Coronavirus - Amakuru: Umuti wa US ugiye kugera ahandi, OMS yahuye n’abavuzi gakondo ba Africa

Gilead Sciences, kompanyi yakoze umuti wa remdesivir uri kwifashishwa mu kuvura coronavirus yasinye amasezerano na kompanyi eshanu zikora imiti mu Buhinde na Pakistan azemerera gukora no gucuruza uyu muti mu bindi bihugu 127 ku isi.

Iyi kompanyi ivuga ko ibi bizatuma uyu muti ugera mu bihugu bikennye, ibifite ubukungu buciriritse n'ibikize.

Muri uku kwezi Amerika n'Ubuyapani byemeje gukoresha umuti wa remdesivir mu kuvura Covid-19.

Kugeza ubu ariko ishami rya UN rishinzwe ubuzima ku isi WHO/OMS ntabwo riremeza ikoreshwa ry'uyu muti cyangwa undi wose uvura coronavirus.

Inganda nyinshi zikora imiti ziri guhiganira gukora umuti cyangwa urukingo byo kurwanya iki cyorezo.

Ibindi kuri uyu muti wa remdesivir wabisoma hano

===

US iracyakomerewe

Leta zunze ubumwe za Amerika zikomeje gushegeshwa, mu masaha 24 ashize muri iki gihugu nibwo hapfuye abantu benshi 1,894 bazize iki cyorezo, bose hamwe bamaze kuba 82,339 nk'uko bivugwa na kaminuza ya Johns Hopkins.

Uku kuzamuka gukomeye kw'imibare y'abapfuye ku munsi umwe kwatunguranye kuko iyi mibare yari yagabanutse igera munsi ya 1,000 ku cyumweru no kuwa mbere.

Leta zunze ubumwe za Amerika zimaze kubona abantu 1,369,386 banduye Covid-19 kugeza ubu.

====

OMS mu nama n'abavuzi gakondo ba Africa

Ntibisanzwe kuko iri shami ry'umuryango w'abibumbye ubundi ritemera imiti ya gakondo kuko ritayigenzura, gusa iyi miti ifite uruhare runini mu buvuzi muri Afurika.

Ibiro bya OMS/WHO muri Afurika byatangaje ko byakoranye inama ku ikoranabuhanga n'abavuzi gakondo 70 bo mu bihugu bitandukanye bya Afurika.

Iri shami rivuga ko ryaganiriye n'izo nzobere mu buvuzi gakondo mu kureba uko ubu buvuzi bwahangana na Covid-19.

Iri shami rivuga ko aba bavuzi bemeye ari benshi ko "amagerageza ya siyansi akwiye gukorwa ku miti yose gakondo, nta rengayobora".

Ibi bibaye nyuma y'uko Madagascar inengwa na OMS kuba iri kwamamaza umuti wa Covid-Organics, yo ivuga ko utakorewe igerageza ry'ubuhanga ngo wemezwe.

Perezida wa Madagascar yemeza ko uyu muti uvura kandi bawugeragereje ku barwayi, ndetse bakomeje kuwugeza ku bindi bihugu bya Afurika biwifuza, kandi ko "nta uzabahagarika".

Kugeza ubu muri Afurika hamaze kubona abantu 68,102 banduye coronavirus mu bihugu 53, abo imaze kwica ni 2,340 naho abayikize ni 23,307 nk'uko bivugwa n'ikigo cy'ubumwe bwa Afurika gishinzwe kurwanya ibyorezo.

Iyi mibare yikubye kabiri mu byumweru bibiri bishize kuko tariki 28 z'ukwezi gushize kwa kane abanduye muri Afurika bari 33,566 abo yishe ari 1,469 naho abayikize bari 10,152.

Ibihugu bitandukanye bya Afurika bikomeje koroshya ingamba byari byarafashe zo guhagarika ibikorwa bitandukanye by'ubuzima busanzwe mu kwirinda ikwirakwira ry'iki cyorezo.

=====

Yakize Covid-19 ku myaka 113

Umukecuru w'imyaka 113 - bivugwa ko ariwe muntu mukuru muri Espagne - yakize iki cyorezo yari amaze iminsi arwaye nk'uko abategetsi babitangaza.

Maria Branyas bamusanzemo iyi ndwara nyuma gato y'uko iki gihugu kinjiye mu bihe bidasanzwe byo guhagarika ibikorwa byose mu gihugu.

Nyuma y'ibyumweru ari mu kato, afite ibimenyetso bimwe na bimwe nabwo byoroheje by'iyi virus, Maria yarakize.

Maria yabayeho no mu gihe cy'icyorezo cy'ibicurane kibasiye isi mu 1918-19, mu ntambara y'imbere muri Espagne mu 1936-39 ubu akaba arokotse na coronavirus.

Umukobwa we yatangaje kuri Twitter ko nyina ubu ameze neza.

Maria yavukiye muri Mexico mu 1907 ajya kuba muri Amerika n'umuryango we akiri umwana.

Mu ntambara ya mbere y'isi nibwo yaje kuba muri Espagne muri Catalan azanye na se wari umunyamakuru w'umusipanyole.

Yabyaye abana batatu - umwe muri bo aherutse kuzuza imyaka 86 - afite abuzukuru 11 - umukuru muri bo afite imyaka 60 - afite n'abuzukuruza 13.

Umwaka ushize yabwiye ikinyamakuru La Vanguaridia ati: "Nta kintu nakoze nabayeho gusa".

====

Abakozi ba Twitter bazakorera iwabo "iteka"

Niba ukorera Twitter ushobora kutazasubira kukazi na rimwe.

Iyi kompanyi ifite ikicaro i San Francisco, ivuga ko abakozi bayo bagera ku 5,000 kuva mu kwezi kwa gatatu bakorera mu ngo zabo.

Ibi ngo byagenze neza ku buryo ivuga ko yifuza ko bizakomeza - igihe inshingano zabo zibibemerera.

Umuyobozi wayo Jack Dorsey yandikiye abakozi kuri e mails zabo ati:

"Niba rero abakozi bacu bari mu nshingano n'uburyo bibemerera gukorera mu rugo kandi bakaba bashaka gukomeza gutyo iteka ryose, tuzabikora".

Twitter ifite ibiro 35 ahantu hatandukanye ku isi.

Kompanyi za Facebook na Google nazo zamaze gutegeka abakozi bazo benshi gukorera iwabo muri uyu mwaka wose wa 2020.