Coronavirus -Amakuru: US yarenze miliyoni y'abanduye, uwitwa Tupac Shakur yararenganye...

Muri leta zunze ubumwe za Amerika hamaze kwandura abantu miliyoni imwe irenga, iki cyorezo kimaze kwicayo abarenga 58,000, Vietnama iri gutsinda Covid-19,muri Malawi baraha amafaranga abazahaye, ikibuye gisa n'icyambaye 'mask' kiraca hafi y'isi.

Malawi iraha 'cash' abaturage bazahaye

Perezida Peter Mutharika wa Malawi yatangaje ko abaturage bagizweho ingaruka kurusha abandi na Covid-19 bagiye gutangira kuboherereza amafaranga yo kubagoboka.

Ingo zizatoranywa nk'izibikwiye zizajya zihabwa amakwaca ya Malawi 35,000 ($47) ku kwezi uhereye mu kwezi gutaha kwa gatanu.

Ibi byatangajwe nyuma y'uko urukiko rukuru muri Malawi rwongereye igihe icyemezo kibuza guverinoma guhagarika ubuzima busanzwe (lockdown) mu byumweru bitatu.

Imiryango iharanira uburenganzira bwa muntu ivuga ko abakene cyane ubuzima bwabo bushobora kujya mu kaga kubera ingamba zo kwirinda iki cyorezo.

Muri Malawi hamaze kuboneka abantu 36 banduye coronavirus, harimo batatu yishe.

Museveni aragaya abadepite kwiha miliyoni $2,6 y'ubukangurambaga

Perezida Yoweri Museveni wa Uganda yanenze abadepite kubera kwigenera miliyari 10 z'amashilingi (miliyoni $2,6) yo gukora ubukangurambaga kuri Covid-19.

Bwana Museveni yavuze ko "biteye agahinda" kuba abadepite bigenera amafaranga aho kuyagenera uturere bahagarariye ngo tube ari two tubikora.

Yavuze ko ari bwandikire umugenzuzi w'imari ya leta ngo akore iperereza ku buryo abadepite bamaze gukoresha ayo mafaranga.

Muri Uganda hamaze kuboneka abantu 79 banduye coronavirus. Iki gihugu cyahagaritse ubuzima busanzwe kugeza tariki 05 z'ukwezi gutaha.

Qatar yahaye u Rwanda toni 15 z'ibikoresho byo kurwanya coronavirus

Uyu munsi leta y'u Rwanda yakiriye inkunga ya Qatar y'ibikoresho byo kurwanya iki cyorezo bifite uburemere bwa toni 15 birimo udupfukamunwa, uturindantoki, n'ibikoresho byo gupima icyo cyorezo.

Qatar yahaye inkunga nk'iyi ibindi bihugu birimo Algeria na Nepal.

Mu Rwanda minisiteri y'ubuzima ivuga ko hamaze kuboneka abantu 212 banduye iki cyorezo, muri bo 95 bamaze kuyikira, ntawe irica.

Ikibuye cyambaye 'mask' kiraca hakurya y'isi

Ikibuye cyo mu bwoko bwa 'asteroid' biteganyijwe ko uyu munsi kuwa gatatu gica hakurya y'isi.

Iki kibuye cyahawe izina rya 1998 OR2 kiraca ku ntera ya kilometero miliyoni 6,3 uvuye ku isi. Iyi ntera ni inshuro 16 z'intera yo kuva hano kugera ku kwezi. Ntabwo ari hano hirya.

Abahanga mu by'isanzure bavuga ko iki kibuye, gifite umurambararo wa 2,4Km, nta kibazo giteje isi.

Bavuga ahubwo batebya ko ari "umushyitsi mwiza" muri iyi minsi kuko iki kibuye kiboneka nk'icyambaye agapfukamunwa 'mask' kubera amabuye mato n'umukungugu bigikikije.

Abamaze gupfa muri Brazil ubu bararuta abo mu Bushinwa

Muri Brazil ubu harabarurwa bantu barenga 5,000 bamaze kwicwa na coronavirus, imibare ubu irenze iy'Ubushinwa.

Minisiteri y'ubuzima muri Brazil yatangaje ko mu masaha 24 ashize habonetse abantu 474 bishwe n'iki cyorezo, imibare ihita igera ku 5,017.

