Янгиликлар: Россияда нималар бўлмоқда? Ўзбекистонга таъсири бўладими? Rossiya O‘zbekiston Dunyo Yangiliklar

Вазият шунчалик хавотирлими?

Алоқадор мавзулар:

Рублга нималар бўлмоқда?

Пайшанба куни рубль кескин арзонлади.

Рублнинг курси ўтган йил апрель ойидаги қадар тушиб кетди.

Россия, йилларки, миллионлаб ўзбекистонликлар учун энг йирик меҳнат бозори саналади.

Улар ҳар йил ортга юборувчи миллиардлаб долларлик маблағлар эса, Ўзбекистон ва ўзбекистонликлар учун муҳим.

Аксарият аҳолиси ижтимоий ва иқтисодий вазият оғир бўлган чекка қишлоқ ҳудудларида яшовчи Ўзбекистонда катта сондаги одамнинг тирикчилиги худди шу пуллар орқасидан ўтади.

Ўзбекистон ҳукумати учун, йилларки, ижтимоий ҳимоя камари вазифасини бажариб келади.

Пайшанба куни эса, Россияда долларнинг қиймати 81, евроники 89 рублдан ошди.

Кун давомида ҳар икки валюта ҳам 1,5 рублдан қимматлади.

Иқтисодчиларга кўра, рублнинг кескин қадрсизланишига бир эмас, бир қанча омиллар таъсир қилган.

Уларнинг айтишларича, иқтисодий реаллик ўзгарган, янгича шароитда эса, рубль йирик ўзгаришларга сезгир бўлади.

Рублнинг қадри билан боғлиқ сўнгги янгилик эса британ ширкати бўлмиш Shell нинг Россиядан чиқиб кетиши манзарасида кузатилган.

Shell "Сахалин-2" лойиҳасидаги иштирокига якун ясаган.

Вазият қанчалик жиддий?

Ҳафта бошидан буён доллар 5% дан кўпроққа қимматлаган: ҳали душанба куни доллар курси 77 рублдан ортган, пайшанба куни кечқурун эса, 81 рублга етган.

Худди шу вақт оралиғида евронинг қадри эса, долларникидан ҳам ошиб кетган, 10 рублга кўтарилган ёки қарийб 13 фоизга қимматлаган.

Ҳар икки валютанинг ҳам қиймати ўтган йилнинг апрель ойидагисига етган.

У пайтда Украина уруши рублнинг қулашига сабаб бўлган, бунинг ортидан Россия Марказий Банки миллий пул бирлиги қадрини кўтаришга тушиб кетган.

Регуляторнинг ҳаракатлари ва импортнинг кескин пасайишигина рублнинг ўзини ўнглаб олишига ёрдам берганди.

Аммо ҳозирги вазият ўтган йил апрелдагисидан фарқли.

Чунки импорт ўсиб бормоқда, экспорт даромадлари эса пасаймоқда - омилларнинг қоришиқлиги аниқ рубль фойдасига эмас.

Бу сиз 2022 йил ёзидаги рекордларни унутишингиз мумкинлигини англатади.

Рубль ўзини ўнглаб оладими?

"Ренессанс Капитал" Бош иқтисодчиси Софья Донец фикрича, рубль курсининг ҳозирги даражада қолишини кутиш учун фундаментал асослар йўқ.

"Бундай бўлиши учун импорт ҳажми, нефть нархи сезиларли даражада тушган бўлиши керак. Аммо ОПЕК+ қарори сабаб, апрель ойининг охиридан, аксинча, нефть нархининг ошишига гувоҳ бўламиз. Шунинг учун ҳам, рублнинг заифлашиши вақтинчалик ҳолат, деган ўйдамиз", - дейди иқтисодчи.

"Эксперт РА" Бош иқтисодчиси Антон Табахнинг башоратича, рубль шу ой охири ва май ойи бошларидан бошлаб яна ўзига қайтиб қолади.

Акс-садолар

Худди шу каби хабарлар манзарасида Тожикистон пули Россия рублини "урган".

Кеча, 6 апрель куни минг рубль 137 сомонийга тенглашиб қолган.

Сомонийнинг рублга нисбатан курси Тожикистонда ҳам кўпчиликни қизиқтиради.

Чунки аксариятнинг тирикчилиги яқинлари Россиядан юбораётган пул орқасидан ўтади.

Бу пуллар эса, етти йилдирки, Тожикистон банкларида фақат сомонийда берилади.

Турли манбаларга кўра, ҳозир Россияда бир миллиондан ортиқ тожикистонлик яшаб, меҳнат қилади.

Россия рублининг қадрсизланиши билан боғлиқ хабар ижтимоий тармоқлардаги акаунтларимизда ҳам кўпчиликнинг эътиборини тортган мавзулардан бири бўлган.

Турсунпўлат Отамуродов, "Россиядаги мигрантларимизга қийин бўлади, албатта", деб ёзган.

Лара Кенделнинг коментида айтилишича, буни "мусофирда меҳнат қилиб, бирим икки бўлсин, деганлар тушунади". Фолловеримиз шундай дер экан, ўзининг коментига "Рубль қадри албатта кўтарилсин. Илоҳим баракасини берсин. Қанчадан-қанча мусофирлар меҳнати сариқ чақа бўлиб қолаяпти", дея якун ясаган, дуога қўл очган эможи тасвирини ҳам илова қилган.

Ботя эса, "Рубль билан долларнинг қадри сўм билан тенг бўлиб қолсин илоҳим", деган.

Сарварчик Зокиров, "Инша Аллоҳ, кўтарилиб қолар", дея умид билдирган.

Наврузбек Кабилов эса, "Рубль кўтарилсин, доллар йўқолсин", дея комент қолдирган.

Нафиса Собирова эса, "Албатта қаршимиз рубль тушишига. Доллар тушиб кетса, хурсандмиз, чунки ҳамма нарса арзон бўлади", дебди.

Файзулло Ражаббоев, "Яхши бўларди кўтарилганида, иншааллоҳ, кўтарилиб қолар", деб ёзган бўлса, Мастура Омонова, "мусофирларга қийин бўлади, қанчадан-қанча юртдошларимиз ишлайди", дея комент қолдирган.

Исроилжон Шомуродов эса, "Рублнинг қулаши Ўзбекистон иқтисодига ва аҳолига зарар", деган.

Бошқа бир фолловеримиз, "Иложи бўлса, рубль миллионга кўтарилсин. Яхши ниятда атай пул йиғаяпман. Менга келганда пастламай тур, рублжон", деб ёзган.

Бунга жавобан қолдирган коментда эса, "ақлингиз борида сотиб қутилинг", дейилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek