Dealbh air mar a bhios i a' sgrìobhadh

Mar is trice tha pìos bàrdachd a' tighinn thugam mar faireachdainn, uaireannan mar abairt. Mas ann mar faireachdainn a tha e a' tighinn, feumaidh mi a bhith ag obrachadh a-mach cò às a tha am faireachdainn a' tighinn agus a bhith a' cur faclan orra. Mas e abairt a th' ann, feumaidh mi abairtean eile a lorg.

Bidh mi ga dhèanamh air a' choimpiutair - tòrr, tòrr dreachan dhen aon rud, tha min dùil uaireannan fichead dhiubh, ag atharrachadh rudan beaga bìodach. Agus mar as trice bidh e a' tòiseachadh nas fhaide agus mar a thèid mi air aghaidh, bidh e a' fàs nas luaithe. Agus aig an deireadh, tha mi airson faireachdainn gu bheil gach lide dheth anns an àite cheart, nach b' urrainn dha a bhith ann an dòigh eile. Chan eil fhios 'am am biodh duine eile ag aontachadh leam, nach b' urrainn dha a bhith ann an dòigh eile ach sin am faireachdainn a th'agam fhèin.

Agus mar as trice chan eil còrdadh riaghaltach ann, ach bidh mi daonnan a' toirt tòrr aire dhan chruth a th' air an rud agus bidh mi ga dhèanamh cho teann 's as urrainn dhomh agus bidh mi a' feuchainn cuideachd ri bhith a' cleachdadh gach rud a thig a-staigh, an dà rud mar rud nàdarrach agus mar shamhla.

Agus an uair sin nuair a tha mi a' smaoineachadh gu bheil mi deiseil, nì mi eadar-theangachadh gu Beurla. Ach gu math tric, le bhith a' dèanamh an eadar-theangachaidh, bidh sin a' toirt beachdan ùra dhomh no sealladh ùr is bidh mi a' dol air ais dhan Ghàidhlig is mar sin bidh mi a' dol air ais is air aghaidh beagan.