Polisi y'Amerika mu iperereza ku mwirabura watawe muri yombi hanze y'ibitaro ari kuri 'serumu'
Ahavuye isanamu, Getty Images
Polisi yo muri Amerika iri gukora iperereza ku itabwa muri yombi ry'umurwayi w'umwirabura muri leta ya Illinois wafungiwe hafi y'ibitaro mu gihe yari ari kuri serumu (sérum).
Shaquille Dukes avuga ko yari arimo agendagenda nkuko yari yabibwirijwe n'umuganga, ariko agahita atabwa muri yombi nyuma yaho umuzungu ushinzwe umutekano yari amushinje kugerageza kwiba imashini ya serumu ngo ayigurishe ku rubuga rwa interineti rwa eBay.
Bwana Dukes w'imyaka 24 y'amavuko ukomoka i Chicago, ubu yamaze gutanga ikirego mu rukiko avuga ko yakorewe ivanguramoko.
Polisi yo mu karere ka Freeport ivuga ko abapolisi "bagerageje kubyitwaramo neza uko bashoboye kose", ariko ivuga ko yatangije iperereza ridafite uruhande ribogamiyeho.
Ibitaro byo muri ako karere byanze kugira icyo bitangaza ku byabaye, bivuga ko iyo dosiye ubu iri mu maboko ya polisi.
Ibyo byabaye ku itariki ya 9 y'ukwezi gushize kwa gatandatu, nuko iyo nkuru isakara muri Amerika ejo ku wa mbere nyuma yo gutangazwa n'ibitangazamakuru byo muri iki gihugu.
Polisi ibivugaho iki?
Ejo ku wa mbere, polisi yo mu karere ka Freeport yabwiye ibitangazamakuru byo muri iki gihugu ko umupererezi wigenga ari we uzagenzura niba abapolisi barataye muri yombi uwo mugabo mu buryo bukwiye.
Polisi yasabye rubanda kuba iretse kwihutira kunenga abo bapolisi, ikarindira imyanzuro izava muri iryo perereza ryigenga.
Todd Barkalow, umukuru wa polisi, yabwiye televiziyo ABC ko basanze Bwana Dukes "bidashoboka ko yari arimo kugerageza kwiba umutungo [w'ibitaro]", ariko ko we n'abandi bagabo babiri batawe muri yombi "kubera kwitwara nabi" ku muntu ushinzwe umutekano.
Polisi yatangaje videwo ifatwa na kamera (camera) iba iri ku mubiri w'umupolisi, ivuga ko iyo videwo igaragaza ko abapolisi "bagerageje kubyitwaramo neza uko bashoboye kose... urebye ibihe bari barimo".
Abategetsi babwiye ABC ko Bwana Dukes atari yahawe uruhushya rwo "kuva mu bitaro mu gihe yari akiri kuri serumu".
Ibitangazamakuru byo muri Amerika bitangaza ko biteganyijwe ko Bwana Dukes yitaba urukiko mu kwezi gutaha kwa munani.
