Pau Gasol yishimiye gusubira gukinira i Barcelona, aho yahereye ari naho yavukiye

Paul Gasol ku wa kabiri yatangaje ko agiye gusubira gukina mu ikipe ya Barcelona ya Basketball, aha ni ho yatangiriye gukina nk'uwabigize umwuga mu myaka irenga 20 ishize.

Gasol w'imyaka 40, yatwaye ibikombe bibiri bya NBA ari kumwe na LA Lakers, anitabira NBA All-Star gatandatu, aha i Barcelona ni na ho yavukiye.

Aheruka kugaragara mu mukino wa NBA tariki 10-03-2019 ari mu ikipe ya Milwaukee Bucks.

Mu itangazo yasohoye yagize ati: "Nishimiye gusubira mu ikipe nahereyemo".

Mu mwaka w'imikino wa 1998-99 nibwo yatangiye gukina muri Barcelona, mu 2002 yabaye nimero ya gatatu mu batoranyijwe kwinjira muri NBA, ageze muri Memphis yahise aba umukinnyi mushya witwaye neza mu 2002.

Mu myaka ibiri ishize yabangamiwe n'imvune ku kirenge, mu itangazo rye ryo ku wa kabiri yavuze ko yumva ubu ameze neza yiteguye gukina nanone.

Uyu mukinnyi w'uburebure bwa 2.15m ku mukino atsinda ikigereranyo cy'amanota 17 no gufata imipira (rebounds) 9.2 mu mikino 1,226 ya shampiyona yakinnye mu makipe atanu ya NBA arimo na Chicago na San Antonio.

Murumuna we Marc Gasol na we wavukiye agatangira gukina muri Barcelona ya Basketball akimukira i Memphis n'ababyeyi be ubwo mukuru we yari agiye gukinirayo ndetse na we nyuma agakina muri iyo kipe, ubu we ageze mu ikipe ya Los Angeles Lakers.

Ikipe ya FC Barcelona y'umupira w'amaguru nayo, yahise igaragaza ibyishimo byo kuba Pau Gasol yaje mu ikipe yabo ya Basketball.