Туркия Швеция ва Финландиянинг НАТОга киришига рози бўлди, Эрдўғон нимага эришди? Urush va Tinchlik, Ukraina
Сурат манбаси, Anadolu Agency
НАТО Бош котиби Йенс Столенберг Мадриддаги саммитда Туркия Швеция ва Финландиянинг шимолий атлантика иттифоқига аъзо бўлиш аризасини қўллаб қувватлаганини билдирди. Бу икки давлат музокараларда Эрдўғон талаб қилган шартларга кўнгани маълум бўлди.
"Финландия ва Швеция учун НАТОга эшик очувчи келишувга эришганимиздан хурсандман. Туркия, Финландия ва Швеция Туркиянинг манфаатлари, жумладан қурол-яроғ экспорти ва терроризм билан курашишни ҳисобга олувчи ўзаро меморандум имзолади", деди Йенс Столенберг.
Бу икки давлат Россиянинг Украинага ҳарбий тажовузи манзарасида ўнлаб йил давом этган бетарафлик сиёсатидан воз кечиб НАТО аъзоси бўлишга қарор қилди.
Бироқ уларнинг НАТОга кириш йўлида Туркия тўғоноқ бўлишга ҳаракат қилди. Расмий Анқара мамлакатга замонавий қурол-яроғ олиб киришни тақиқловчи эмбарго ва скандинавия давлатлари Туркия террорист деб билувчи курд жангариларига бошпана беришига норозилик билдирди.
Финландия президенти Саули Ниинисто саммитнинг биринчи куниданоқ келишувга эришилгани ва давлатлар ҳар қандай мамлакатдан таҳдид бўлган тақдирда бир-бирини тўлиқ қўллаб қувватлаши ҳақида қўшма меморандумга имзо чекканини айтди.
Мадриддаги учрашув арафасида Туркия икки скандинавия давлати ва АҚШ билан музокаралар ўтказди ва талабларини Швеция ҳамда Финландияга ёзма равишда етказди. Анқара бу икки давлат аъзоликка қабул қилинишидан олдин ушбу шартларга рози эканлигини билдириши кераклигини талаб қилди.
"Бизга қуруқ гап эмас, балки натижа керак", деди Туркия Президенти Ражаб Тоййиб Эрдўғон НАТО саммитига учиб кетишидан олдин.
Талаблар орасида Туркия террористик гуруҳ деб ҳисобловчи, аммо НАТОга аъзо бўлиб кираётган давлатларда дастакка эга "Курдистон ишчилар партияси" масаласи бор эди.
Швециядаги курд жамоати Мадриддаги музокараларда қурбон қилинишидан хавотир билдирди.
Столтенбергнинг маълум қилишича, келишув доирасида Анқара Туркияда терроримзда айбланган мигрантларни экстрадиция қилиш борасида Швеция ва Финландиянинг розилигини олган.
Сурат манбаси, Getty Images
"НАТОдаги иттифоқчилар терроризмда айбланган одамларни экстрадиция қилиши бу - эзгу амал", деган Столтенберг.
У ўз баёнотида "Курд ишчилар партияси"ни террористик ташкилот деган.
Туркия ҳукумати расмий муносабатда Швеция ва Финландия билан музокараларда "истаган нарсасини олди" деди.
Анқара, шунингдек, Сурияга турк аскарлар бостириб кириши ва Россиядан қурол сотиб олгани муносабати билан Туркияга нисбатан замонавий қурол-яроғ олишга қўйилган тақиқни олиб ташлашни талаб қилмоқда.
Қисман у АҚШ томонидан ваъда қилинган F-16 қирувчи самолётларини етказиш шартномаси қайта тикланишини истайди.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
