Франция ва трансгендер можароси: Макрон хоним кимни ва нега судга беряпти? Дунё, янгиликлар
Сурат манбаси, Getty Images
Франция президентининг умр йўлдоши Брижит Макрон уни трансгендер деб атаган ва эркак бўлиб туғилганини даъво қилаётганларни судга бермоқчи.
Бу фитна назарияси сентябрда ўта-ўнг қанот вебсайтда чоп этилганидан бери ижтимоий тармоқларда тарқалиб кетган.
Мишмишларда Франциянинг биринчи хоними эркак бўлиб туғилгани ва исми Жан-Мишел Трогню бўлгани айтилади.
Бу исм ижтимоий тармоқларда минглаб марта тилга олиниб трендга чиққан.
Аввалги турмушидан уч фарзанднинг онаси Макрон хоним ўз адвокати орқали судга мурожаат қилаётганини билдирди.
"У суд жараёнини бошлашга қарор қилди, бу иш амалга ошириляпти", деди адвокат Жан Энночи AFP хабар агентлигига.
Сурат манбаси, ERIC FEFERBERG/AFP
68 ёшли Макрон хонимнинг жинси ҳақидаги ёлғон хабарлар унинг эри, Президент Эммануэл Макронга қарши бўлган сайтлар, хусусан ўта-ўнг қанот, вакцинага қарши ва QAnon сайтлари орқали тарқатилган.
Француз матбуоти суриштирувлари ўта-ўнг қанот журналда Наташа Рей муаллифлиги остида ёзилган мақолага бориб тақалган. Liberation газетаси ёзишича, мақола сўнгра YouTube'да муҳокама қилиниб, ковиддан шубҳаланувчи ва миллатчи гуруҳларга ёйилган.
Бу Брижит Макроннинг илк марта нишонга олиниши эмас. Унинг эри 2017 йилда президентликка сайланганида троллар жуфтликдаги 25 йиллик тафовутни танқид қилганлар.
Охирги фитна назарияси Франция 2022 йил баҳорида президентлик сайловларини ўтказишга тайёрланаётган муҳитда юзага чиқяпти.
Президент Макрон иккинчи муддатга ўз номзодлигини илгари суришини эълон қилмаган, аммо бу кутилади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: @bbcuzbek
