CECAFA: amarushanwa ku batarengeje imyaka 17 abaye mu bibazo bya Covid

Amakipe yo bihugu 6 byo muri Afurika y'Iburasirazuba ateraniye mu Rwanda ahariko harabera irushanwa ry'umupira w'amaguru rya CECAFA ku batarengeje imyaka 17.

CECAFA ivuga ko iryo rushanwa ririmo u Rwanda, Kenya, Uganda, Tanzania, Ethiopia na Djibouti ryahuye n'ibibazo byo gukinwa mu bihe bidasanzwe by'iki cyorezo cya Covid19.

Ni imikino ikinwa nta bafana bemerewe kwinjira ku kibuga ku mpamvu zo kwirinda iki cyorezo.

U Burundi buri mu bihugu bititabiriye iri rushanwa kubera impamvu za politike ziri hagati yabwo n'u Rwanda, nk'uko bivugwa na CECAFA.

Nk'uko Ishyirahamwe ry'umupira w'amaguru muri Afurika y'Iburasirazuba no Hagati (CECAFA) ribitangaza, amarushanwa yatangiye mu ngorane nyinshi zatewe n'icyorezo cya Covid19.

Ibi vyatumye umukino wo gutangiza irushanwa ku munsi wo kuwa gatandatu hagati y'u Rwanda na Tanzania usubikwa ku mpamvu y'uko ibisubizo by'ibipimo bya Covid19 byakorewe abakinnyi byari bitarasohoka.

Iyo mpamvu ni nayo yatumye umukino wo ku cyumweru hagati ya Kenya na Ethiopia nawo utangira ukerereweho isaha yose.

Umunyamabanga mukuru wa CECAFA Bwana Auka Gecheo avuga ko iri rushanwa ryatangiranye ingorane zitewe na COVID19 ariko ko ibibazo byari byagaragaye byakemutse.

Ati: "Amategeko ya CAF ateganya ko amakipe agomba kupimwa mu masaha 48 mbere y'umukino, niyo mpamvu umukino wo kuwa gatandatu twawusubitse".

"Ibipimo bya Covid19 ku bakinnyi ba Kenya na Etiyopiya nabyo byatinze kuko bigomba kubanza koherezwa ahantu hatandukanye, ntitwifuza kandi kurenga ku mategeko y'igihugu''.

CECEFA yategetse kandi ko amarushanwa yabera mu mujyi umwe wa Rubavu, mu gihe mbere byari biteganyijwe ko amakipe amwe azakinira no mu mujyi wa Huye.

Gecheo yagize ati: "Wibuke ko amakipe yose yafashwe ibipimo bya COvid19, twifuje ko abakinnyi baguma mu mahoteli yabo aho gukomeza kujarajara hirya no hino".

"Uko bahinduye aho babaga niko bisaba kongera kubapimisha, niyo mpamvu twifuje ko bazakinira hano kugera ku mukino wa nyuma''.

Ikipe ya Sudan y'amajyepfo yakuwe mu irushanwa nyuma y'uko abakinnyi bayo bakorewe ibizamini (MRI TEST) bikagaragaza ko 4 muri bo barengeje imyaka 17.

Ku cyumweru mu mukino ufungura, Kenya yanganyije na Ethiopia 2-2 mu itsinda ririmo n'ikipe ya Uganda. Kuri uyu wambere ikipe y'u Rwanda irahura ni iya Tanzania mu itsinda B ririmo na Djibuti.

Umukino wa nyuma utegenyijwe kuzakinwa ku itariki 22 z'uku kwezi kwa 12.

Umunyamabanga mukuru wa CECAFA avuga ko Uburundi bwanse kuza kubera impamvu za politiki hagati yabwo n'u Rwanda, Sudani ya Ruguru ikaba nta mpamvu yatanze, nayo Eritrea ikaba itayitabiriye kuko imipaka yayo n'ibibuga by'indege bifunze.