Ўзбекистон: Тўртта патирни 40 мингга олдим ёки энди бутун дунё Тошкентга қочадими – хулоса ва муносабат O‘zbekiston dunyo yangiliklar

Бугун Тошкентда яшаш қандай - арзонми? Худди шу мазмундаги постимиз кечаётган ҳафтада ўзбекистонликларнинг энг кўп акс-садоларига сабаб бўлганларидан бирига айланди.

Постимиз остида қолдирилган коментлар эса, юздан ошиқ.

Economist Intelligence Unit жорий ҳафтада ўзининг янги тадқиқоти натижасини эълон қилган.

Халқаро миқёсда катта обрўга эга таҳлил маркази Тошкентни дунёнинг энг арзон шаҳарлари бешталигига киритган.

Алоқадор мавзулар:

Тадқиқот ва хулоса

Economist Intelligence Unitнинг янги тадқиқоти жаҳоннинг 170 дан ортиқ йирик шаҳрини қамраб олган.

Тадқиқот асосан бу шаҳарлардаги товар ва хизматлар нархининг АҚШ долларига қиёсига таянган.

Муаллифлар худди шу асосда дунёнинг энг арзон ва энг қиммат шаҳарлари рейтингини ишлаб чиқишган.

Қолдирилган ўнлаб коментлари умумий мазмунидан деярли барча ўзбекистонликларнинг Тошкент дунёнинг энг арзон шаҳридан биттаси, деган хулосага анчайин скептик муносабатда эканликлари англашилган.

Улар обрўли халқаро тадқиқот марказининг хулосасини кулгу ва киноя билан савол остига олиш баробарида ўз ҳис-туйғуларини ифодалашда эможиларни ҳам аяб ўтиришмагани кўрилган.

Акс-садолар

Ўзининг коментини ўйчан қиёфадаги эможи билан бошлаган фолловерларимиздан бири бугун тўртта патирни 40 минг (сўм - таҳр.)га сотиб олганини айтаркан, бунга яна қаҳ-қаҳ кулиб турган иккита эможини ҳам қўшиб қўйган.

Ғарбнинг ойлигига арзон, деркан, бошқа бири эса, "бизникига" дегандан кейин даҳшатга тушиб турган қиёфадаги бир эмас, кетма-кет тўртта эможини илова қилган.

"Тошкент арзон бўлса, қиммат шаҳарларда Вообше ўзимни йўқотиб қўйсам керак", - дея аввал "қаҳ-қаҳ" уриб, кейин "пешанасига шапатилаган" мазмундаги коментлар эса, таъбир жоиз, бунисини янада тўлдиргандек кўринган.

Яна бир фолловеримиз ҳам, "Қайси Тошкент ҳақида ёзишибди?))))", - деганча бу кулгуга "қўшилган".

Бошқаси эса, "Нарх-наво йилига 4 марта кўтарилиши бўйича биринчи ўринда десанглар, тўғрироқ бўлади", - дея "маслаҳат" берган.

Ўзининг коментини "қанақа арзон", деган комент билан бошлаган навбатдаги фолловеримиз эса, "бензин 1$ литри, гўшт 90 минг (сўм - таҳр.). Штрафлар евростандарт", - деганча вазиятга мисоллар билан "ойдинлик" киритишга уринган.

Яна бири "бу экспертлар гуммани еб, қайтиб кетишган шекилли", - дея кулгу-киноя қилган.

Айримлари ўз истеҳзоларини, "Бутун дунё Тошкентга қочади энди", - деган сўзлар билан ифодалашган.

"Тўғри", дея Economist Intelligence Unitнинг хулосасини маъқуллагандек кўринган бирлари эса, бунинг ортидан, "фақат пулни бошқа давлатда ишлаб топиш керак"лигини таъкидлашган.

Уларнинг айримлари тадқиқотчиларни ёлғончига чиқаришгача боришган.

"Мазззааа, ҳамммааа жой шароит", дея ўз коментини бошлаган бошқа бир фолловеримиз эса, "яримта нон берсанг, ўзим айтаман", деган сўзлари билан унга қўшимча маъно юклашга уринган.

Яна бир коментда эса, "Америкалик талаба 3 ойлик стипендиясига Ўзбекистонни 7 кун айланиб кетолади. Бизнинг 3 ойлик стипендиямизга бир ойлик коммунал тўловни тўлайсан", - деб ёзилган.

"Тошкентда 1 миллион ойлик олишади, лекин 10 миллион расход бўлади", - дейилган жавобга ҳам қаҳ-қаҳ кулиб турган қўшалоқ эможи илова қилинган.

Худди шу коментнинг давомидек қолдирилган бошқасида эса, "Агар ривожланаётган давлатлардагидек ойлик олсак, Тошкентда яшаш "копейка" бўлиб қолади", - дейилган.

"Лекин битта оилани боқиш учун ойига $1000 доллар керак. Арзонлиги қоғозда", деган бошқа бир фолловеримиз ҳам унинг фикрига қўшилгандек кўринган.

Яна бири эса, "Are you kidding?" (Ҳазиллашаяпсизми? - Таҳр.) - дея Economist Intelligence Unitни киноя оша саволга ҳам тутган.

Ўз жавобини биргина кетма-кет қаҳ-қаҳ уриб турган эможилар билан ифодалаган фолловерларимиз ҳам анчагинани ташкил этган.

Коментлар орасида саноқли бўлса-да, "Лекин минг қиммат, деганлар ҳам Ташкентни хлебний город, деп яхши кўришади", - деганлари ҳам учраган.

Бир фолловеримиз эса, "Ишласанг, Ўзбекистоннинг ҳар жойида яшасанг бўлади, фақат ишлаш керак", - дея мулоҳаза юритган.

Economist Intelligence Unit дунёнинг энг қиммат шаҳри деб Исроилнинг Тель-Авивини топган.

Энг арзонлари бешлигига эса, Марказий Осиёдан Тошкентдан ташқари Қозоғистоннинг Олма отаси ҳам кирган.

Пойтахт Тошкент Ўзбекистоннинг энг йирик шаҳри бўлади.

Шаҳар аҳолисининг сони расман икки миллиондан ортади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek