Mae'r ail hanner wedi dechrau, gyda Carrie Jones yn dod i'r cae yn lle Ffion Morgan.

A fyddwn yn gweld newid i siâp tîm Cymru?

Does dim eilyddion hanner amser gan y tîm cartref.

Gwennan Harries
Cyn-ymosodwr Cymru ar BBC Match of the Day Wales

O'r ystadegau gallwch weld eu bod wedi cael 17 cyffyrddiad yn ein cwrt cosbi, ac rydym wedi caniatáu'r parch hwnnw iddynt.

Dyna pryd rydym wedi edrych yn nerfus iawn wrth amddiffyn.

Byddech chi'n tybio y bydd Cymru'n ddigon bodlon gyda'r sgôr, o ystyried sut y dechreuon nhw.

Mae'n gêm gyffrous hyd yma, gyda gôl dda gan Hannah Cain yn uchafbwynt i dîm Rhian Wilkinson.

Ffynhonnell y llun, CBDC

Rhiannon Roberts sy'n llwyddo i glirio croesiad arall gan Y Weriniaeth Tsiec.

Mae amddiffynwyr Cymru wedi bod yn agos at gael eu dal allan ar sawl achlysur.

Cafodd ymdrech Ffion Morgan ei hatal, ac yna fe wnaeth mellten o ergyd gan Angharad James daro'r trawst.

Kath Morgan
Cyn-gapten Cymru ar BBC Radio Cymru

Symudiad clyfar iawn gan Gymru, ond mae'r cyfan yn deillio o basio cywir. Roedd y chwarae yn arwain at y gôl yn arbennig.

Croesiad gwych gan Lily Woodham, Hannah Cain yn y lle iawn ac yn ei rhoi i gefn y rhwyd, pêl-droed syml iawn, ond effeithiol iawn.

Pam mae wedi cymryd 30 munud i ni weld hyn gan Gymru?

Gôl hyfryd gan Hannah Cain hynny o ergyd gyntaf Cymru at y gôl.

Fe wnaeth Cymru symud y bêl yn llydan i Lily Woodham, a hithau'n croesi’n i Hannah Cain, a dderbyniodd y bêl yn daclus a'i tharo i gefn y rhwyd.

Dyna hwb enfawr i Gymru.

Mae torf fawr yn stadiwm Městský fotbalový i gefnogi'r Weriniaeth Tsiec, sydd erioed wedi cyrraedd rowndiau terfynol un o'r prif bencampwriaethau rhyngwladol.

Ond cefnogwyr Cymru sydd i'w clywed yn y stadiwm yn ôl Gareth Vincent, gohebydd BBC Cymru.

Sut fydd Cymru’n ymateb ar ôl ildio gôl gyntaf y gêm?

Kath Morgan
Cyn-gapten Cymru ar BBC Radio Cymru

"Bydd Cymru yn siomedig iawn eu bod nhw wedi ildio o gic cornel.

"Roedd hi'n gic cornel hir, ond doedd neb yn cystadlu amdani, neb yn gwylio'r bêl, ac mae'n disgyn iddyn nhw, a dy'n ni ar ei hol hi.

"Roedd hi'n llanast llwyr yn y cefn gan Gymru."

Y tîm cartref sydd wedi mynd ar y blaen, a hynny trwy gôl Eva Bartoňová.

Daeth y gôl yn dilyn camgymeriadau di-ri gan amddiffyn Cymru, gan fethu clirio'r bêl o gic cornel. Bydd Rhian Wilkinson yn hynod siomedig ag ildio'r gôl yna.

Yn siarad ar BBC Radio Wales, dywedodd Helen Ward, cyn-ymosodwr Cymru, bod angen trio peidio meddwl am waddol Fishlock heno.

"Mae Jess Fishlock yn sicr yn sgidiau mawr i'w lenwi i'r tîm, ond mae'n rhaid iddyn nhw roi hynny i un ochr. Er ei bod hi'n eistedd ar y fainc heno, dydi hi ddim ar y cae ac mae'n rhaid i'r garfan symud ymlaen.

"Mae'n rhaid i ni fel cenedl wneud hynny hefyd - mae'n mynd i fod yn anodd oherwydd roedd hi'n dod â chymaint i'r tîm."

