Dyna ddiwedd ein llif byw ar ddydd Gwener Eisteddfod Genedlaethol y Garreg Las.

Llongyfarchiadau mawr i Emyr Lewis am ennill y Gadair ac i bawb arall sydd wedi bod yn cystadlu draw yn Llantwd.

Os hoffech chi wylio uchafbwyntiau o gystadlaethau’r dydd, cofiwch am ein tudalen ganlyniadau, neu mae detholiad o luniau gorau'r dydd ar gael yma.

Ffynhonnell y llun, Eisteddfod Genedlaethol

Ymarfer Byw gan Dafydd Owain ddaeth i'r brig yng nghystadleuaeth Albwm Cymraeg y Flwyddyn eleni

Ffynhonnell y llun, Dion Jones

Mae Cyfansoddiadau a beirniadaethau Eisteddfod y Garreg Las bellach ar gael i'w prynu wrth y neuadd ymgynnull

Ffynhonnell y llun, Cyfansoddiadau a beirniadaethau

Wedi methu Bethan Rhys Roberts yn holi Rhun ap Iorwerth yng nghwmni Vaughan Roderick a Richard Wyn Jones yn Y Babell Lên?

Peidiwch a phoeni, mae'r sgwrs bellach ar gael ar BBC Sounds. Bydd hefyd ar gael i'w gwylio ar YouTube Radio Cymru, dolen allanol yn fuan.

Mae'r Prif Weinidog yn trafod heriau ei swydd newydd, ei brofiad o lywodraethu, a'i weledigaeth ar gyfer y dyfodol.

Llongyfarchiadau i Ceri, Ruth a Siriol ar ddod yn gyntaf yng nghystadleuaeth y triawd neu bedwarawd cerdd dant.

Mae mwy o ganlyniadau ac uchafbwyntiau cystadlu'r Pafiliwn yma.

Dywedodd Idris Reynolds fod dwy awdl wedi dod i'r brig - A a Pwll y Wrach. Wrth drafod gwaith Pwll y Wrach, dywedodd: “Heb amheuaeth cafwyd awdl orchestol gan Pwll y Wrach.

"Mae’n rhychwantu wyth canrif o’n traddodiad barddol ac fe’i lleolwyd yn y parthau hyn. O ben y Mwnt, ger aber afon Teifi, gwêl y bardd linellau’r trai yn y tywod.

"...Mae’r cynganeddu’n wefreiddiol a gall y bardd hwn adeiadu cwpled, englyn neu bennill o gywydd o gylch un gair.

“Mae hon yn awdl a fydd yn canu yn y parthau hyn a thros Gymru gyfan. Ond ei hanffawd oedd iddi ddod wyneb yng ngwyneb ag awdl a oedd yn llachar yn ei gwreiddioldeb."

Disgrifiodd y gystadleuaeth eleni fel un "nas gwelwyd ei thynnach, am wn i, ers Eisteddfod Aberteifi yn 1976”.

Wrth draddodi'r feirniadaeth ar ran ei gyd-feirniaid, dywedodd Idris Reynolds am waith Emyr Lewis: "Dyma reiat o awdl sy’n dod â newydd-deb carlamus i gystadleuaeth y Gadair.

"Mae’n tywys yr awdl eisteddfodol i fannau na fu yno o’r blaen wrth blymio i ddyfnderoedd abswrd yr isymwybod.

"Siwrne drên sydd yma drwy hunllefau’r nos dan gromlin y lleuad anwadal, anwastad. Ond trên rhyfedd yw hwn. Nid oes teithiwr arall arno, na chwaith na thaniwr na gyrrwr na giard.

“A dweud y gwir, aros yn ei unfan a wna; y nos sy’n symud o’i gwmpas. Siwrne echrydus yw hon gan fod haid o adar ar y lein – ‘rhyw ddwywaith, tri pymtheg plws wythdeg-saith’ ohonynt. Mae sticeri arnynt gyda’u henwau arswydus megis Mastrwni, Mwgi Mekk, Fathadawra a Derekk – gyda dwy ‘k’ gyda llaw. Crynhoir y cwbl gyda’r llinell ardderchog ‘Adar nad adar ydynt’.

"Mae’r adar yn ei ddrysu’n llwyr wrth chwarae ar ei ansicrwydd. I ddianc mae’n disgyn o’r trên, ond gwaethygu wna pethau wrth iddo ddod, yng ngeiriau’r bardd, at ‘dŷ maen mawr erchyllwych, marmor chwellawr’. Mae’r perchennog y ei adnabod ac mae’r gwatwar a’r pwyntio bys yn waeth byth.

“Ond mae dihangfa’n dod drwy gyffyrddiad ysgafn ei gymar a’i ‘Bore da’ tyner. Mae’r siwrne drosodd, mae’r hunllef drosodd a’r lleuad wedi diflannu. Ac mae’r diweddglo yn gyfoethog o amwys ‘Mae trannoeth. Mae trueni,’

“Diolch i A am awdl wefreiddiol a thyner."

