Mar a bhios a' bhana-bhàrd a' sgrìobhadh

Mar as tric, tha mi a' tòiseachadh le ìomhaigh. Tha mi a' faicinn rudeigin no a' cluinntinn rudeigin agus a' smaoineachadh gum biodh sin na dheagh ìomhaigh air rudeigin eile. Agus glè thric tha mi làithean no fiù 's seachdainean 's tha an rud a tha seo a' dol mu chuairt nam eanchainn. Mar gum biodh dè, ciamar a tha mi dol ga chleachdadh, dè na facail a tha mi dol a chur ri chèile? 'S ann ainneamh a tha rud a' tighinn a-mach anns a' bhad. Glè thric tha dhà no trì làithean, no uaireannan seachdainean mus cuir mi peann ri pàipear agus mus bi mi riaraichte leis an rud a th' agam. Uaireannan tha rud dìreach a' tighinn thugam agus tha mi ga sgrìobhadh sìos ach mar as trice, tha mi a' tòiseachadh le ìomhaigh agus ag obrachadh a-mach bhon sin.

Aon uair 's gu bheil mi fhìn riaraichte leis an dàn, tha mi ga fhàgail mar a tha e ach a-mhàin le aon dhàn a rinn mi, Leasachadh. Tha loidhne faisg air an deireadh: Cha sheinn uiseag tuilleadh sàbhailte nam gheug. Agus b' ann nuair a leugh i e, thionndaidh mo mhàthair rium, 's thuirt i, "Ist, oinnsich, nach eil fhios agad nach bi uiseagan ann an craobhan ann!" 'S dh'atharraich mi e gu isean! Ach a bharrachd air an sin, tha mi dìreach gam fàgail mar a tha iad.

Uaireannan, b'fheàrr leam gum bithinn air a chur ann an dòigh eadar-dhealaichte ach tha mi a' smaoineachadh gu bheil e mar phàirt dhen obair a bhith ag ionnsachadh bho rudan agus tha mi a' dèanamh barrachd smaoineachaidh a-nise mus cuir mi rud ann an clò: a bheil mi dha-rìribh riaraichte leis agus a bheil mi air smaoineachadh mu dheidhinn ceart, na bha mi nuair a bha mi na b' òige. Ach b' e sin a rinn mi aig an àm agus tha mi dìreach ga fhàgail mar a bha e.