Россия: Ит ялоғи видеоси билан полиция норозиларни қўрқитиб қўймоқчи Rossiya yangiliklar
Сурат манбаси, Social media
Интернетда владивостоклик блоггер Геннадий Шульганинг боши кучуги ялоғи олдида сўроққа тутилаётгани видеоси тарқалди. Кўпчиликнинг ишонишича, шу йўл билан Россия ҳукумати аксилҳукумат норозилик намойишига чиқишни хоҳлайдиган россияликларни қўрқитиб қўйиш мақсадини кўзлаган.
6 февраль эрта тонгда автоматлар билан қуролланган, юзлари ниқоб билан тўсилган полициянинг махсус бўлинмаси ходимлари Владивосток шаҳрида яшайдиган бир неча фаолнинг уйига бостириб кирганлар.
Бу фаоллар орасида Newsbox24 канали блоггери Геннадий Шульга, "Яблоко" партияси аъзоси Марина Железнякова, сиёсий фаол Максим Хозяйкин, Россия Фанлар Академиясининг биокимё институти ходими Антон Расинлар бўлганлар.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Фаоллар ўзларига худди террорчидек муомала қилингани, таҳқирланганларини сўзлаб берганлар.
Би-би-сининг Россиядаги мухбири Стив Розенберг Москвадан 9000 километрдан зиёд узоқликдаги Владивостокка сафар қилиб, маҳаллий яшовчилар билан суҳбатлашган.
Эрталаб квартирасига қандай бостириб кирганларини ҳикоя қилиб берган Геннадий Шульга, бундан мақсад, мени ва рафиқамни қўрқитиб қўйиш бўлган, дейди.
Интернетда тарқатилган видеода полициячи "нега қўлга олинганинг сабабини биласанми?" дея полда боши ит ялоғи олдида ушлаб турилган Геннадий Шульгадан сўрайди.
"Энди эса менинг видеомни Интернетда тарқатиш билан намойишга чиқмоқчи бўлганларни қўрқитиб қўйишмоқчи. Бизнинг қўлимиздан ҳамма нарса келади, деб огоҳлантиришмоқчи", дейди блоггер.
Хабаровск ўлкаси губернатори Сергей Фургал ёзда ҳибсга олиниб лавозимидан бўшатилганидан кейин кўплаб норозилик намойишлари ташкил этилди, ўша намойишлардан кейин ёш химик Антон Расин шафқатсиз калтакланиб қамоққа ташлангани маҳаллий матбуотда ёритилди.
6 февраль тонгида полициячилар Антон Расин квартирасига ҳам бостириб кириб таҳқиромуз савол-жавобга тутганлар.
"Уйимга бостириб кириб мени ерга ётқизишди. Худди жиноятчидек. Бу ҳақиқий таҳқир ва одамнинг ғазабини қўзғатадиган эди", дейди Антон Расин.
Январь ойида мухолифатчи Алексей Навальний Германиядан даволанишдан қайтди. Аэропортда қўлга олинган Навальний устидан олдин чиқарилган шартли жазо икки ярим йиллик қамоқ ҳукмига ўзгартирилди. Бутун Россия бўйлаб норозилик намойишлари ташкил қилинди.
Яқинда эса Москвада Навалний устидан янги иш бўйича суд бошланди. Кўпчиликнинг ишонишича, протестлардан кейинги полиция рейдларидан муддао - қўрқув тарқатиш билан Навальнийни дастакловчиларидан маҳрум қилиш.
"Бу ёши 20 ларда бўлган, идеалист ва Навальний жамоасига хайрихоҳ бўлганларга қўрқинчли мужда юборади. Ота-оналар "болам уларга қўшилмасин" деб боласига босим қилади. Кўп одам қўрқиб қолади", дейди таҳлилчи Александр Габуев.
Кремль норозилик ҳаракатини обрўсизлантириш мақсадида бошқа йўлларини ҳам ишга солаяпти. Давлат телевидениеси "Навальний Ғарбнинг одами" дейди. Ва айримлар бу гапга ишонади ҳам.
"У Ғарбнинг кўрсатмаси билан ишлаяпти", дейди Галина.
"Уни ўзларининг сими билан Ғарб бошқараётганини биз ҳаммамиз биламиз", дейди Юлия. Ҳойнаҳой, Навалнийнинг ўзи ўзини заҳарлаган, дейди у.
Булар ҳаммаси Россияни қаерга етаклаяпти?
Ғарб айбдорга чиқарилаётган бу шароитда Америка ва Европа билан муносабатларнинг илиқлашиши даргумон. Россиянинг янада яккаланиши эҳтимоли ортмоқда, дейди Би-би-си мухбири Стив Розенберг.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
