Perezida wa Barcelona avuga ko 'bitakunda' kugura Neymar muri iki gihe cya Covid-19

Inyandiko gusa
Miralem Pjanic na Cristiano Ronaldo

Ahavuye isanamu, Getty Images

Insiguro y'isanamu, Miralem Pjanic, uri ibumoso bwa Cristiano Ronaldo muri iyi foto. Byari biteganyijwe ko yerekeza muri Barcelona avuye muri Juventus, nyuma yo kwegukana igikombe cya kane cya shampiyona ya Serie A ari kumwe nayo
Yatangajwe

Perezida Josep Maria Bartomeu w'ikipe ya Barcelona avuga ko "bitakunda" ko iyi kipe yongera kugura Neymar akava muri Paris St-Germain bitewe n'uko ubukungu buhagaze muri iki gihe.

Yavuze ko no kugura rutahizamu Lautaro Martinez muri Inter Milan nabyo byagizweho ingaruka.

Bartomeu yabwiye ikinyamakuru Sport cyo muri Espanye ko hagati y'ukwezi kwa gatatu n'ukwa gatandatu uyu mwaka, amafaranga Barça yateganyaga kwinjiza yagabanutseho miliyoni 200 z'ama-euro.

Yagize ati: "Amakipe yose akomeye y'i Burayi yagizweho ingaruka. Ibi ntibizamara umwaka umwe, ahubwo [bizamara] itatu cyangwa ine".

Neymar, Umunya-Brazil w'imyaka 28 y'amavuko, yageze muri PSG mu kwezi kwa munani mu 2017 aguzwe miliyoni 222 z'ama-euro - ya mbere menshi ku isi yari aguzwe umukinnyi w'umupira w'amaguru.

Ariko Barcelona yari yagerageje kongera kumugura ku mpeshyi ishize.

Bartomeu yagize ati: "[Kugura] Neymar? Muri iki gihe, ntibyakunda".

"Na PSG ntabwo ishaka kumugurisha".

Skip Ibisomwa cane and continue reading
Ibisomwa cane

End of Ibisomwa cane

"Barça yavuganye na Inter ku bijyanye na Lautaro, ariko ibiganiro byarahagaze. Uko ibintu bimeze ubu ntabwo byemerera gushora imari itubutse".

Neymar

Ahavuye isanamu, Getty Images

Bartomeu yakomeje asobanura ko Barcelona yahombye miliyoni 200 z'ama-euro hagati y'ukwezi kwa gatatu n'ukwa gatandatu uyu mwaka.

Yongeyeho ati: "Mu mwaka wa 2020-21 twari twiteze kwinjiza miliyari 1,1 z'ama-euro, ariko tuzinjiza 30% by'ayo".

Ati: "Niba uko iki cyorezo [cya coronavirus] kimeze bitagenze neza, nta bareba umupira ku kibuga bazabaho, nta basura inzu y'amateka y'ikipe, nta maduka acuruza [iby'ikipe] azafungura kandi hazakomeza kubaho igihombo cy'amafaranga".

"Bituma tugomba kutajenjeka na busa mu buyobozi: tugomba kugenzura tukareba ishoramari ry'ingenzi n'irishobora kuba ritegereje".

Imyitwarire ya Arturo Vidal iri kwigwaho

Bartomeu yanemeje amakuru yuko iyi kipe yatangije ingamba zijyanye n'imyitwarire ku mukinnyi wo hagati Arturo Vidal, kubera ko atagarutse mu ikipe nyuma yo gusoza ibiruhuko.

Uyu agiye kwerekeza muri Juventus, bijyanye n'amasezerano yo kugurana abakinnyi arimo na Miralem Pjanic, umukinnyi wo hagati ukomoka muri Bosnia ukinira Juventus.

Yagize ati: "Twumvikanye ko mbere yuko Champions League irangira, azakomeza gukinira Barça. Ashobora kudufasha".

Bartomeu, Perezida wa Barça guhera mu mwaka wa 2014, yagize ati:

"Ariko ntiyagarutse nyuma y'ikiruhuko kigufi cye, rero twamutangijeho dosiye".