Co mu dheidhinn a tha an dàn?

Uill tha Sòraidh mu dheidhinn an dealachaidh a bha mi a' faicinn bu mhotha a bha air tachairt eadar mi-fhèin 's mo choimhearneachd. Nuair a bha mi anns an oilthigh, bhithinn ag obair ann an cuaraidh aig an rathad airson cosnadh - stuth rathaid 's mar sin. Sin aon de na h-oilthighean a b'fheàrr anns an robh mi a-riamh air dòigh. Sin far an do dh'ionnsaich mi tòrr de rudan mu dheidhinn na coimhearsneachd, gu sònraichte fireannaich na coimhearsneachd agus an dòigh anns an robh iad a' dèanamh an dèiligeadh ri chèile nan inntinn... làn dibhearsain, 's còmhradh, 's eachdraidh, bha a h-uile seòrsa rud a' tighinn an-àird an sin.

Bhithinn cuideachd a' fighe le beairt. Bha beairt aig brathair mo mhàthar. Bha esan air falbh ag obair ann an àite eile agus cha do bheartaich e a' bheart a-riamh, cha do chuir e a dhol i. Ach thàinig pal dhomh a nuas à Siabost agus chuir e a' bheart a dhol is bhithinn a' bhliadhna bho dheireadh sin, dìreach a' falbh airson mo sheirbheis nàiseanta a dhèanamh agus cha robh mi a' faicinn gum bithinn a' tilleadh air ais chun na h-obrach sin tuilleadh an dèidh a bhith còig bliadhna ann an oilthighean 's an leithid sin.

Cuideachd, bha mi a' mothachadh dhan an t-seòrsa dealachaidh a bha a' tighinn eadar mi-fhìn 's a' choimhearsneachd. Bhiodh daoine a' coimhead orm ann an dòigh eadar-dhealaichte, feadhainn a chuireadh annas mòr orm a' cantainn 'sibh p'fhèin' rium 's rudan dhen t-seòrsa sin. Tha mi a' smaoineachadh gu robh iadsan a' smaoineachadh gur ann ormsa a bha a h-uile càil de na h-atharrachaidhean air a thighinn ach bha a' choimhearsneachd ag atharrachadh cuideachd, ged is ann tro mo shùilean fhìn a bha mi ga faicinn.