ဟယ်ရီ မက်ဂွိုင်းယား - ဂရိမှာ ဖမ်းခံခဲ့ရစဉ် အသက် အန္တရာယ် အတွက် စိုးရိမ် ခဲ့ရတယ်

ဂရိမှာ ပြီးခဲ့တဲ့ တစ်ပတ်တုန်းက ဖမ်းဆီးခံရစဉ် သူ့ရဲ့ အသက်အန္တရာယ်ကို စိုးရိမ်ခဲ့ရတယ်လို့ မန်ချက်စတာ ယူနိုက်တက် နောက်ခံလူ ဟယ်ရီ မက်ဂွိုင်းယား က ပြောပါတယ်။

အရပ်ဝတ် ရဲအရာရှိတွေက မည်သူမည်ဝါ ဖြစ်ကြောင်း မပြောဘဲ နဲ့ သူတို့ စီးလာတဲ့ မီနီဘတ်စ ကို ရပ်တန့်ခိုင်းပြီး သူ့ကို ဆွဲထုတ်သွားခဲ့တယ်လို့ အင်္ဂလန် လက်ရွေးစင်က ဘီဘီစီ အားကစား သတင်း အယ်ဒီတာ ဒန် ရိုအန်ကို ပြောပြပါတယ်။ အဆိုပါရဲတွေကပဲ သူ့ရဲ့ ခြေထောက်ကို ကန်ခဲ့ပြီး မင်းရဲ့ ဘောလုံးသမားဘဝတော့ အဆုံးသတ်ပြီလို့ ပြောခဲ့တယ်လို့လည်း ဟယ်ရီ မက်ဂွိုင်းယား က ဆိုပါတယ်။

သူ့ကို ဖမ်းဆီးသူတွေဟာ ဘယ်သူဘယ်ဝါတွေမှန်း မသိတာကြောင့် လက်ထိတ် တစ်ဖက်တည်းနဲ့ ထွက်ပြေးဖို့ ကြိုးစားခဲ့တယ်လို့ အသက် ၂၇ အရွယ် ခံစစ်မှူးက ပြောပါတယ်။

သြဂုတ်လ ၂၅ ရက်နေ့၊ အင်္ဂါနေ့မှာတော့ ဂရိ နိုင်ငံ ဆိုင်းရော့စ် ကျွန်းက တရားရုံးမှာ မက်ဂွိုင်းယား ကို ဆိုင်းငံ့ ထောင်ဒဏ် ၂၁ လ နဲ့ ၁၀ ရက် ကျခံစေဖို့ အမိန့်ချမှတ်ခဲ့တာ ဖြစ်ပါတယ်။

သူ့ကို အဆက်မပြတ် ထိခိုက် နာကျင်စေမှု၊ လာဘ်ပေးရန် ကြံစည်မှု၊ ပြည်သူ့ ဝန်ထမ်းတွေကို အကြမ်းဖက် စော်ကားမှုတွေနဲ့ မီကိုနို့စ် ကျွန်းမှာ ဖမ်းဆီးခဲ့တာ ဖြစ်ပါတယ်။

ပြီးခဲ့တဲ့ ဗုဒ္ဓဟူး နေ့မှာတော့ မက်ဂွိုင်းယားရဲ့ ဥပဒေ အကျိုးတော်ဆောင်တွေက ပြစ်ဒဏ်တွေနဲ့ ပတ်သက်လို့ အယူခံ ဝင်ခဲ့ကြပါတယ်။ ဂရိနိုင်ငံ ဥပဒေ ထုံးစံတွေနဲ့ အညီ အယူခံဝင်ခဲ့ကြတာ ဖြစ်ပြီး အထက် တရားရုံး တစ်ခုမှာ စစ်ဆေးသွားဖို့လည်း ရှိနေပါတယ်။

ဆိုးရွားတဲ့ အတွေ့အကြုံနဲ့ ရင်ဆိုင်ခဲ့ရတာ ဖြစ်ပြီး၊ ဒီအတွက် မယုံမကြည် ဖြစ်ခဲ့ရတယ်လို့လည်း ဘီဘီစီ နဲ့ တွေ့ဆုံ မေးမြန်းခန်းမှာ ငိုကြွေးပြီး ပြန်ပြောပြခဲ့ပါတယ်။

သူ့ဟာ ဘယ်သူ့ကိုမှလည်း ထိုးကြိတ် ခဲ့တာ မရှိသလို၊ လာဘ်ထိုးဖို့လည်း မကြိုးစားခဲ့တာကြောင့် သူ့အနေနဲ့ တောင်းပန်ဖို့ လိုအပ်တယ်လို့ မထင်ဘူးလို့လည်း သူက ပြောပါတယ်။

''တောင်းပန်တယ် ဆိုတာ တစ်စုံတစ်ရာ အမှားအယွင်း ဖြစ်မှ လုပ်ရတာ မဟုတ်လား'' လို့ သူက မှတ်ချက် ပေးပါတယ်။

ဒီလို အဖြစ်အပျက်မျိုးကို တစ်ဦးတစ်ယောက်ကိုမှ မဖြစ်စေချင်တဲ့ အပြင်၊ ပရိသတ် အများဆုံးရှိတဲ့ အသင်းက ကစားသမား တစ်ယောက် အနေနဲ့ ဒီလို အဖြစ်မျိုး ဖြစ်ခဲ့တဲ့အတွက် နောင်တရမိတယ်လို့ ဆိုပါတယ်။ ဒါပေမယ့် သူ့အနေနဲ့ အမှားအယွင်း တစ်ခုမှ လုပ်ခဲ့တာ မရှိဘူးလို့ ဆိုပါတယ်။

လူအားလုံးကြုံတွေ့နိုင်တဲ့ အခြေအနေ တစ်ခုမျိုးကို သူကြုံတွေ့ခဲ့ရတာ ဖြစ်တယ်လို့လည်း ဆိုပါတယ်။

ဘယ်လောက် နာကျင်ရသလဲလို့ မေးတဲ့ အခါမှာတော့ သူ့ ခြေထောက်ကို အကြိမ်ပေါင်းများစွာ အကန် ခံရပြီး၊ ဒါကိုတော့ စိတ်ထဲမှာ မထားနိုင်ဘဲ၊ စိုးရိမ်သောကတွေက ပိုများခဲ့ပါတယ်။ သူ့ အသက် အန္တရာယ် အတွက် စိုးရိမ် ပူပန်ခဲ့မိတယ်လို့ ပြောပါတယ်။

သူ့ထက် မိသားစု တွေက ပိုခံစားခဲ့ရတာကိုလည်း ရှင်းရှင်းလင်းလင်း သိနေတယ်လို့ သူက ဆိုပါတယ်။

ဂရိမှာ ရှိနေတဲ့ ညက ဘာတွေ ဖြစ်ပျက်ခဲ့တယ်ဆိုတာကို အတိအကျ သိပြီး၊ အမှန်တရားကိုလည်း သိတယ်လို့ သူက ထပ်လောင်းပြောပြပါတယ်။ ဒါတွေကို ပြန်ပြောနေတဲ့ အချိန်မှာလည်း စိတ်ဆိုး ဒေါသ ထွက်မိတယ်လို့ ပြောပါတယ်။ ဒါပေမယ့် စိတ်ဓာတ်ခိုင်မာတဲ့ သူ့အနေနဲ့ အကောင်းဆုံး ပြန်လာ နိုင်မယ်လို့ ကတိပေးခဲ့ပါတယ်။

၂၀၁၉ ခုနှစ်မှာ မက်ဂွိုင်းယား ကို လက်စတာစီးတီးအသင်းကနေ ပြောင်းရွှေ့ကြေး စတာလင်ပေါင် သန်း ၈၀ နဲ့ မန်ချက်စတာ ယူနိုက်တက်က ခေါ်ယူခဲ့တာပါ။ ပြီးခဲ့တဲ့ ဇန်နဝါရီမှာ အသင်းခေါင်းဆောင်ဟောင်း အက်ရှ်လေယန်း အင်တာမီလန် ကို ပြောင်းရွှေ့သွားတဲ့ အခါမှာတော့ မက်ဂွိုင်းယားဟာ မန်ယူ ရဲ့ အသင်းခေါင်းဆောင် ဖြစ်ခဲ့ပါတယ်။

မန်ယူ အသင်းခေါင်းဆောင် ဖြစ်ခွင့်ရတာကို ဂုဏ်ယူကြောင်းနဲ့ အသင်းခေါင်းဆောင် မဖြစ်ရင်တောင်မှ မန်ယူလို အသင်းအတွက် ကစားရတာ သူ့အတွက် တကယ့် အခွင့်အရေးပဲလို့ ဆိုပါတယ်။

ဒီအဖြစ်အပျက် ကြောင့် အိုက်စ်လန် နဲ့ ဒိန်းမတ်တို့နဲ့ ကစားဖို့ ရှိတဲ့ အင်္ဂလန် လက်ရွေးစင် အသင်းကနေ ချန်လှပ် ခံခဲ့ရပြီး၊ ဒီအတွက် စိတ်ပျက်ရပေမယ့် သူနားလည် လက်ခံကြောင်း ပြောဆို သွားခဲ့ပါတယ်။

မက်ဂွိုင်းယား ပြောပြတဲ့ ဂရိက အဖြစ်အပျက်

ဂရိ ရဲတွေကတော့ ဒီလို ပြောဆိုချက်တွေကို ငြင်းချက် ထုတ်ပါတယ်။ မက်ဂွိုင်းယား နဲ့ သူ့သူငယ်ချင်းတွေဟာ ကိုယ်ထိလက်ရောက် ရန်လုပ်ခဲ့တဲ့ အပြင် ဆဲဆိုမှုတွေလည်း လုပ်ခဲ့တယ်လို့ ရဲတွေက ပြောကြပါတယ်။