Comhairle mu sgrìobhadh

A thaobh a bhith a' sgrìobhadh sgeulachd, 's e a bhith a' dèanamh sgeidseachan air na caractaran an toiseach a tha mi smaoineachadh a tha cudromach agus gum bi beachd agad air dè am plot a tha gus a bhith agad anns an sgeulachd oir tha daoine ag iarraidh faighinn a-mach dè tha dol a thachairt is mar sin air adhart. Agus dh'fheumadh beachd air choreigin a bhith agad mus tòisich thu a' sgrìobhadh air dè a tha gus a bhith san leabhar.

A thaobh bàrdachd, uill is dòcha a bhith a' smaoineachadh mu dheidhinn rud, agus ma thig ìomhaigh thugad sin a sgrìobhadh sìos, an ìomhaigh a sgrìobhadh sìos. Ach cuideachd, bàrdachd dhaoine eile a leughadh. Tha sin cudromach, gu h-àraidh ma tha thu ag iarraidh bàrdachd anns an nòs ùr a sgrìobhadh. Leugh stuth le daoine eile agus an uair sin ionnsaich mar a tha iadsan ga dhèanamh. Tha tòrr ann. Ged a tha bàrdachd a' coimhead sìmplidh, tha e gu math doirbh bàrdachd mhath a sgrìobhadh agus feumaidh tu leughadh stuth le daoine eile airson faighinn a-mach ciamar a rinn iadsan e agus dè na sgilean a th' air a' chùlaibh. Agus aon uair 's gun dèan thu sin, bidh e nas fhasa dhut fhèin an uair sin nuair a tha thu a' tighinn gu sgrìobhadh. Tha fhios agad air na cruthan a th' ann a thaobh bàrdachd, air meadrachd is rudan mar sin agus bidh e nas fhasa dhut an uair sin do chruth fhèin a chur air an rud a tha thu ag iarraidh a dhèanamh.