Rwanda: Imvo n'Imvano ku bikorwa bya bamwe mu bagore mu guhangana na Covid-19

Mwaramukanye amahoro y'imana mwese abateze amatwi BBC, uyu ni umwanya w'ikiganiro Imvo n'Imvano.Turi ku wa gatandatu tariki ya 13 z'ukwezi kwa 3 umwaka wa 2021.

Ikiganiro cyacu cy'uyu munsi kiribanda ku bikorwa bya bamwe mu bagore bo mu Rwanda bigaragazwa nk'iby'indashyikirwa mu guhangana n'icyorezo cya Covid-19. Ni mu gihe muri iki cyumweru hizihizwaga umunsi mpuzamahanga w' abagore ku itariki 8 y'ukwezi kwa gatatu.

Mu Rwanda, insanganyamatsiko y'uyu mwaka ikaba ari ugukangurira abagore kuba ku ruhembe mu isi yugarijwe na Covid-19. Turasura abagore babaye aba mbere mu gukora udupfukamunwa mu gihe icyorezo cyari kimeze nabi igihugu cyose cyashyizwe muri 'guma mu rugo' mu ntangiriro y'ukwezi kwa kane mu mwaka wa 2020, aho basabwaga gukora miliyoni z'udupfukamunwa mu gihe gito gishoboka.

Turajya mu ntara y'amajyepfo tuvugane n'abakora imiti n'amasabune byifashishwa mu gukaraba intoki - kimwe mu bintu bisabwa mu kwirinda icyorezo cya Covid-19.

Imvo n'Imvano kandi yaganiriye n'umugore wakoze uburyo bw'ikoranabuhanga (application) bushobora kugaragaza no kubika imyirondoro y'abantu binjira ahantu hakoranira abantu benshi, bukaba ari uburyo bwakwifashishwa mu kwirinda ikwirakwizwa rya coronavirus.

U Rwanda rubarura ba rwiyemezamirimo b'abagore bakabakaba ibihumbi 60 bakora imirimo itandukanye.

Ni mu gihe benshi bataka ibihombo byatewe na Covid-19 byatumye bamwe bareka burundu ubushabitsi bakoraga. Ese urugaga rubahagarariye rubafitiye ikihe gisubizo? Byose murabyumva muri iki kiganiro cy'Imvo n'Imvano.

Mwagiteguriwe kandi murakigezwaho na Yves Bucyana.