Украина: Медведев 'Қиёмат қойим' билан огоҳлантирди, ‘Время’да плакат кўтариб чиққан Овсянниковани яна ушлашди, Украина президенти ўз дўстини ҳам ишдан четлатди Ukrainа Rossiya Putin Yangiliklar

Украина Қримга ҳужум қилса ҳоли вой бўладими? Россиянинг Биринчи канали собиқ ходимаси яна нима иш қилди? Украинада Миллий Хавфсизлик хизмати раҳбари ва Бош прокурор ишдан кетди. Зеленский нимадан норози?

Таҳлил:

Украина ўзини Россия тажовузидан қандай ҳимоя қила олади?

Алоқадор мавзулар:

Кутилмаган қарор?..

Владимир Зеленский Украина Миллий Хавфсизлик хизмати раҳбари ва мамлакат Бош прокурорини ишдан олди.

Украина президенти бу икки қудратли ташкилотда давлатга хиёнат ҳоллари кўп эканини айтди.

Унга кўра, мамлакатнинг Россия ишғоли остидаги ҳудудларида 60 дан ортиқ ходим ҳозир Украинага қарши ишлаётир.

Украина раҳбарининг маълум қилишича, ҳуқуқ-тартибот ходимларига нисбатан ҳамкорлик ва давлатга хиёнат бўйича жами 651 та иш очилган.

Ишдан четлатилган Иван Баканов ва Ирина Венедиктова ҳозирча жим, Украина президентининг бу қарорига ҳалича бирор бир муносабат билдиришмаган.

Овсянникова яна нима қилди?

Москва полицияси кеча, якшанба куни Биринчи канал собиқ ходимасини яна ушлаган, аммо кейинроқ қўйиб юборган.

Марина Овсянникова шу йил март ойида Россиянинг Украинадаги урушига қанчалик ошкора қаршилик кўрсатгани билан бутун дунёда эътиборга тушган.

У ўз норозилиги ифодаланган плакат билан "Время" дастурининг жонли эфири чоғида кўриниш берганди.

Маълум бўлишича, журналист "Россия Армиясини обрўсизлантириш" билан боғлиқ маъмурий иш доирасида қўлга олинган, уйининг ёнида ушлаб кетилган.

Марина Овсянниковага кўра, баённома унинг 13 июль куни мухолифатчи сиёсатчи Илья Яшинга нисбатан эҳтиёт чораси белгиланаётган пайтда Басманний суди ёнида берган интервьюсига асосланган.

Унинг журналистларга айтишича, ўша интервьюси чоғида "Украинадаги уруш жиноят эканлиги"ни айтган.

"Буни ҳокимиятни жон-жаҳди билан ўз қўлида сақлаб қолишга уриниш"га қиёслаган.

Марина Овсянникова 15 июль куни Украина урушига қарши Кремль яқинида яккахон пикет ҳам ўтказган.

Қўлида кўтариб олган плакатида эса, "Путин қотил. Унинг аскарлари фашистлар. 352 бола ҳалок бўлди. Тўхташингиздан олдин яна қанча бола ўлиши керак?", - деган сўзлар ёзилганини кўриш мумкин бўлган.

Полициянинг билдиришича эса, Овсянникова "Россия Қуролли Кучларининг давом этаётган ҳарбий амалиёти ва Олий Бош Қўмондоннинг ҳаракатларига "очиқчасига салбий муносабатда" бўлган.

Ўзларининг буни "Армияни обрўсизлантириш, деб ҳисоблашлари"ни таъкидлаган.

Иш 21 июль куни Москванинг Мешанский судида кўриб чиқилади.

Қиёмат қойим бўладими?

Россиянинг собиқ президенти ва ҳозир амалдаги Хавфсизлик Кенгаши раҳбари бўлган Дмитрий Медведев огоҳлантирди.

Украинани Қримга ҳужум қилган тақдирда, қиёмат қўпажаги билан огоҳлантирди.

Россия 2014 йил мартида Қримни аннексия қилган.

Расмий Кремль ўтказилган референдумни қримликларнинг хоҳиш-иродаси, дея баҳолаган.

Халқаро ҳамжамият Қримнинг Россияга қўшилишини ноқонуний ва нолегитим, дея таъкидлайди.

Шу пайтгача Қримни Украинага қайтаришни талаб қилиб келади.

Ғарб Қрим аннексияси туфайли ҳам Россияга қарши қатор санкцияларни киритган.

Украинанинг айтишича, Қора денгиздаги Россия ҳарбий кемаларининг катта қисми Қримдан шарқдаги Новороссийск портига кўчирилган.

Расмий Киевнинг бу баёноти Ғарбдаги иттифоқчилари яна узоқ масофага мўлжалланган ракета тизимларини етказиб бериши ортидан янграган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek