Украина урушида қатнашсангиз Ўзбекистонда қамаласиз O'zbekiston Ukrainа Rossiya Yangiliklar

Россияда Украина уруши учун аскарлар иш эълони орқали топилаяптими? Римдаги музейда Бухоро амирининг олтин коллекцияси топилди. Ўзбекистоннинг UzAuto Motors компанияси Россия ва Швейцария банклари ўртасидаги можаро сабабчисига айланди. Ўзбекистон харитасидаги икки нуқта Ер сайёрасидаги энг иссиқ жойлар ўнталигига кирди.

Таҳлил:

Украина ўзини Россия тажовузидан қандай ҳимоя қила олади?

Алоқадор мавзулар:

Аскарлар иш эълони орқали топилаяптими?

Россиянинг Украинага босқинидан бир неча ҳафта ўтибоқ ўзбекистонлик ва қирғизистонлик мигрантларни катта пул эвазига урушда қатнашишга жалб қилиниши борасидаги хабарлар ижтимоий тармоқларда кўрина бошлаганди.

Бу борада Ўзбекистон Ташқи меҳнат миграцияси агентлиги Россиядаги ўзбекистонликларга бир неча марта мурожаат билан чиқиб, уларни огоҳликка чақирди.

Ўтган ҳафтада MediaHub канали «ЧОПда иш. Россия хусусий ҳарбий компаниялари Марказий Осиёда ёлланма аскарларни қандай қидирмоқда?» номли видеолавҳани эълон қилди. (ЧОП - хусусий қўриқлаш ташкилоти)

Унда қирғизистонлик журналист Арген Бахтибек ўғли ижтимоий тармоқларда Марказий осиёликлар учун юқори маош таклиф қилинаётган айрим шубҳали эълонларни текшириб кўришгани ҳақида сўз боради.

Журналист текширувлари баъзи ахборот каналларида берилган эълонлар ўрганилганида, Ўзбекистон ва Қирғизистондан фуқароларни юқори маош эвазига Россия томонидан Украинадаги урушда аскарликка ёлланиш таклифига бориб тақалганини кўрсатади.

Масалан, қўриқчилик бўйича берилган бир эълондаги телефон рақами эгаси билан суҳбатда қўриқчилик вакансияси тўлгани, унинг ўрнига икки баробар кўп маош тўланувчи «иш» - аскарлик таклиф қилинади ва унинг шартлари ёзма равишда юборилади.

Ўзбекистон Ташқи меҳнат миграцияси агентлиги "Шу муносабат билан, юртдошларимиздан хорижда иш таклиф этилаётган норасмий эълонларга ишонмасликни сўраймиз", дея мурожаат қилди.

- "Эслатиб ўтамиз, Ўзбекистон Республикаси Жиноят кодексининг 154 прим 1-моддасида чет давлатларнинг ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга ёлланиш уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш билан жазоланиши кўзда тутилган" - дейилади агентлик мурожаатида.

Ўзбекистон бойликлари Рим музейида

Римда Бухоро амирининг олтин коллекцияси топилди, деб ёзади блогер Шаҳноза Соатова ўзининг Телеграм каналида.

Блогерга кўра, бу маълумотни Шарқ халқлари санъати миллий музейи вакили Паола Дьаморе Самарқандда бўлиб ўтаётган VI Халқаро конгрессда маълум қилган.

«У ўз нутқида Римнинг "Жузеппе Туччи" музейидан Бухоро амирининг олтин коллекцияси сақланаётганини айтди. Бу шахсан мен учун Конгресдан олган энг катта янгиликлардан бири бўлди. Шунингдек меҳмон музейда Кушонлар даврига оид осори-атиқалар - маржонлар, узуклар, билагузуклар, сирғалар ва тилла қуймалари, Ўзбекистон тарихига оид турли безакли тақинчоқлар ўрин олганини ҳам айтиб ўтди», - дейилади хабарда.

Шунингдек, Паола Дьаморе 60 жилдлик "Ўзбекистон маданий мероси жаҳон тўпламларида" китоб-альбомига алоҳида қизиқиш билдириб, Бутунжаҳон жамияти томонидан амалга оширилаётган ишларни қўллаб-қувватлашини билдиргани айтилади.

Ўзбекистон маданий меросини асраш, ўрганиш ва оммалаштириш бўйича Бутунжаҳон жамиятининг VI Халқаро Конгреси "Eriell Group" компанияси ҳомийлигида ташкил этилган.

UzAuto Motors можаро ичида

UzAuto Motors Россия ва Швейцария банклари ўртасидаги можаро сабабчисига айланиб қолди, деб ёзади "Газета.уз"

Хабарга кўра, UzAuto Motors компаниясига берилган кредит Россиянинг Трансcапиталбанк (ТКБ) ва Credit Suisse ўртасидаги суд жараёнига сабаб бўлган. Суд Швейцария банкининг Россиядаги активларини, жумладан 10 млн Евродан кўпроқ маблағини музлатиб қўйган.

UzAuto Motors компаниясига берилган кредит Россиянинг Трансcапиталбанк (ТКБ) ва Швейцариянинг Credit Suisse банки ўртасидаги суд баҳсига сабаб бўлди. Москва арбитраж суди материаллари бунга гувоҳлик бермоқда.

АҚШнинг чекловчи санкциялари остида бўлган ТКБ Россияда Credit Suisse`нинг иккита шўъба корхонаси — Банк Кредит Свисс (Москва) ва «Кредит Свисс Секьюритиз» улушларининг ҳибсга олиниши, РОСТ рўйхатга олувчисига у билан ҳар қандай келишувни амалга оширишга эришди. Бундан ташқари, Москва филиалидаги Швейцария банкига тегишли 10 млн Евродан сал кўпроқ маблағ ҳисоб рақамлари музлатилган.

Навоий - ернинг энг иссиқ нуқталаридан бўлди

Ўзбекистон харитасидаги иккита нуқта сайёрамизнинг энг иссиқ жойлари ўнталигига кирди.

Об-ҳаво ва иқлим портали маълумотларига кўра, Ўзбекистон сайёрамизнинг энг иссиқ 10 талигидан бирданига учта ўринни эгаллади.

22 июл куни соат 11:00 ҳолатига кўра, Навоий вилоятидаги Бузовбой станциясида +44 даража кузатилди - ўша пайтда у энг иссиқ об-ҳаво бўйича дунёда биринчи ўринда эди.

Саккизинчи ўринни Навоий вилоятидаги "Томдибулоқ" (у ерда ҳаво ҳарорати 41,8 даражагача қизиган), тўққизинчи ўринда Қашқадарё вилоятидаги "Ғузор" (41,5 даража иссиқ) эгаллаган.

Ўзбекистондаги бу аномал иссиқ хафтанинг иккинчи ярмида аста-секин пасайиши кутилаётгани ҳақида Ўзгидромет хабар берди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek