Brìgh nam Facal
Tagh na facail a th' air an comharrachadh airson mìneachadh fhaighinn
An Claigeann
- 'S mi 'm shuidh' aig an uaigh,
- Ag amharc mu bruaich,
- Feuch claigeann gun snuadh air làr;
- Do thog mi e suas,
- A' tiomach' gu truagh,
- Ga thionndadh mun cuairt am làimh.
- Gun àille gun dreach,
- Gun aithne gun bheachd
- Air duine thèid seach na dhàil;
- Gun fhiacail na dheud
- No teanga na bheul,
- No slugan a ghleusas càil.
- Gun ruthadh na ghruaidh,
- 'S e rùisgte gun ghruaig,
- Gun èisteachd na chluais dom dhàn;
- Gun anail na shròin
- No àile den fhòid,
- Ach lag far 'm bu chòir bhith àrd.
- Gun deàlradh na shùil
- No rosg uimpe 'dùn'
- No fradharc ri h-iùil mar b' àbh'st,
- Ach durragan crom
- A chleachd bhith san tom
- Air cladhach dà tholl nan àit'.
- Tha 'n eanchainn bha 'd chùl
- Air tionndadh gu smùr,
- Gun tionnsgal no sùrd air d' fheum;
- Gun smuainteach' ad dhàil
- Mu philleadh gu bràth
- A cheartach' na dh'fhag thu 'd dhèidh.
- Chan innis do ghnùis
- A nise cò thu,
- Mas rìgh no mas diùc thu fèin –
- 'S ionann Alasdair Mòr
- Is traill a dhìth lòin
- A dh'eug air an òtrach bhreun.
- Fhir chladhach na h-uaigh',
- Nach cagair thu 'm chluais
- Cò 'n claigeann seo fhuair mi 'm làimh,
- 'S gun cuirinn ris ceist
- Mu ghnàths mun do theast,
- Ged nach freagair e 'm-feast mo dhàn.
- 'M bu mhaighdeann deas thu
- Bha sgiamhach ad ghnùis,
- 'S deagh shuidheach' ad' shùil da rèir,
- Led mhaise mar lìon
- A' ribeadh mu chrìdh'
- Gach òganaich chìth'dh thu fèin?
- Tha nise gach àgh
- Bha cosnadh dhut gràidh
- Air tionndadh gu gràin gach neach –
- Marbhphaisg air an uaigh,
- A chreach thu den bhuaidh
- Bha ceangailt' ri snuadh do dhreach.
- No 'm breitheamh ceart thu
- Le tuigs' agus iùl
- Bha rèiteach gach cuis don t-sluagh,
- Gun aomadh le pàirt
- Ach dìteadh gu bàs
- Na h-eucoir bha dàicheil cruaidh?
- No 'n do reic thu a' chòir
- Air ghlacaid den òr
- On dream dan robh stòras pailt,
- Is bochdainn an t-sluaigh,
- Fo fhoirneart ro chruaidh,
- A' fulang le cruas na h-airc?
- No 'mmorair ro mhòr
- A thachair am dhòrn,
- Neach aig an robh còir air tìr,
- Bha iochdmhor ri bochd,
- A' cluthadh nan nochd
- Rèir pailteas a thoic 's a nì?
- No 'n robh thu ro chruaidh,
- A' feannadh do thuath,
- 'S a' tanach' an gruaidh le màl,
- Le h-agartas geur
- A' glacadh an sprèidh,
- 'S am bochdainn ag èigheach dàil?
- Gun chridh' aig na daoin'
- Bh' air lomadh le h-aois,
- Len claigeannan maola truagh,
- Bhith seasamh ad chòir
- Gun bhonaid nan dòrn,
- Ged tholladh gaoth reòtht' an cluas.
- Tha nise 'do thràill,
- Gun urram ad dhàil,
- Gun ghearrsuim, gun mhàl, gun mhòd -
- Mòr-mholadh don bhàs,
- A chasgair thu tràth
- 'S nach d' fhuiling do stràic fon fhòid!
- No 'n ceann thu 'n robh ciall
- Is eòlas air Dia,
- 'S gun d' rinn thu a riar sa chòir,
- Ged tha thu 'n diugh ruisgt',
- Gun aithne, gun iùl,
- Gun teanga, gun sùil, gun sròn?
- Gabh misneach san uaigh,
- Oir èiridh tu suas
- Nuair chluinneas tu fuaim an stuic,
- 'S do thruailleachd gu lèir
- Shìos fàgaidh tu 'd dhèidh
- Aig durragan breun an t-sluic.
- Oir deasaichidh Dia
- Do mhaise mar ghrian
- Bhiodh ag èirigh o sgiath nam beann,
- Cur fradharc ro gheur
- Sna suilean seo fèin,
- 'S iad a' deàlradh mar reul ad cheann.
- Do theanga 's do chàil
- Nì ghleusadh gun dàil,
- A chantainn na àros cliù;
- Is fosglaidh do chluas
- A dh'èisteachd ri fuaim
- A' mholàidh th' aig sluagh a chùirt.
- Nuair dheàlraicheas Crìosd
- Na thigheachd a-rìs
- A chruinneach' nam fìrean suas,
- 'N sin bheir thu do leum
- Thoirt coinneamh dha fèin
- Mar iolair nan speur aig luaths.
- Nuair dh'èireas tu 'n-àird,
- Grad chuìridh ort fàilt'
- A mhealtainn a chàirdeis fèin,
- Gun dealach' gu bràth
- Ra chomann no ghràdh
- A steach ann am Pàrras Dè.
- Fhir chluinneas mo dhàn,
- Dèan aithreachas tràth
- 'M feadh mhaireas do shlàint' 's do bheachd,
- Mun tig ort am bàs,
- Nach leig thu gu bràth
- Air geata nan gràs a steach.
An Claigeann
Tagh na facail a th' air an comharrachadh ann an dearg airson mìneachadh fhaighinn.
