Erdoğan: "Siyasi və hərbi sahələrdə bu günə qədər aparılan mübarizə bundan sonra fərqli cəbhələrdə davam edəcək", Türkiyə Prezidenti Recep Tayyip Erdoğan cümə axşamı günü keçirilmiş Zəfər paradının açılışı zamanı çıxış edib.
Şəklin mənbəyi, Getty Images
“20 Yanvar şəhidlərinin məzarlarına qoyulan qərənfillər müstəqilliyi xatırlatdığı kimi, indi yalnız Dağlıq Qarabağ bölgəsinə xas olan xarı bülbül Azərbaycan torpaqlarının azadlığının simvoluna çevrildi”.
Bunu Türkiyə Prezidenti Recep Tayyip Erdoğan cümə axşamı günü keçirilmiş Zəfər paradının açılışı zamanı çıxışında belə deyib.
O bildirib ki, Azərbaycanın həm hərbi, həm də diplomatiya sahəsində əldə etdiyi bu uğurda ən böyük paylardan biri Prezident İlham Əliyevə aiddir.
“Azərbaycan qardaşım İlham Əliyevin qətiyyətli rəhbərliyi altında, inşallah, dastan yazmaqda davam edəcək”.
Cənab Erdoğan deyib ki, Türkiyə Azərbaycanın mübarizəsinə ilk günlərdən etibarən bütün qurum və təşkilatları ilə dəstək verib, “bütün imkanları ilə azərbaycanlı qardaşlarının yanında olub”.
“Türkiyə olaraq Azərbaycan ilə münasibətlərimizdə özümüzə hər zaman böyük lider Heydər Əliyevin “Bir millət, iki dövlət” şüarını rəhbər aldıq. Qazi Mustafa Kamal Atatürkün dəqiq ifadəsi ilə Azərbaycanın kədərini kədərimiz, sevincini sevincimiz bildik. Bu anlayışla Qarabağı otuz il boyunca sinəmizdə yara etdik. Bu gün də bu yaranın qapanmasının sevincini paylaşmaq, bu şanlı zəfəri birlikdə qeyd etmək üçün aranızdayıq.”
Recep Tayyip Erdoğan deyib ki, Azərbaycanın torpaqlarını işğaldan azad etməsi, mübarizənin bitdiyi anlamına gəlmir və siyasi və hərbi sahələrdə bu günə qədər aparılan mübarizə bundan sonra fərqli cəbhələrdə davam edəcək.
"30 illik işğal dövründə birlikdə bu bölgələrin xarabalığa çevrildiyini və daş üzərində daş qalmadığını gördük. İlham Əliyevin dediyi kimi, Füzuli şəhərində bayraq asmaq üçün bir bina belə yox idi, bütün şəhərlər dağıdılıb, bütün kəndlər dağıdılıb, hətta qəbiristanlıqlar da dağıdılıb, məscidlər yıxılıb, minarələr eyni şəkildə dağıdılıb. Əlbəttə ki, sərvətləri də talan ediblər. Bütün bu məhvlərin hesabı olmalıdır."
Erdoğan bildirib ki, erməni idarəediciləri Azərbaycan torpaqlarını işğal altında saxlamaq üçün xalqın ehtiyatlarını xərcləyib.
"Ancaq bu mənbələr mənasız müdafiə xəttlərinə, silahlara və nifrət və qanla dolu idarəedicilərin ambisiyalarına sərf edilməsəydi, mənzərə bu gün çox fərqli olardı. Erməni siyasətçilər bunu çox yaxşı analiz edir və barışıq qururlar. Ümid edirik ki, gələcəyi sabitlik əsasında qurmaq üçün cəsarətli addımlar atırlar. "
Ermənistan xalqını keçmişin yalanları ilə təsəlli edərək yoxsulluğa məhkum edən diaspora əsarətindən qurtulmasını istəyən Erdoğan "münasibətlər düşmənçilik deyil, yaxşı qonşuluq zəminində yenidən nəzərdən keçirilməlidir" deyib.
Erdoğan "erməni xalqı Qarabağda baş verənlərdən dərs alsa, bu bölgədə yeni bir dövrün başlanğıcı olacaq" deyib.
