubudage ni bimwe mu bihugu byafashe ingamba zo kubuza ingendo ndetse n'Ubuholandi bwashyizeho gahunda ya guma mu rugo muri iki gihe cya Noheli.

Za leta zitandukanye ku isi zirimo no kongera ibikorwa byo gutanga doze y'urukingo rwa Covid yo gushimangira, nyuma yuko abashakashatsi bavuze ko urukingo rw'inyongera rushobora gutanga ubwirinzi bugera kuri 85% burinda kurwara Covid y'igikatu.

Ku cyumweru, Dr Fauci yavuze ko gukwirakwira kwihuse kwa Omicron muri Amerika gushobora kugira ingaruka ikomeye kuri serivisi z'ubuvuzi mu gihugu.

Yaburiye ati: "Ibitaro byacu, mu gihe ibintu byaba bimeze nkuko bimeze ubu, bizaba birimo byakira umubare munini cyane".

Dr Fauci yavuze ko abantu bakwiye gufata ingamba zo kwirinda zirimo nko kwambara udupfukamunwa no guhana intera. Yanashishikarije Abanyamerika gufata urukingo no kwiteza urukingo rwo gushimangira.

Yagize ati: "Itandukaniro hagati y'umuntu wakingiwe wahawe doze yo gushimangira wanduye, n'umuntu wanduye utarigeze na rimwe akingirwa - ni itandukaniro rinini ku bijyanye n'ibyago byo kugira uburwayi bw'igikatu".

Ku wa gatanu, mu kiganiro n'abanyamakuru mu biro bya perezida bya White House, Dr Fauci yavuze ko abantu badakingiye bafite ibyago biri hejuru cyane byo kurwara Covid y'igikatu no gushyirwa mu bitaro.

Hafi 73% by'abaturage b'Amerika bamaze guhabwa nibura urukingo rumwe rwa Covid, nkuko bivugwa n'ikigo cy'Amerika cyo kurwanya no kwirinda indwara cya Centers for Disease Control and Prevention (CDC). Kugeza ubu, abagera hafi kuri 30% bamaze kubona urukingo rwo gushimangira.

Ikigereranyo cya vuba aha cya CDC kigaragaza ko Omicron yihariye hafi 3% by'abanduye Covid muri iki gihe, benshi muri bo babonetse muri leta ya New York.

Kuva iki cyorezo cyatangira, Amerika yatangaje abantu barenga miliyoni 50 banduye coronavirus, n'abarenga 800,000 bapfuye mu buryo bufite aho buhuriye na Covid.