Ffynhonnell y llun, CPDC

Gwaith gwych gan Ceri Holland gyda rhediad egnïol yna'n croesi, ond all Hannah Cain ddim cyrraedd y bêl.

Cymru yn ennill cic gornel gyntaf y gêm.

Mae Cymru wedi dechrau'r gêm yn llawn egni, a Kath Morgan yn falch o weld y tîm yn cychwyn yn gryf:

"Mae'r gêm agoriadol mor bwysig.

"Mae'n gosod ein, stamp a'n dangos beth rydym ni'n gallu ei wneud".

Ar bapur, gêm agoriadol Cymru fydd yr anoddaf yn y grŵp.

Mae'r Weriniaeth Tsiec yn safle 31 yn y byd ar restr detholion Fifa – un lle yn uwch na Chymru – tra bod Albania yn safle 71 a Montenegro, y mae tîm Wilkinson yn eu hwynebu yn Llanelli ddydd Sadwrn, yn safle 84.

Dydy Cymru ddim wedi chwarae ers buddugoliaeth gyfeillgar o 3-2 dros Y Swistir ym mis Rhagfyr a ddaeth â rhediad o 12 gêm heb fuddugoliaeth i ben.

Wrth i'w chwaraewyr geisio adeiladu ar y fuddugoliaeth honno, dywedodd Wilkinson fod Cymru'n disgwyl "brwydr fawr" yn erbyn y Tsieciaid.

"Mae'n ymwneud â ni, ein perfformiad a sicrhau ein bod wedi gwella oherwydd ein blwyddyn heriol y llynedd," meddai.

"Mae gennym ni chwe gêm, rydyn ni eisiau gorffen ar frig y grŵp, felly un cam o flaen y llall. Dydyn ni ddim wedi bod gyda'n gilydd ers cryn dipyn, ond dw i'n disgwyl i'r tîm hwn ddechrau ar unwaith ac dw i wedi dweud hynny wrthyn nhw."

Ffynhonnell y llun, FAW

Owain Llyr a Kath Morgan sy'n sylwebu ar BBC Radio Cymru heno. Maen nhw'n yn eu seddi ac yn barod am yr ornest yn Uherské Hradiště.

Gwrandewch yn fyw ar frig y dudalen yma.

Mae'r ddau dîm bellach ar y cae yn cynhesu cyn y chwiban gyntaf.

Bydd Cymru'n chwarae yn eu crysau oddi cartref.

Mae un gêm wedi ei chynnal yn Grŵp B1 yn barod heddiw, gydag Albania'n curo Montenegro.

Yr ymosodwr Megi Doçi wnaeth sgorio'r ddwy gôl dros yr ymwelwyr i gipio'r fuddugoliaeth.

Ffynhonnell y llun, Getty Images

Mae'r gêm yn cael ei chynnal yn Stadiwm Miroslav Valenta, yn nhref Uherské Hradiště.

Dyma gartref yn FC Slovácko, sy'n chwarae ym mhrif adran Y Weriniaeth Tsiec.

Agorwyd y stadiwm yn 2003 ac mae lle i tua 8,000 o gefnogwyr yno. Er ei fod yn stadiwm cymharol fach mae'n adnabyddus am ei awyrgylch drydanol a swnllyd.

Dyma rai lluniau gan Owain Llyr, BBC Radio Cymru yn gynharach heddiw.

Roedd Euro 2025 yn brofiad bythgofiadwy i chwaraewyr Cymru, gan gyrraedd un o'r prif gystadlaethau rhyngwladol am y tro cyntaf erioed.

Ac ar ôl cael blas o wneud hynny - maen nhw'n awyddus am fwy.

Felly ydi'r criw yma o chwaraewyr yn gallu creu mwy o hanes a chyrraedd Cwpan y Byd ym Mrasil yn 2027?

Darllenwch fwy gan Owain Llyr yma.

Ffynhonnell y llun, Getty Images

Croeso i’n llif byw wrth i dîm pêl-droed merched Cymru ddechrau eu hymgyrch i gyrraedd Cwpan y Byd 2027.