COVID-19: urukingo Sputnik V rwo mu Burusiya ngo rugeza ku rugero rwa 92%

Ikinyamakuru gitangaza inkuru z'ubushakashatsi, The Lancet, cyatangaje ko ikiciro giheruka cy'igerageza cyerekanye ko urukingo Sputnik V rwo mu Burusiya rurinda indwara ya Covid-19 ku rugero rwa 92%.

Hatangajwe kandi ko nta kibazo rutera ubuzima bw'abaruhawe ngo ndetse runabarinda urupfu no kuba bajyanywa mu bitaro kubera iyi ndwara.

Uru rukingo rwabanje guteza impaka nyuma yaho rutangiye gutangwa amakuru ajyanye n'igerageza ryarwo rya nyuma atarashyirwa ahagaragara.

Ariko abashakashatsi bavuga ko ubu noneho akamaro karwo kerekanwe.

Ruje rusanga izindi nkingo zarangije kwemerwa zirimo Pfizer, Oxford/AstraZeneca, Moderna na Janssen.

Urukiko rwa Sputnik rukora mu buryo busa n'urwa Oxford/AstraZeneca rwakorewe mu Bwongereza n'urwa Janssen rwakorewe mu Bubirigi.

Rukoresha ubwoko bw'agakoko gatera grippe kambuwe ubukana kugirango katangiza ubuzima.

Kakaba kinjiza mu mubiri agace gatoya cyane ka coronavirus.

Ibi bituma umubiri mu buryo butawangije, uhura n'agace ndangamimerere gatoya ka coronavirus maze ukabasha kumenya ko utewe ugahita wirinda mu buryo budashobora gutuma umuntu arwara.

Iyo muntu amaze gukingirwa, umubiri utangira gukora abasirikare bawurinda indwara ya Covid-19.

Ibi rero bisobanuye ko umubiri uba utojwe ukuntu uzitwara n'uhura n'iyi ndwara.

Uru rukingo rushobora kubikwa mu bukonje buri hagati y'ibipimo 2 na 8 Celcius (firigo isanzwe ifite ibipimo 3 na 5 Celcius) ku buryo kurutwara no kurubika byoroshye.

Urukingo rwa kabiri ntirutangwa nk'izindi

Ugereranyije n'izindi nkingo zo mu bwoko bumwe, umuntu ahabwa inkingo ebyiri za Sputnik V zitandukanye gatoya; hagashira iminsi 21 hagati yazo.

Zombi zibasira amahembe y'agakoko gashya ka Corona ariko zigakoresha uburyo butandukanye mu guhangana nako.

Ibi bikorwa kubera ko gukoresha uburyo bubiri budasa biha imbaraga abasirikare barinda umubiri kurusha gukoresha uburyo bubiri busa - ibi bikaba ngo bishobora gutuma urukingo rurinda umuntu igihe kirekire.

Usibye kwerekana ko rukora, amagerageza yasanze uru rukingo nta n'ikibazo ruteye cyangwa se ngo abaruhawe rubagaruke.

Ubundi bisanzwe byitezwe ko inkingo zose zishobora kugwa nabi abazihawe.

Ariko uko kugwa nabi kuba koroheje ku buryo ibyo umuntu ashobora guhura nabyo nyuma yo kuruhabwa harimo kubabara mu kaboko katewemo urukingo, kugira umunaniro cyangwa se kugira umuriro udakabije.

Kandi mubaruhawe nta numwe wapfuye cyangwa ngo arware cyane.

Usibye mu Burusiya, uru rukingo rurimo gukoreshwa mu tundi duce tw'isi nka:

Argentina

Intara z'abanyapalesitina

Venezuela

Hungary

UAE

Irani

Abanditse iyi nyandiko yo mu kinyamakuru The Lancet bavuga ko amagerageza yibanze ku bafite ibimenyetso by'indwara ya Covid-19, ko rero hakenewe no kumenya niba uru rukingo rushobora gukora ku bantu batagaragaza ibimenyetso cyangwa se niba rushobora kubuza abakingiwe kuba bakwanduza abandi.