Covid muri Autriche: I Vienna habaye imyigaragambyo yo kwamagana ingamba zo kuyirinda

Abantu babarirwa mu bihumbi za mirongo bakoze imyigaragambyo muri Autriche (Austria) yo kwamagana ingamba zo guhagarika ikwirakwira ry'ubwandu bwa Covid-19, zirimo n'itegeko ryo kwikingiza.

Polisi ivuga ko abantu bagera hafi ku 44,000 bateraniye mu murwa mukuru Vienna ku wa gatandatu, ku nshuro ya kane yikurikiranya y'imyigaragambyo yo mu mpera y'icyumweru.

Mu kwezi gushize, Autriche yabaye igihugu cya mbere mu Burayi bwo mu burengerazuba gisubijeho gahunda ya guma mu rugo ku bakingiwe, gahunda irangira kuri iki cyumweru.

Ariko ingamba zo kwirinda zizakomeza ku bantu badakingiye.

Abigaragambya, bashyigikiwe n'ishyaka ry'ibitekerezo by'ubuhezanguni rya Freedom Party, barimo kwamagana icyemezo cya leta cyo gutuma gukingirwa Covid-19 biba itegeko guhera mu kwezi kwa kabiri.

Iki gihugu ni cyo cya mbere cyo mu muryango w'Ubumwe bw'Uburayi (EU/UE) gifashe iyo ngamba, ireba abatuye mu gihugu bose barengeje imyaka 14 y'amavuko, keretse abasonewe urukingo kubera impamvu z'ubuzima.

Abanenga iyo ngamba bavuga ko abantu bakwiye kugira ubwisanzure bwo kwihitiramo bo ubwabo niba bakingirwa. Leta ya Autriche ivuga ko nta muntu n'umwe uzakingirwa ku ngufu, ariko abazanga guhabwa urukingo bazacibwa amande agera ku ma-Euro 3,600 (miliyoni 4 mu mafaranga y'u Rwanda).

Abigaragambya bari bitwaje ibyapa birimo ibyanditseho ngo "Oya ku nkingo zo ku itegeko", banatera hejuru ngo "Turi abantu", na "turabyanze". Imyigaragambyo ititabiriwe n'imbaga yabereye mu mijyi ya Klagenfurt na Linz.

Autriche, ituwe n'abantu miliyoni 8.9, yatangaje abantu miliyoni 1.2 banduye coronavirus n'abarenga 13,000 bishwe na yo kuva iki cyorezo cyatangira, nkuko bigaragazwa n'imibare yakusanyijwe na Kaminuza ya Johns Hopkins yo muri Amerika.

Abagera hafi kuri 68% by'abaturage bayo barakingiwe byuzuye, uyu ukaba ari umwe mu mibare iri hasi cyane mu Burayi bw'uburengerazuba.