A' cleachdadh puingeachadh neo-àbhaisteach?

Cha mhi a' chiad duine a chleachd an stoidhle sin agus tha mi cinnteach gu bheil gu leòr eile ga dhèanamh an-diugh. Ach feumaidh mi ràdh, nuair a thòisich mi air, cha robh mi eòlach air mòran a bha ga dhèanamh ach E. E. Cummings, am bàrd Ameireaganach. Ach thàinig e thugam. Cha robh mise a' dol a dhèanamh rud ann an nòs E. E. Cummings air sgàth 's gun do rinn E. E. Cummings e.

Tha mi a' smaoineachadh gur dòcha gur ann le a bhith ag obair eadar an dà chànan. Le bhith ag obair eadar an dà chànan, b' e a' chiad rud a bhuail orm nuair a tha thu a' sgrìobhadh anns a' Bheurla agus ag ràdh mi, tha thu ag radh "I". Tha capital ann an sin. Ach nuair a tha thu a' sgrìobhadh "you", chan eil. 'S tha e mar gum biodh tu ag ràdh, uill tha mise cudromach ach chan eil thusa. Bha e cho sìmplidh ri sin.

An uair sin thòisich mi smaoineachadh nuair a tha thu a' tòiseachadh seantans, chan eil thu a' fuaimneachadh a' chiad litir ann am facal, nas motha na faclan eile. Nuair a tha thu ag ainmeachadh pearsa eile, chan eil thu a' dèanamh fuaim a bharrachd airson a' chiad litir agus 's e seòrsa de deamocrasaidh nan litir a bhith a-mach air dhomh fhèin an toiseach.

Tha thu a' coimhead airson rithim. Tha a' cheart uimhir de rithimeachd ann am bàrdachd anns an nòs ùr 's a gheibh thu ann am bàrdachd san t-seann nòs ach 's e diofar seòrsaichean rithim. Bidh mise a' dèanamh òrain anns an t-seann nòs a bharrachd air a' bhàrdachd anns an nòs ùr, agus tha fhios 'am gu feum na ruitheaman a bhith rèidh le chèile airson òran. Ach ann am bàrdachd anns an nòr ùr, tha thu a' coimhead airson ruitheaman cuideachd.

Ma tha rud mì-chofhurtail ri ràdha, tha fios agamsa nach eil e ceart dhòmhsa. Feumaidh mi atharrachadh gus am faigh mi ruitheam ceart. Is mar sin, tha e na phàirt den dòigh anns a bheil na faclan air an cur sìos air pàipear, a' dol bho loidhne gu loidhne. Cleachdaidh mi beàrn seach puing, mar gum biodh. Ma tha beàrn eadar faclan, gabh tàmhan beag fhad 's a tha thu ga leughadh is rudan mar sin.