Paul Rusesabagina: Ibyo wamenya kuri 'commission rogatoire' ivugwa mu rubanza rwe

Insiguro y'amajwi, Paul Rusesabagina: Ibyo wamenya kuri 'commission rogatoire' ivugwa mu rubanza rwe
Yatangajwe

Mu kiganiro n'abanyamakuru ku wa kane, Vincent Lurquin uvuga ko asanzwe yunganira Paul Rusesabagina mu Bubiligi yavuze ko aheruka mu Rwanda gusaba kubonana no kunganira umukiliya we akabyangirwa.

Lurquin yavuze ko anenga urugaga rw'abunganizi mu mategeko mu Rwanda, kuba barimye uburenganzira mugenzi wabo wo mu Bubiligi ngo yunganire umukiliya we.

Rusesabagina yunganirwa n'abanyamategeko babiri ubushinjacyaha bw'u Rwanda buvuga ko ari abo yahisemo, ariko batemerwa n'umuryango we.

Umuryango wa Rusesabagina wo wamuhitiyemo itsinda ry'abanyamategeko barindwi barimo n'Umunyarwanda Me Gatera Gashabana, ariko bangiwe n'u Rwanda kumwunganira.

Mu ntangiriro y'uku kwezi, urukiko rwategetse ko Rusesabagina akomeza gufungwa by'agateganyo iminsi 30 mbere y'urubanza rwe mu mizi.

Aregwa ibyaha 13 bishingiye ku bitero byiciwemo abantu byakozwe n'umutwe w'inyeshyamba wa FLN, ibyaha mu rukiko atigeze yemera cyangwa ngo ahakane.

Bwana Rusesabagina yamenyekanye ku isi nyuma yo gushingirwaho inkuru ya filimi Hotel Rwanda y'abemeje ko yabarokoye muri Hôtel des Mille Collines muri Jenoside yo mu Rwanda.

Me Lurquin yavuze ko Rusesabagina aho afungiye yanditse ibaruwa avuga ko abunganizi ashaka ari Me Gatera Gashabana na we.

BBC ntiyabashije kugenzura ukuri kw'ibivugwa n'uyu mwunganizi kuri izi ngingo, yagerageje kandi kuvugisha Me Gashabana, kugeza ubu ntibirashoboka.

'Commission rogatoire'

Muri icyo kiganiro cyo ku wa kane, Me Lurquin yagize ati: "Turi kwitegura ngo dusubireyo mu byumweru bibiri turi kumwe na 'commission rogatoire' twongere dusabe kubona Rusesabagina no kumwunganira nk'uko abishaka."

None 'commission rogatoire' ni iki? Ifite ubuhe bubasha?

Ernest Sagaga, impuguke mu mategeko uba mu Bubiligi, avuga ko ako kanama kadashobora kunganira Paul Rusesabagina.

Avuga ko ari uburyo bw'imikoranire bw'inzego z'ubucamanza hagati y'ibihugu.

Ni mu kiganiro Bwana Sagaga yagiranye na Florentine Kwizera wa BBC Gahuzamiryango, mushobora kumva mukanze aho hejuru ku ifoto.