Янгиликлар. Украина: Путин Зеленскийни нима қилмоқчи? Rossiya Ukraina Putin Dunyo Yangiliklar

Россия президентининг режаси маълум бўлди.

Алоқадор мавзулар:

Исроил собиқ Бош вазири Украина ишғолининг бир йиллиги арафасида кутилмаганда Путин билан суҳбати тафсилотларини очиқлади.

Нафтали Беннетнинг маълум қилишича, Путин ўзига Зеленскийни "ўлдирмаслик"ка ваъда берган, унинг ҳаётини кафолатлаган.

Расмий Киев эса, Кремлнинг ваъдаларига ишонмасликка чақирмоқда.

Уларнинг баён қилишича, Россия президенти бундан аввал берган ваъдаларига вафо қилмаган, бузган.

Исроил Бош вазири бир неча соатлик суҳбатини ўзининг YouTube каналига жойлаштирган.

Нафтали Беннет Москвага ўтган йили март ойида борган, Путин билан уч соат мулоқот қилган.

Бу Украина ишғоли ортидан Путиннинг бир хорижий давлат раҳбари билан илк учрашуви бўлган.

Ташриф яҳудийлар учун муқаддас кўрилувчи Шаббат пайтига тўғри келган.

Беннет Путин билан учрашувининг бу қисмини қуйидагича келтириб ўтган: "Мен ундан: "Нима бўлаяпти? Зеленскийни ўлдиришни режалаштираяпсизми?", - деб сўрадим. У менга "Зеленскийни ўлдирмайман", - деб жавоб берди. Кейин мен унга, "Менга Зеленскийни ўлдирмасликка ваъда берганингизни аниқ билишим керак", - дедим. У, "Мен Зеленскийни ўлдирмоқчи эмасман", - деди.

Беннетнинг сўзларига кўра, машинада Москва аэропортига кетаркан, ҳали йўлдаёқ Зеленскийга қўнғироқ қилган, унга Путиннинг ваъдаси ҳақида айтган.

"Ҳозиргина (Россия президенти билан - таҳр.) билан учрашдим, у сизни ўлдирмайди", дедим. У мендан, "Ишончингиз комилми?", - деб сўради. Мен, "100 фоиз, ўлдирмайди", - дедим.

Беннетнинг таъкидлашича, учрашув чоғида Россия раҳбари Украинани қуролсизлантиришдан воз кечишга рози бўлган.

Унга кўра, Зеленский ҳам кейинроқ ўзига НАТОга кириш режаларини қайта кўриб чиқишга ваъда берган.

Исроил собиқ Бош вазирининг баён қилишича, Украина ва Россия ўртасидаги музокаралар Ғарбнинг тўсқинлиги боис тўхтаб қолган.

Аммо Беннет Бучада рус ҳарбийлари тинч аҳолини қирғин қилгани маълум бўлгач, томонлар ўртасидаги ҳар қандай маслаҳатлашув ўзининг маънисини йўқотганини ҳам таъкидлаган.

Украина расмийлари орада Россиянинг Украина президентига қарши суиқасд уринишлари ҳақида бир неча бор айтиб чиқишган.

Бу ҳақда Володимир Зеленскийнинг ўзи ҳам гапирган.

Кремль Зеленскийга суиқасд уюштирилгани ҳақидаги даъволарни изоҳламаган.

Беннет бундан аввал ҳам кенг кўламли урушнинг илк ҳафталарида Россия ва Украинани қандай яраштиришга урингани ҳақида айтиб берган.

Унинг сўзларига кўра, босқиндан бир неча кун ўтиб, Путин украиналиклар ўзига айтишганидан кўра, "матонатлироқ" чиқиб қолишганини эътироф этган.

Аммо, маълум бўлишича, Россия президенти ўшанда ўзларининг "катта давлат" ва "сабрли" эканликларини айтиб, Исроил собиқ Бош вазирини огоҳлантирган.

Путин яна қўрқитди

Путин яна ўз сўзини айтди. Украина нимадан қўрқаяпти?

Бу уруш Россия учун ва-банк урушими? Путин енгилса, қулайдими - видео.

Алоқадор мавзулар:

Путин Украина ишғолини фашистлар Германиясига қарши курашга қиёслади.

Россия президенти илк бор Германиянинг Украинага танк бераётганига ўзининг муносабатини билдирди.

