Rwanda: Imvo n'Imvano ku ngaruka z'ihindagurika ry'ikirere ku bidukikije no ku mutungo kamere w'amazi

Ndabashuhuje mwebwe mwese nshuti bakunzi ba BBC muduteze amatwi kuri uyu wa gatandatu itariki ya 23 z'ukwezi kwa 10 umwaka wa 2021. Uyu ni umwanya w'ikiganiro Imvo n'Imvano.

Turaganira ku ihindagurika ry'ikirere, ingaruka zaryo ku bantu ndetse no ku bidukikije.

Ni mu gihe mu minsi micye mu mujyi wa Glasgow mu gihugu cya Scotland hateganyijwe inama mpuzamahanga iziga ku ihindagurika ry'ikirere, iyo nama ikazanarebera hamwe n'ingamba zo guhangana n'ingaruka ziterwa n'iryo hindagurika ry'ikirere.

Mu Rwanda turareba ingaruka z'ihindagurika ry'ikirere ku bidukikije no ku mutungo kamere w'amazi. Turasura ikiyaga cya Karago mu burengerazuba bw'u Rwanda, gifite igice cyacyo cyakamye.

Turaganira n'abaturage baturiye icyo kiyaga bavuga ko batakibona umusaruro w'amafi wari ubatunze ndetse na gahunda z'ubukerarugendo zahagaze.

Ni mu gihe mu bihe byashize ibiyaga bya Burera na Ruhondo nabyo amazi yabyo yagabanutse ku kigero cyo hejuru ndetse binatera ikibazo cy'ibura ry'amashanyarazi mu bice bimwe by'igihugu kuko urugomero rw'amashanyarazi rufatiye ku mazi y'ibyo biyaga.

Turagera kuri ibyo biyaga tuganire n'impuguke ku ngamba zafashwe zo kubibungabunga bigatuma ibiyaga byongera gusubirana amazi yabyo.

Turajya no mu kigo cy'igihugu gishinzwe kubungabunga umutungo kamere w'amazi batubwire muri rusange ku ngaruka z'imihindagurikire y'ikirere ku mutungo kamere w'amazi n'ingamba zigenda zifatwa mu guhangana n'ibibazo biterwa n'iryo hindagurika ry'ikirere.

Ni ikiganiro Imvo n'Imvano, icyo kuri uyu wa gatandatu mwagiteguriwe kandi murakigezwaho na Yves Bucyana.