Y tyrau yn ein bywyd

Atgofion cydweithiwr: William Jones

"Yr oedd hi fel rhyw fath o ysgol, bod gyda Gwenlyn yn yr Adran Sgriptiau yn y BBC," meddai William Jones a fu’n cydweithio ag ef ac sy’n awr yn un o dîm Pobol y Cwm.

"Pedwar ohonon - Meical Povey, Sion Eirian, Dewi Williams a finnau oedd yn ei gario fo ar ei daith olaf. Y fo oedd yn ein cario ni ers talwm," meddai.

Yr oedd William Jones yn siarad newydd iddo orffen twtio’r ddrama Y Twr ar gyfer cynhyrchiad newydd.

"Ddoe ddiwetha gorffennais i," meddai. "A wyddoch chi be? Awr yn ddiweddarach daeth y newydd fod yna ddau dwr yn America wedi eu dymchwel.

"Twr crwn oedd twr Gwenlyn - bywyd yn troi mewn cylchoedd. Tri chyfnod mewn bywyd - ieuenctid, canol oed a henaint.

"Yn y diwedd mae’r hen wr am gael ei ollwng yn urddasol o boen yr ‘hen elyn’ - dyna fyddai Gwenlyn yn galw’r canser - yn y diwedd.

"Roedd Gwenlyn yn sgrifennu’r geiriau hynny yn y saithdegau. Ac yr oedd o’i hun yn mynd drwy’r un boen ddeng mlynedd yn ôl. Rhyfedd ynte? Holme Towers oedd enw’r lle ym Mhenarth y treuliodd ei ddyddiau olaf.

"Bu farw bedair blynedd, bron i’r diwrnod i’w gyfaill Rhydderch Jones. Bu Rhydderch farw ar Dachwedd 4 - roedd Gwenlyn yn ei golli fo’n arw ond mi fydda fo’n cellwair weithiau: trueni na fuasai Rhydderch wedi byw un diwrnod arall, iddo gael mynd gyda bang ar ddydd Guto Ffowc.

"Mi gafodd Gwenlyn fynd ar ddydd Guto Ffowc - rhyfedd ynte?

"Mi fydda’r ddau yn rhyw fudur bryfocio’i gilydd - pan oeddan nhw’n gweithio ar Fo a Fe - ‘Ti oedd yn rhoi min ar fy mhensal i.’ Pethau fel yna.

Os oes yna ryw lawr arall yn y Twr - rhyw atic neu rwbath, mae’n siwr y’u bod nhw wrthi’n pryfocio’i gilydd y funud hon."