lakkoofsi namoota Covid-19'n qabamanii olaanaan Itoophiyaatti galmaa’e

Haguuggii Tamsaasa Kallattii

1. 8 Waxabajjii 2020US'tti du'aatiin guyyaa 700 gadi bu'e

   Saatii 24 darban keessa Ameerikaa keessatti namoonni dhibee koronaavaayirasii waliin walqabatee du'an 691 bu'uun himame.

   Kun ammoo kan torban darbe galmaa'e waliin yeroo wali biratti ilaalamu isa gadi bu'aadha.

   Yeroo weerarri biyyattii keessatti baayyee ol ka'ee ture wallakkeessa Eblaa keessa guyyaatti namoota 3,000 ta'anitu guyyaatti du'a ture.

   Walumaagalatti, Ameerikaa keessatti namoonni 110,000 Covid-19n du'anii, kanneen miliyoona 1.9 ta'an ammoo vaayirasichaan qabamaniiru, akka ragaan Yunvarsiitii Joon Hopkiinsi irraa argame mulliseetti.

2. 8 Waxabajjii 2020Tamsaasni kallattii Waxabajji 08, 2020 jalqabeera

   Akkam jirtu hordoftoota BBC Afaan Oromoo?

   Tamsaasni keenya kallatti kan ittiin odeeffannoo biyya keesssaafi guutummaa addunyaa qiqixeessinee isinin geenyu kunoo amma jalqabeera.

   Harka dhiqachuufi maaskii godhachuu hin dagatiinaa.

   Aaga'a Dhaga'aa oolaa!

3. 7 Waxabajjii 2020Ministirri Fayyaa Jarman ‘Tibba weeraraatti waliitti qabamuun na yaachiseera’ jedhan

   Ministirri Fayyaa Jarman Jeensi Ispaahn namoota mormii farra jibba sanyummaatiif hiriira gaggeessuuf daandiitti bahan akka fageenyasaanii eeggatan, gaafachuun, tibba kanatti walitti qabamuun baayyee na yaachiseera jedhaniiru.

   Ministiriichi itti dabaluunis ummatichi akka maaskii kaawwatuufi wal waliif illeen of eeggannoo taasisuuf gaafataniiru.

   ‘‘Qabsoon jibba sanyummaarratti gaggeefamu murtoo hunda keenyaa kan gaafatuudha’’ jechuunis fuula tiwitara isaaniirra barreessaniiru.

   "Garuu tibba weeraraa kanatti ummanni baayyee akkasiin walitti qabamuun baayyee na yaadeesseeras,’’ jedhaniiru.

   Hiriirri deegarasa ‘Lubbuun nama Gurraachaalubbuudha’ jedhuuf deeggarsa agarsiisuuf guyyaa Sanbataa Jarman keeessatti gaggeefamee baayyeen isaa nagaa qabee yoo ta’u, Barliin fi Haamburgiitti looltoonni daandii cufanii turan.

   Jarman keessatti namoonni 185,000 vaayirasichaan qabamunsaanii kan mirkanaa’e yoo ta’u, 8,685 du’usaanii odeeffannoon Yunvarsitii Joons Hopkins irraa argame ni mullisa.

4. 7 Waxabajjii 2020Itoophiyaatti lakkoofsi namoota Covid-19n qabamanii 2,000 caaleera

   Sa'atii 24 darbe keessatti namoonni 6092 koronaavaayirasiif qoratamanii namoonni 86 dhibichaan qabamuunsaanii mirkaneessuu Ministeerri Fayyaa beeksiseera.

   Kanaanis lakkoofsi namoota hanga ammaatti biyyattii keessatti Covid-19 qabamanii 2020 ga'eera.

   Namoota qabaman kunneen keessaa 51 dhiira yoo ta'an 35 dhalaadha.

   Hunduu lammiilee Itoophiyaa yoo ta'an, umriin isaanii waggaa torbaa hanga 82 gidduu kan jiruudha.

   Namoota haaraa qabaman kanneen keessaa 66 magaalaa Finfinnee, 7 naannoo Oromiyaa, 7 naannoo Tigraay, afur uummattoota Kibbaa, tokko naannoo Amaaraa fi kan biraa tokko bulchiinsa magaalaa Dirree Dhawaa irraati.

   Gama kaaniin namoonni torba vaayirasiin kan lubbuu dhaban yoo ta'u hanga ammaattis walumaa galatti namoonni 27 du'aniiru.

   Kanneen kaleessa vaayirasicharraa dandamatan 63 dabalatee hanga ammaatti namoonni 344 dandamataniiru.

5. 7 Waxabajjii 2020Addunyaarratti baayyinni namoota Covid-19n du’anii kuma 400 caale

   Addunyaarratti saffisaan babal'ataa kan jiruu dhibeen koronaavaayirasiitiin lakkoofsi namoota lubbusaanii dhaban kuma 400 caaluu Yunivarsitiin Joons Hopkiinsi beeksiiseera.

   Namoonni Covid-19'n qabamunsaanii mirkanaa’e miliyoona 6.9 gaheera. Gama biraatiin ammoo namoota vaayirasichaan qabaman keessaa kanneen miliyoona 3.4 ta’an dhukkubicha irraa bayyanachunsaanii barameera.

   Vaayirasiin baatii Muddee darbe keessa Chaayinaa bulchiinsa Wuhaanitii ka’unsaa himame ardii Afriikaatti qaxxaamuruun namoonni 183,760 vaayirasichaan qabamaniiru.

   Akkuma biyyoota biroo Afriikaattis namoonni 81,498 ta’an dhiibee kanarraa bayyanataniiru.

   Haata’u malee, ardiiwwan addunyaa biraa waliin yoo walibira qabamu, Afrikaatti namoonni vaayirasii Kanaan du’an gadaanaa yoo ta’u, hanga ammattis namoonni 5,060 lubbuusaanii dhabuun himameera.

6. 7 Waxabajjii 2020Godina Kafaatti namoota du'an irratti Covid-19 argamunsaa yaaddoo uumee

7. 7 Waxabajjii 2020Lakkoofsi namoota Covid-19'n du'anii 400,000 darbe

   Addunyaarratti lakkofsi namoota weerara koronaavaayirasiin du'anii 400,013 qaqqabuu ragaan yuunvarsiitii Joon Hopkiins mul'ise.

   Yuunvarstoonni Ameerikaa wayita weerarri dhibichaa mul'atee egalanii galmeessaa turan lakkoofsi namoota vaayrasichaan qabamaniis miliyoona 6.9 ol qaqqabuu ibsamiiru.

8. 7 Waxabajjii 2020Chaayinaan talaallin Covid-19 akka hin argamne faana balleessaa jirti’ jechuun senetarri Ameerikaa himatan

   Senetarri Rippaabilkaanotaa Riik Iskoot Chaayinaan talaalliin Covid-19 akka hin argamne ‘baleessaa jirtii’ jechuun himatan.

   Biyyattin faallaa talaalli hojjachuu hiriirtee jechuun qeequ.

   ''Talaallin kun akka argachuuf adeemsarra jiraatu,adeemsi talaalli barbaadu akka harkifatu mootummaan Koministii Chaayinaan faana balleessaa jira’' jedhan Iskoot.

   Ameerikaa ykn UK fi biyyoonni Awurooppaa biroon yoo talaalli argatan dafanii qoodu, Chaayinaan garuu hin qooddu, kanaafi ragaa basaasaa harkaa qabna jedhu.

   Pirezedantiin Chaayinaa Shi jinpiing garuu biyyisaanii dursitee talaallii yoo argatte addunyaaf akka qooddu dubbataniiru.

   ‘’Chaayinaan talaallichi biyyoota guddachaa jiran akka qaqqabuuf mirkaneessuuf ni hojjatti’ jedhan Pirezedantichi.

   Weerara Covid-19 addunyaarratti to'achuurratti Ameerikaa fi Chaayinaan dabaree wal himachaa turuun ni yaadatama.

9. 7 Waxabajjii 2020Ministirri Muummee Abiy boru gaaffii paarlamaarraa dhiyaatuuf deebisu

   Ministirri Muummee Itoophiyaa Abiy Ahmad(PHD) galma waajira ministira Muummee keessaatti argamu yaa’ii addaati jedhame kan waggaa shanaffaa ta’uuf jira.

   Boru ganamarraa eegale miseensonni mana maree bakka bu’oota Uummataa gaaffilee fi yaada kaasanirratti ibsa akka kennanitun eegama. Biyyattiin sababa weerara Covid-19'n labsii namoonni akka walitti hin qabamne daangessuu labsuun ni yaadatama.

10. 7 Waxabajjii 2020Biraaziil ragaa koronaavaayirasii hanga yoonaatti jiru balleessite.

    Weerara koronaavaayirasiitiin addunyaarraa sadarkaa lammaffaarra kan jirtu Biraaziil lakkoofsa sa'atii 24'n darban keessa galmeessiterraan kan hafe ragaawwaan Covid-19 hanga ammaatti jiran balleessiteetti.

    Biyyattii keessatti hanga ammaatti namoonni 640,000 caalan koronaavaayirasiin qabamaniiru.

