Brìgh nam Facal
Tagh na facail a th' air an comharrachadh airson mìneachadh fhaighinn
Comhairle air na Nigheanan Òg
- An toiseach m' aimsir is mo dhòigh ri bargan,
- Gun robh mi 'g earbsa nach cealgte orm;
- Cha chòmhradh cearbach air ro bheag leanmhainn
- Bho aois mo leanabaidh chaidh fheuchainn dhòmhs';
- Ach nis bho chì mi cor nan daoine,
- An comunn gaolach gur faoin a ghlòr,
- Cha dèan mi m' aontadh ri neach fon t-saoghal;
- Chan eil gach aon diubh air aon chainnt beòil.
- Nach fhaic sibh òigear nam meall-shùil bòidheach
- Le theangaidh leòmaich 's e labhairt rium,
- Le spuir 's le bhòtann, le ad 's le chleòca,
- Le chorra-cheann spòrsail an òr-fhuilt duinn;
- Saoilidh gòrag le bhriathraibh mòrach
- Ga cur an dòchas le glòr a chinn:
- "A ghaoil, gabh truas rium 's na leig gu h-uaigh mi;
- Do ghaol a bhuair mi bho ghluais mi fhìn.
- "Led theangaidh leacaich nam briathran tearca,
- 'S e saobhadh t' fhacail dh'fhàg sac gam leòn;
- Gu bheil mi 'g altram am thaobh an tacaid
- A rinn mo ghlacadh 's mo ghreas' fon fhòid."
- Mar shamhladh dha siud gaoth a' Mhàirt ud
- Thig bho na h-àrdaibh 's nach taobh i seòl:
- Nuair gheobh e mhiann dith, gun toir e bhriathra
- Nach fhac' e riamh i, 's car fiar na shròin.
- Na geallan breugach air bheag reusan,
- Fallsail, eucorach, neòghlan rùn,
- Air eagal bhreugan no masladh fhaotainn,
- 'S ann leam nach b' èibhinn taobhsann riu;
- A chlann, na èistibh rin glòr gun èifeachd,
- 'S na toiribh spèis do fhear caogaidh shùil;
- Gur h adhbhar reusain dhuibhs' an trèigeadh -
- 'S ann annta fhèin a bhios gnè nan lùb.
- Bha mi uair nuair a bha mi 'm ghruagaich
- Gum faighinn uaigneas gun fhios do chàch;
- Mar shamhladh bruadair an diugh ga luaidh rium,
- Gun dad de bhuanachd ach buaidh mar gnàth,
- Na gealan glè mhòr a gheobhainn fhèin bhuap'
- Air chor 's nach trèigeadh iad mi gu bràth;
- A nis is lèir dhomh na rinn mi dh'eucoir
- 'S a' mheud 's a dh'èist mi dam breugan bàth.
- Ach, a fhearaibh òga, ge mòr nur bòilich,
- 'S math 's aithne dhòmhsa cuid mhòr dur gnàths:
- Gu barrail, bòidheach sibh tighinn am chòmhdhail,
- Ler teangaidh leòmaich 's ler còmhradh tlàth;
- Ghabhte ceòl leibh an aodann gòraig,
- 'S mur bi i eòlach, gun gabh i à:
- Nuair bhios e stòlda 's nuair gheobh e leòr dhith,
- Gum bi Ochòin aic' an lorg bhith bàth.
- A ghruagach chèillidh, na creid fhèin iad,
- An car-fon-sgèith sin bhios ann an gràdh;
- Chan eil san t-saoghal nach creid an saoradh,
- Ach 's mise dh'fhaodadh a chaochladh ràdh;
- Taobh an inntinn mar as cinnteach,
- Is theirig aotrom air ghaol thoirt dàibh:
- Dh'aindeoin fhocail 's a bhriathra brosgail,
- Na dèan do lochd leis an t-sochair-dhàil.
- A ghruagach dheud-gheal an fhuilt theud-bhuidhe,
- Cùm do cheutaidh fod cheud-bharr ùr;
- Na creid am breugan 's na tog droch sgeula,
- Ged robh fear leumnach nan dèidh mar chùl;
- Dh'aindeoin uaigneas is raspàrs uasal,
- Na leig e 'n uachdar air chruas a ghlùin,
- Ach cùm e 'n ìochdar ge b' oil le fhiacail
- Mur toir e 'bhriathar gur fhiach leis thu.
- Am fear a thriallas a dhol a dh'iarraidh
- Na mnà as miannaiche bhios da rèir,
- Gur cailin shuairc i nach fhuiling mì-stuamachd,
- No dhol an uaigneas le neach fon ghrèin;
- Mar shamhladh bha siud, a bhrìgh a nàire,
- Dhol nas dàine na mànran bèil;
- Bheir fear gun riaghailt an sin a bhriathar
- Gu bheil i fiata 's nach fhiach a gnè.
- Ma bhios i glèidhteach air nì 's air feudail,
- Their fear gun reusan gum bi i crìon,
- 'S ma bhios i pàirteach air nithe àraidh,
- Gun abair càch rith' gum b' fheàirrd' i ciall;
- An tè tha stròdhail, cha bhuin i dhòmhsa
- Mar chèile pòsta bhon tha i fial;
- Gur cailin shàmhach nach fhuiling tàmailt,
- A mòid no mànran an àirde miann.
Comhairle air na Nigheanan Òg
Tagh na facail a th' air an comharrachadh ann an dearg airson mìneachadh fhaighinn.