Brazil nicyo gihugu kizahajwe cyane na coronavirus muri Amerika y'Epfo, gifite abamaze kandura basatira 72,000.

Mu Bushinwa, aho iyi ndwara yatangiriye mu mpera z'umwaka ushize, imaze kwica abantu 4,633.

Uwitwa Tupac Shakur yasabye gufashwa bagirango arabeshya

Guverineri wa leta ya Kentucky yasabye imbabazi umuturage witwa Tupac Shakur kuba baratekereje ko yanditse asaba ubufasha kuri iri zina bakagira ngo ari kubeshya.

Guverineri Andy Beshear yabwiye abanyamakuru ati: "Twabonye umuntu usaba gufashwa kubera ubushomeri mu izina rya Tupac Shakur, batekereje ko ari umuntu uri kubeshya".

Gusa uyu mugabo uhuje amazina n'umuraperi w'icyamamare wapfuye mu 1996, we yitwa Tupac Malik Shakur.

Yavuze ko yasabye gufashwa tariki 13/03/2020 kubera gutakaza akazi muri iki cyorezo.

Tupac yabwiye ikinyamakuru Lexington Herald-leader ati: "Nararenganye cyane. Iri ni izina ryanjye".

Vietnam iri gutsinda Covid-19

Mu minsi 13 ikurikirana ishize nta muntu wanduye coronavirus wabonetse muri Vietnam nk'uko abategetsi baho babivuga.

Muri iki gihugu hamaze kwandura abantu 270, ntawe iyi ndwara irica mu baturage miliyoni 95 batuye iki gihugu.

Muri Vietnam, ikigereranyo cy'abanduye ku baturage b'igihugu kiri mu biri hasi cyane ku isi.

Minisitiri w'intebe Nguyen Xuan Phuc ejo kuwa kabiri yatangaje ko Vietnam iri gutsinda iki cyorezo ariko asaba abaturage gukomeza kuba maso.

Vietnam ntabwo yapimye abantu benshi cyane nka Korea y'Epfo cyangwa Ubudage ariko yakajije ingamba zo guhagarika ubuzima busanzwe no gufunga imipaka n'ibihugu bituranyi birimo Ubushinwa.

Kuva mu cyumweru gishize, batangiye koroshya ingamba zari zarafashwe.

Abanyamerika bamaze gupfa baruta abapfuye mu ntambara ya Vietnam

Abanyamerika barenga 58,000 bamaze kwicwa n'iyi virus mu mezi macye ashize bararuta abantu bapfuye mu gihe cy'imyaka hafi 20 y'intambara muri Vietnam.

Ibi birasobanura ibyago bikomeye iki cyorezo cyateye leta zunze ubumwe za Amerika.

Dr Anthony Fauci, umwe mu bajyanama mu biro bya perezida wa Amerika yaburiye ko hakiri igihe ngo iki cyorezo kirangire.

Avuga ko bishobora kugera mu mpera z'uyu mwaka kikibasiye abantu niba abahanga batabonye umuti.

Dr Fauci avuga ko byanze bikunze iyi virus izagaruka ndetse kugeza mu mpeshyi bwo ntaho izaba yaragiye.

Trump avuga Amerika igiye kujya ipima abantu miliyoni 5 ku munsi

Leta zunze ubumwe za Amerika ubu zirabarura abantu barenga miliyoni imwe banduye coronavirus, kimwe cya gatatu cy'abayanduye bose ubu ku isi.

Impamvu iki gihugu gifite imibare minini y'abanduye ni uko gifite abaturage benshi (miliyoni 330) kandi kikaba gipima benshi.

Mu mezi abiri ashize muri Amerika bapimye abantu bagera kuri miliyoni 5,7 nk'uko umushinga wa Covid Tracking Project ubivuga.

Ni imibare yumvikana ko ari myinshi, ariko igitangazamakuru cy'ubushakashatsi Our World in Data kivuga ko Amerika imaze gupima abaturage 16 ku 1,000 inyuma y'Ubutaliyani bumaze gupima abaturage 30 ku 1,000.

Perezida Donald Trump yatangaje ko bateganya kongera umubare w'abapimwa bakagera kuri miliyoni eshanu ku munsi, ati: "turabigeraho vuba cyane".

Ababikurikirana bavuga ko bishobora kuko ubu amakuru agaragaza ko muri Amerika basuzuma abantu 200,000 buri munsi.