    35,000 kan caalan ammoo hanga ammaatti du'aniiru.

    Yeroo ammaa sa'atii 24'n darban keessatti namoonni 27,075 haaraa qabamuu fi 904 du'uu akkasumas ammoo 10,209 dandamachuu qofa biyyattin ragaa of harkaa qabdi.

    Tarkaanfiiwwan weerara koronaavaayirasiif gorfaman hojiirra oolchuu dhabuusaaniitiin yeroo hedduu qeeqamaa kan turan Pirezidaantiin biyyattii Jair Bolsonaaroo, ragaan hamma ammaatti jiru haala biyyattiin amma keessa jirtu waan hin ibsineef hin barbaachisu jedhan.

    Ministeerri fayyaa ajaja pirezidantichaan ragaa kana balleessuunsaa gaazexeessitootaa fi miseensota kongireesii biyyattiin daran qeeqamaa jira.

    Biraaziil kana kan goote erga guyyoota sadan darbaniif walitti aansuun namoonni 1000 guyyaa guyyaan koronaavaayirasiin du'uu gabaasaa turteen boodadha.

    Biraaziil lakkoofsa namoota Covid-19 qabamaniin UStti aanuun lammaffaadha, lakkoofsa namoota du'aniin ammoo sadaffaarra jirti.

11. 7 Waxabajjii 2020Itoophiyaan hospitaalota haaraa lama Finfinneetti ijaaruuf

    Gabaasi EBC akka mul'isutti haala qabatamaa amma jiruun hanqinni hospitaalaa magaalaa Finfinnee mudateera waan ta'eef mootummaan hospitaalota dabalataa lama haaraa ijaaruuf murteesse.

    Magaalaa Finfinnee keessa hospitaalota mootummaa ja'a qofatu jiru.

    Isaanis dhukkubsattoota 1557 qofa keessummeessuu danda'u.

    Lakkoofsa kana ol guddisuu fi tajaajila fooyya'aa kennuuf hospitaalonni lama bulchiinsa magaalaa Kolfee Qaraaniyoo fi Nifaas silki laaftoo keessatti ni ijaaramu jedhameera.

    Hospitaalonni lameen wayita ijaaramanii xumuraman dhukkubsattoota 940 keessummeessuu danda'us jedhameera.

    Akkaataa ijaarsaa fi dizaayinii hospitaalota haaraa ijaaramuuf jedhanii irratti Ministirri Fayyaa Dr Liyaa Taaddasaa, Kantiibaa Itti Aanaan Bulchiinsa Magaalaa Finfinnee Injinar Taakkalaa Uumaa fi qaamoleen dhimmi kun ilaallatu hundi mari'achaa jiru jechuun Addis TVn gabaaseera.

    Maallaqi hospitaalli kun ittiin hojjetamuu fi hospitaalichi yoom eegalamee akka xumuramu garuu wanti ibsame hin jiru.

12. 7 Waxabajjii 2020Xaaliyaanitti deebiin mootummaan Covid-19'f kenne mormuunn hiriirri gaggeeffame

    Xaaliyaanitti deebii mootummaan biyyatti weerara Covid-19 ni hirrisa jedhee kenne mormuun hiriirri harbeessitoonni ‘far rights’ jedhamaniifi deeggartoonni kubbaa adda babayiitti gaggeessan gara hokkaraatti geeddarameera.

    Hokkarri Magaalaa guddittii Room keessatti eegale kunis erga walitti bu’iinsi namoota hiriiraaf bahan jidduutti umamee booda jedhameera.

    Namoonni hiriirarra turan tokko tokkoos dhakaa, qaruuraafi boombii imimmaanneessaa gara poolisii, gaazexessitootaafi namoota suuraa kaasaa turaniirratti darbataa ‘gaazexeessaan shororkeessaadha’ jechuun iyyaa akka turan AFP gabaaseera.

    Poolisiinis haallicha qabaneesuuf bishaaniifi aara imimmaanneessaatti kan fayyadame yoo ta’u hedduunis hidhamaniiru jedhameera.

    Namoonni mormiidhaaf adabaabayiitti bahanis tarkaanfii motummaan weeraricha ittisuuf fudhate mormuun haala Kanaan walqabatee kufaatii dinagdee fi carra hojii irratti dhiibbaa taasifameef motummaan aangoo akka gadhiisuu gaafachuuf ture.

    Xaaliyaan keessatti namoonni kuma 234 ol vaayirasichaan kan qabaman yoo ta’u, kan 33,800 ol ta;an ammo du’aniiru.

    Kanaanis Xaaliyaan biyya addunyaa garmalee vaayirasichaan miidhamte taatee jirti.