Жонли узатилган чиқиши чоғида "Тарих ўзини такрорлаётгани"ни айтди.

"Ақл бовар қилмайди, аммо бу ҳақиқат. Бизга яна немис Leopard танклари таҳдид солмоқда", - деди Россия президенти.

Унинг сўзлари Сталинград жангидаги ғалабанинг 80 йиллиги тантаналари чоғида янгради.

Бу Иккинчи Жаҳон урушидаги энг йирик жанглардан бири, деб кўрилади.

Урушда туб бурилиш ясаган жанг сифатида эътироф этилади.

Украинага ўз ҳудудини ҳимоя этишда кўмаклашаётган давлатлар кўп. Германия эса, улардан бири.

Россия Украинага бостириб кирганига яқинда роппа-роса бир йил бўлади.

Путин эса, ўзининг мазкур қарори билан Ғарбни Украинага ҳар томонлама кўмак беришга ундаган.

Ғарб Украинага катта миқдорда қурол-яроғ беришга ҳам ўтган.

Волгоградда сўзларкан, Путин яна бир бор оддий қуроллар билан кифояланиб ўтирмаслигига ишора қилган.

"Россияни жанг майдонида мағлуб этишга умид қилаётганлар биз билан замонавий уруш улар учун буткул бошқача бўлишини тушунишмайди, шекилли", - дея гап бошлади ва "Биз ўз танкларимизни уларнинг чегараларига жўнатмаймиз. Аммо жавоб бериш учун бизда имконият бор. Бу биргина зирҳли техникадан фойдаланиш билан чекланиб қолмайди. Буни ҳамма тушуниши керак", - деб айтди Путин.

Матбуот котиби эса, Путин бу билан нима демоқчи бўлганига батафсил тўхталишдан бош тортди, журналистлар бу хусусда тўлиқ изоҳ бермади.

Дмитрий Песков фақат, "коллектив Ғарб томонидан янги қуроллар етказилар экан, Россия бунга жавоб бериш учун ўз салоҳиятидан кўпроқ фойдаланишини" айтди.

Путин Мамаев қўрғони ва Пискаревский қабристонига гулчамбарларни бир ўзи қўйгани ҳам Волгораддаги тантаналар билан боғлиқ кўпчиликнинг эътиборига тушган воқеълик бўлди.

Украина хавотирда...

24 февраль куни Украина ишғолига роппа-роса бир йил тўлади.

Украина Мудофаа вазирининг айтишича, Россия худди шу куни катта эҳтимол билан яна кенг кўламли ҳужумга ўтишга уринади.

Олексей Резниковнинг фикрича, россияликлар рамзлар билан яшашади. Шу боис ҳам, ишғолнинг бир йиллик санасини қандайдир қилиб "нишонлаш"га ҳаракат қилишади.

Украина Мудофаа вазирлиги тахминича, Россия 300 минг эмас, 500 мингга яқин аскарини сафарбар этган.

Олексей Резниковдан аввал Украина Миллий хавфсизлик ва мудофаа кенгаши раҳбари ҳам худди шундай огоҳлик билан чиққан.

Алексей Данилов ҳам 2022 йилнинг 24 февралида бўлгани каби Россия ишғолнинг бир йиллик санаси куни Украинага шимол, жануб ва шарқдан кенг кўламли ҳужум уюштиришга уриниб кўриши мумкинлигини айтганди.

Ғарбдаги ҳарбий экспертлар ҳам Украина томонининг хавотирлари билан якдил.

Украина разведкасининг маъмулотларига кўра, Путин ўз ҳарбийларидан Донбассни ёзга қолмай босиб олишни талаб қилган.

Американинг Урушни ўрганиш институти ҳам яқинда Москва қатъий чоралар кўриши ва Украина шарқида катта ҳужум бошлаши мумкинлигини айтганди.

НАТО Бош котибининг таъкидлашича, Путиннинг ҳарбий мақсадлари фақат Украина шарқи билан чекланишининг ҳеч бир аломати йўқ.

Аввалроқ Bloomberg ҳам ўзининг манбаларига таяниб, Россия Бош штаби шу йилнинг февраль ёки март ойларида Украинага янги ҳужум уюштириш режасида экани ҳақида ёзганди.

Сўнгги огоҳлантиришлар Украина жануби-шарқида вазият кескинлашган бир пайтга тўғри келаётир: ҳозир Донбасс қақшатқич жанглар ичида.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.