Rusiyanın İrkutsk vilayətində daşqında 5 nəfər ölüb. Putin bölgəyə gəlib

Yerli rəsmilərin məlumatına görə, Rusiyanın İrkutsk vilayətində daşqın qurbanlarının sayı beş nəfərə çatıb. Daşqına görə bölgədə fövqəladə vəziyyət rejimi elan edilib. Ötən gecə prezident Vladimir Putin İrkutsk bölgəsinə gəlib.

Rusiya Fövqəladə Hallar Nazirliyinin (FHN) məlumatına görə, 10 mindən çox insanın yaşadığı təxminən 4200 yaşayış binası su altında qalıb.

İrkutsk Hidrometeorologiya və Ətraf Mühitin Monitorinqi Departamentinin məlumatına görə, hava şəraitinin yaxşılaşması gözlənilmir.

FHN-nin verdiyi məlumata görə, İrkutsk vilayətinin çaylarında suyun səviyyəsi yaxın günlərdə Şərqi Sayan dağlarında baş verən leysan yağışlarla görə daha da qalxacaq.

Minlərlə sakin elektriksiz qalıb, bəziləri isə rabitə xətlərində baş verən kəsintilərdən şikayət edirlər.

İyunun 30-na keçən gecə Rusiya prezidenti Vladimir Putin xüsusi aviareyslə Yaponiyadan İrkutska gəlib .

O, FHN və digər xidmətlərin rəsmiləriylə təcili iclas keçirib.

RİA Novosti xəbər verir ki, daşqından zərərçəkənlərə birdəfəlik maliyyə yardımının göstərilməsi üçün İrkutsk vilayətinə 662 milyon rubl ayrılıb.

Təbii fəalkət nəticəsində bölgənin avtomobil yolları şəbəkəsinə dəyən zərərin miqyası 800 milyon rubl (təxminən $12,5 milyon) səviyyəsində dəyərləndirilir, bölgənin qubernatoru Sergey Levçenko bildirib. Onun sözlərinə görə, federal yolların 17 sahəsi və 13 körpü suyun altında qalıb.