Cafodd ei eni yn Llundain, a symudodd y teulu i Gaerdydd pan yr oedd yn chwech oed. Aeth i Ysgol Gymraeg Llundain (yr oedd ei dad yn un o’i sylfaenwyr), Ysgol Gynradd Bryn-taf ac Ysgol Gyfun Rhydfelen, lle taniwyd ei ddiddordeb mewn cynganeddu gan ei athrawes Gymraeg, Nia Daniel (Royles bellach).

Datblygodd ei grefft dan arweiniad yr englynwr T Arfon Williams.

Mae ganddo radd mewn Saesneg o Brifysgol Caer-grawnt a gradd yn y Gyfraith o Goleg Prifysgol Cymru Aberystwyth. Mae’n byw yng Nghraig-cefn-parc ers 36 mlynedd.

Mae wedi cyhoeddi tair cyfrol o gerddi: Chwarae Mig, Amser Amherffaith/Dysgu Deud Celwydd yn Tsiec a twt lol. Bu’n aelod cyson o dim Ymryson y Beirdd Morgannwg. Ef yw beirniad Englyn y Dydd yn yr Ymryson er pedair blynedd.

Bu’n gweithio fel cyfreithiwr hyd 2019 pan benodwyd ef yn Bennaeth Adran y Gyfraith a Throseddeg ym Mhrifysgol Aberystwyth, lle mae bellach yn Athro Emeritws.

Cyn hynny bu’n gweithio hefyd yng Nghanolfan Llywodraethiant Cymru, Prifysgol Caerdydd ac yn aelod o Bwyllgor Arbenigwyr Cyngor Ewrop sy’n craffu ar sut mae gwledydd yn trin ieithoedd lleiafrifol.

Dyma’r eildro i’r bardd dderbyn y wobr, yn dilyn ei lwyddiant yn y gystadleuaeth yn Eisteddfod Genedlaethol Nedd a’r Cyffiniau, 1994.

Yn ogystal, enillodd y Goron yn Eisteddfod Bro Ogwr, 1998.

Beirniaid y gystadleuaeth eleni oedd Idris Reynolds, Mererid Hopwood a Carwyn Eckley.

Wrth draddodi’r feirniadaeth ar ran ei gyd-feirniaid, dywedodd Idris Reynolds: “Derbyniwyd 16 o gynigion, y nifer fwyaf ers Eisteddfod Casnewydd yn 1988. Yr oedd Llinell neu Llinellau yn destun da ac yn gyfle i’r beirdd i fynd lle mynnent."

Mae'r Prifardd Tudur Dylan wedi cael ei ethol i fod yr Archdderwydd nesaf, i olynu Mererid Hopwood yn y rôl.

Am y tro cyntaf ers rhai blynyddoedd, roedd dau yn y ras y tro hwn - Tudur Dylan a Gerwyn Wiliams.

Bydd Tudur Dylan yn dilyn ôl troed ei dad - y Parchedig John Gwilym Jones a fu'n Archdderwydd rhwng 1993 a 1996 - a'i ewythr y Parchedig T James Jones a fu'n Archdderwydd rhwng 2009 a 2013.

Mae wedi ennill y Gadair ddwywaith - yn Eisteddfod Bro Colwyn yn 1995 pan oedd ei dad yn Archdderwydd, ac yn Eisteddfod Eryri a'r Cyffiniau yn 2005.

Yn 2007 enillodd y Goron yn Eisteddfod Sir y Fflint.

Ffynhonnell y llun, Eisteddfod Genedlaethol

Roedd gofyn i ymgeiswyr gyfansoddi awdl neu gasgliad o gerddi mewn cynghanedd gyflawn ar fwy nag un o'r mesurau traddodiadol - hyd at 250 o linellau ar y testun Llinell/Llinellau.

Mae'r gadair yn rhoddedig eleni gan Awdurdod Parc Cenedlaethol Arfordir Penfro a'r wobr o £750 yn rhoddedig gan Geraint a Siân James, Siop Awen Teifi, Aberteifi.

Mae Lleisiau Llanerch yn paratoi gefn llwyfan y Pafiliwn cyn perfformio yng nghystadleuaeth y parti llefaru.

Mae'r criw wedi teithio o Wrecsam ac yn un o 11 parti a fydd yn cystadlu ar lwyfan y Pafiliwn.

Mae'r haul yn dal i wenu ar yr Eisteddfodwyr yn Llantwd a'r criw yma sydd wedi teithio o Gaerdydd yn gwneud y mwyaf o'r tywydd braf.

Mae'r dair ffrind, Nia, Fflur ac Alys wedi penderfynu gwisgo'r un fath heddiw!

Mae Dan a Llinos o Lyfrgell Genedlaethol Cymru yn crwydro'r Maes ac yn annog pobl i ymweld â'u stondin, lle bydd Don Leisure yn chwarae am 16:30.

Yn ôl Dan, mae'r stondin wedi bod yn brysur iawn wrth i ymwelwyr fwynhau dysgu am waith y Llyfrgell.