13. 7 Waxabajjii 2020Daandiin guddichi Waayit Haawusitti geessu ''Black Lives Matter''n mogga'e

14. 7 Waxabajjii 2020Hospitaalli Naqamtee qaamolee nageenyaa mootummaan dhiibbaan irra gahuu himate

    Ogeeyyiin fayyaa Hospitaala Naqamteefi Waldaan Hakiimotaa Oromiyaa dhiibbaan hin malle qaamolee nageenyaan ogeeyyii fayyaa fi dhaabbilee fayyaarra gahu akka dhaabatu gaafatan.

    Hospitaalli magaalaa Naqamtee bakka aarii itti ibsatan erga tahee bubuleera jedhan hojjetaan hospitaalichaa maqaan isaanii akka ibsamu hin barbaanne tokko.

    Namni BBC'n dubbise ''namni tokko qaama nageenyaa keessaa yoo rukutamee hospitaalicha galu miseensotni qaama geenyaa kaan miiruma aariin akka barbaadanitti hospitaala isaanii galuun ogeessota akka dhiphisaniifi dorsisan'' himan.

    Baliina odeessa kanaa dubbifachuuf geessituu kana cuqaasaa: Hospitaalli Naqamtee qaamolee nageenyaa mootummaan dhiibbaan irra gahuu himate

15. 7 Waxabajjii 2020Lammii Itoophiyaa ogummaa isheetiin Jarman deeggaraa jirtu

16. 7 Waxabajjii 2020Hiriirri jibbiinsa sanyummaa balaaleffatu kutaalee US’tti itti fufeera.

    Hiriirri jibbiinsa sanyummaa fi gocha suukanneessaa poolisii US balaaleffatu kutaalee biyyattii keessatti guyyoota 12ffaaf itti fufeera.

    Namoonni kumaatamaan lakkaa’aman magaalaa Waashingtan DC keessatti hiriirri gaggeessan hiriira hanga ammaatti gaggeeffaman keessaa isa guddicha jedhameera.

    Hiriirri guddaan magaalota akka Niw Yoorki, Chikaagoo fi San Firaansiiskoo keessattis gaggeeffameera.

    Kaarolaayinaa Kaabaattis uummanni hedduun walga’uun gurraacha poolisii adidhaan hiraarfamee ajjeefameef kabaja qaban ibsaniiru.

    Erga namni gurraachi Joorji Filooyid jedhamu poolisiidhaan hiraarfamee ajjeefamee torbanoota lamaan darban keessatti hiriirri mormii gocha suukanneessaa humnoota nageenyaa balaaleffatu US irra darbee kutaalee addunyaa hedduu keessatti itti fufeera.

    UK, Awustiraaliyaa, Jarmanii, Ispeen fi biyyoota Afriikaa keessatti hiriirri mormii gaggeeffameera.

17. 7 Waxabajjii 2020Tamsaasa keenya kallattii kunoo eegalleerra.

    Kabajamtoota hordoftoota BBC Afaan Oromoo tamsaasa keenya kallattii kan Waxabajjii 07, 2020 kunoo eegaleeera.

    Odeessaalee biyya keessafi kan biyya alaa gaggabaabsinee isin biraan geenya, nu hordofaa.

    Dilbata gaarii akka qabaattan hawwina!

18. 6 Waxabajjii 2020Wayita addunyaan Covid-19n raafamaa jirtutti Chaayinaan hojii idileesheetti deebitee?

19. 6 Waxabajjii 2020UK’tti tajaajila kunuunsa Covid-19 mannatti taasifamuuf daballi gatii gaafame

    Uk’tti tajaajilli manneen kunuunsa keessatti dhukkubsattoota Covid-19’f kennamuuf gatii daballii gaafatamaa jiraachuun dhagahame.

    Maanguddoonni manneen kunuunsaa UK keessatti argaman tokko tokkosdabalataan baasii weerarichaan walqabatuuf paawundii 1000 akka kanfalaniif gaafatamu dhagahame.

    Dhaabbanni tola oltummaa ‘Chairty Age Uk’ akka jedheetti, jiraattoonni baasii ofiin isanii kanfalatanis kanfaltii ittisa dhukkubchaafi daballii hojjattootaaf ooluu akka kanfalan taasifamaa jiru.

    Kunis ‘namoota dhukkubsataa jiraniif’ tibba weeraraa kanatti ‘miidhaarrati soogida dabaluudha’ jedheera dhaabbanni tola oltummaa kuni.

20. 6 Waxabajjii 2020Itoophiyaatti namootni haaraan 129 Covid-19’n yoo qabamu, namni tokko lubbuu dhabe