Na cuspairean as trìc a tha a' nochdadh sna dàin aige

Tha mi cinnteach an fheadhainn as cumanta a tha daoine a' faicinn, 's e nàdar agus gaol. Bidh creideamh na cuspair ris am bi mi a' faireachdainn gu feum mi dèiligeadh. Chan e bàrdachd cràbhaidh agus chan eil mi cruaidh an aghaidh creideimh.

Bidh mi caran iomagaineach mu dheidhinn nuair a chluinneas mi daoine ag ràdh, ag èisteachd ri Smuain na Maidne, 's nuair a chluinneas mi daoine ag ràdh, an fhìrinn. Bidh mi an còmhnaidh a' smaoineachadh, uill fuirich a bhalaich, cò an fhìrinn? An e an fhìrinn agadsa no an fhìrinn aig do nàbaidh aig a bheil beachd rud beag eadar-dhealaichte air an aon chuspair. Tha fios 'am dè a tha iad a' ciallachadh agus 's e facal cumanta a th' ann. Ach do sgrìobhadair, do bhàrd a tha a' tomhais a h-uile facal, ma tha thu a' cleachdadh facal mar an fhìrinn, tha thu ag ràdh, dè mar a tha cuideigin a tha a' leantainn Buddha ga fhaicinn, dè mar a tha cuideigin a tha na Iùdhach, na Islamach, agus an iomadh sruth a tha anns a' chreideamh Chrìosdaidh fhèin, an fheadhainn nach eil a' creidsinn ann an Dia idir? Feumar gabhail ris gu bheil a h-uile sruth a tha sin onarach dhaibh p'fhèin. Bidh sin 's dòcha a' bualadh air mo smuaintean aig amannan cuideachd.

Ach gu h-àraidh, 's dòcha poilitigs, poilitigs a' chànain agus cainnt fhèin. 'S ann anns a' Bheurla is dòcha a tha mi nas buailtiche a bhith a-mach air cainnt, ma tha mi a' faicinn faclan mar "friendly fire". Ma tha thusa nad sheasamh air faiche cogaidh is gunna bhon taobh agad fhèin a' toirt sgleog dhut, chan eil e uabhasach friendly idir!