Дунёнинг ишлари: Ўғригина мушук дўкондан пул ўмариб, уйига олиб келди

Ўзи яшайдиган туманда ўғрилиги билан ном таратган Тео лақабли мушук, ниҳоят, уйига арзирли "ўлжа" - нақд пул ўмариб келди.

Англиянинг Ипсвич шаҳри аҳолиси Теонинг янги йил безаклари ва ўйинчоқларини ўғирлашни хуш кўришидан яхши хабардор. Ҳар сафар унинг бекаси Рейчел Друэ мушуги ўмариб, уйга олиб келган буюмларнинг эгасини излаб юришга мажбур.

Друэ хоним, баъзида, мушугининг ҳадеб кераксиз буюмлар кўтариб келавермасдан бирор арзийдиган нарса, масалан, пул ўғирлаб келишини исташини айтиб, ҳазил қиларди. Ниҳоят, унинг «орзуси» рўёбга чиқди - Тео нақд $33.7 га тенг маблағни уйга ўғирлаб, олиб келди.

Саккиз яшар Тео пулларни сут сотиладиган дўкончадан ўғирлагани айтилмоқда.

Рейчел Друэ яқинда оиласи билан янги жойга кўчиб келиб, севимли мушугининг кишини бундай уятга қолдирувчи одатини ташлашидан умид қилган эди.

Бироқ мушук ўғирликка бўлган мойиллигидан қутилиш ўрнига дўкон пештахтасида турган пул солинган халтачани уйга олиб келиб, айтиш мумкинки, янги даражага чиқиб олди.

Друэ хонимнинг бахтига халтачада соҳибнинг уй манзили ёзилган эди ва унинг турмуш ўртоғи Пол Эдвардс мушуги олиб келган пулларни эгасига қайтариб беришга муваффақ бўлди.

«Пуллар бир ёш йигитники экан. Пол мушугимиз безори эканини унга тушунтирди. Йигит, гўё, ҳар куни бундай воқеаларга гувоҳ бўладигандек, ҳайрон ҳам қолмай, кулганча, пулларни олиб қолди,» ҳикоя қилади Друэ хоним.

Пол Эдвардснинг айтишича, бу янги қўшниларни мушугининг одати билан таништиришнинг «ажойиб» йўли бўлган.

Кўп ҳолларда, Друэ хонимнинг мушуги олиб келган буюмлар эгаларини ижтимоий тармоқлар орқали излашига тўғри келади.

У берган эълонларда Теонинг балиқ, пишлоқ, ананас каби озиқ-овқатлар ва, ҳатто, болалар нимчасини ўғирлаб келганини кўриш мумкин.

Биолог Рожер Таборнинг сўзларига кўра, мушуклар тез-тез ўзи яшайдиган жойга «ўлжалар» кўтариб келади, аммо бу, кўпинча, Тео ўғирлайдиган каби буюмлар эмас, балки ахлат қутилардан топилган овқатлар бўлади.

«Ҳақиқий ўғри-мушуклар одамлар фойдаланадиган буюмларни ўмаради,» тушунтиради биолог.

Бу уларнинг болалигидан ов қилишга ўрганмагани сабабли бўлиши мумкин. Табиий шароитда, мушукчаларга онаси туғилиши биланоқ қандай ов қилишни ўргата бошлайди.

"Она ва бошқа оға-инилар билан алоқаси эрта узилган мушукларнинг эътиборини, кейинчалик, турли «ўйинчоқлар» торта бошлайди ва улар бундай буюмларни ўлжа сифатида қабул қилишга одатланиб қолади," дейди жаноб Табор.