Filannoo Keeniyaa 2022: Lammileen Keeniyaa bu'aa filannoo eeggachaa jiru

Haguuggii Tamsaasa Kallattii

1. 9 Hagayya 2022Filannoon Keeniyaa filannoowwan baasii guddaan itti bahee addunyaa keessaa tokko

   Filannoo Keeniyaa har’a gaggeeffamu seenaa biyyatii keessatti filannoo dorgommii cimaan itti taasifamu akka ta’u eegama.

   Keessattuu Iti-aanaa Pirezidaantii Wiiliiyam Ruutoo fi hogganaa paartii mormituu kan ta’an Raayilaa Odiingaa jidduutti dorgommii cimaan akka jiraatu eegama.

   Waggoota darban 10’f biyyattii kan hogganan pirezidaantii Uhuruu Keeniyaataan itti-aanaa isaanii gara kallattiitti dhiibuun hogganaa paartii mormituu kan ta’e Raayilaa Odiingaaf deeggarsa kennuun falmisiisaa ta’eera.

   Dhimmoota filannoon Keeniyaa bara kanaa adda taasisan keessaa tokkoo baasiin olaanaan itti bahusaati.

   Namoonni miiliyoona 22 ol filachuuf kan galmaa’an yoo ta’u, kanneen filachuuf gahumsa qaban namoota shan keessaa afur sagalee kennuuf galmaa’aniiru.

   Filannichaafis doolaara miiliyoona 383 kan ramadame yoo ta’u, kannaanis tokkoo tokkoo nama filatuutti doolaa 17tu baasii ta’a jechuudha.

   Baasiin kunis kan Ameerikaa UK’tti filannoof ramadamee ni caala.

   Filannoo hara gaggeeffamunis pirezidaantii waggoota shaman dhufu biyyattii dursani ni filatamu. Kanaafis guutuu biyyattii keessa naannooleen buufataalee filannoo 290 fi buufatnni filannoo 46,000 ol qophaa’aniiru.

2. 9 Hagayya 2022Bu'aan filannoo sirrii taanaan fudhachuuf qophaa'eera - Ruutoo

   Pirezidantiin Itti-aanaa Keeniyaa Wiliyaam Ruutoo bu'aa filannoo adeemsa sirriifi haqa-qabeessa ta'e hordofe fudhachuuf qophii akka ta'an gaazexeessitootatti himan.

   Rakkoon kan uumamu yeroo sagalee kennan osoo hin taane, uummanni bu'aa filannoo fudhachuu diduu irrattidha jedhan Ruutoon.

   Seenaa filannoo Keeniyaa keessatti kaadhimamtoonni hundumtuu bu'aa filannoo kanaa fudhachuudhaaf fedha qabaachuu agarsiisuun isaanii filannoo kana irratti jedheen yaada jedhan itti dabalauun.

   "Ani kun adda ta'a jedheen yaada. Nagaa ta'as jedheen yaada. Uummata biyyattii gara tokkotti fidnee ajandaa uummanni Keeniyaa filateef hojiirra oolchuu qabna," jechuun dubbatan.