Cuspairean

Rinn Niall MacLeòid an dà chuid òrain èibhinn agus dàin sa bheil e a' toirt a bheachd air cuspairean mòra an latha am measg nan Gàidheal, leithid cor na Gàidhlig. Ach 's ann airson a bhith a' cur an cèill cianalas na bhàrdachd as ainmeile a tha e an-diugh.

Tha a' chuid as motha dhen bhàrdachd seo mun Eilean Sgitheanach agus gu h-àraidh mu dhòigh-beatha na linn a dh'fhalbh san Eilean, a tha e a' dealbhachadh mar àm a bha uile-gu-lèir sona "gun ghò". Rinn e cuideachd dàin eile a tha, a rèir choltais, stèidhte air suidheachaidhean tiamhaidh, romansach air an tarraing às a mhac-meanmna fhèin no far a bheil e a' bruidhinn às leth cuideigin eile, m.e. Màiri Bhaile Chrò.

Tha bàrdachd Nèill MhicLeòid ag èirigh a-mach às a' ghluasad eaconomach a chunnaic coimhearsnachdan ùra Gàidhlig gan cruthachadh ann am bailtean mòra na Galltachd aig deireadh na 19mh linn. Tha e ga ghiùlain fhèin mar nàdar de 'bhàrd baile' airson na Gàidhealtachd ùir seo, a' riochdachadh a cho-eileanaich nan cianalas airson nan sgìrean a dh'fhàg iad agus a' cruthachadh dualchas dibhearsaineach ùr airson nan cruinnichidhean aca, dibhearsain le freumhan an dà chuid ann an taighean-cèilidh na seann Ghàidhealtachd agus ann am Music Hall a' bhaile-mhòir.

Bha fèill mhòr air bàrdachd Nèill MhicLeòid na latha agus tha sin fìor gu ìre fhathast, gu h-àraidh anns an Eilean Sgitheanach. Is e aon adhbhar airson seo gu bheil e a' cur an cèill faireachdainnean a bha, agus a tha, cumanta am measg a' mhòr-shluaigh agus gu bheil faclan nan òran aige sìmplidh, an rannaigheachd siùbhlach agus na fuinn tarraingeach.